Levi 1 - U TIENU MAAMA TILI 2013

A pada bali maama 1—7 A padijuukaana

¹ O Diedo den yini Musa. O den maadi leni o u Kadikaanu Gbandieli nni, ki yedi:

² «Ŋan yedi Isidayeli yaaba: Yi siiga nilo yaa baa padi padili o Diedo po, wan ñani o padiyanga, i ne yaa ka ti yanbidi siiga.

³ O paabu yaa tie padijuukaali ki tie nua, o baa taa yaa naatonli n ki pia poadi kuli. O baa padi li u Kadikaanu Gbandieli yeni buliñoabu kani, ki baa o Diedo n gaa o po.

⁴ O baa maani o nuu ki padiyanga yeni yuli po. O Diedo baa gaa laa padili, ki ñani laa nilo po o tuonbiadi.

⁵ O baa kodi ki yanga yeni u kaangagidiŋanmoanu nintuali. Alono bijaba, bi kopadicianba mo baa cuani mi soama ki mii mii li padibinbinli yaali n ye u Kadikaanu Gbandieli yeni nintuali kaani kuli.

⁶ O baa lidi ki paadi paadi ki yanga yeni.

⁷ O kopadiciamo Alono bijaba baa cuoni u mu li padibinbinli po, ki maani ti daadi u mu po.

⁸ Bi baa maani a nanjena yeni li yuli leni mi kpama ti daadi yeni po.

⁹ O nilo yua n cua li padili po yeni, baa taa mi ñima ki ŋuudi tugu nni yaala leni a biana, o kopadiciamo mo n juu likuli li padibinbinli po. Li tie padijuukaali, u mu n buoni yaali, ke li nuulu mani o Diedo po.

¹⁰ O nilo yeni padili yaa tie padijuukaali ki tie yanbiga, li yaa tie pia bi ŋuabo, o baa padi bontonli yaali n ki pia poadi.

¹¹ O baa kodi li li padibinbinli jienu po, u kaangagidiŋanmoanu nintuali. Alono bijaba, bi kopadicianba mo baa wuli mi soama li padibinbinli po, ki gaani i kaani kuli.

¹² O nilo yeni baa paadi paadi ki yanga yeni. O kopadiciamo mo n taa likuli ki taani leni li yuli leni mi kpama, ki maani yaa daadi n co, ki maa li padibinbinli po yeni.

¹³ O baa taa mi ñima ki ŋuudi tugu nni yaala leni a biana. O kopadiciamo baa maani likuli li padibinbinli po, ki juu. Li tie padijuukaali, u mu n buoni yaali, ke li nuulu mani o Diedo po.

¹⁴ O nilo yeni padili yaa tie padijuukaali, ki tie bonyugiditi, o baa padi kpaajefanmu bi kpaajenawuundi.

¹⁵ O kopadiciamo baa padi ku bonyugidigu yeni li padibinbinli po. O baa jia o yuli leni o taajenbiñiagu, ki juu la li padibinbinli po. O baa ŋmiani ki ñani mi soama ki mii mii li padibinbinli po, ki gaani i kaani kuli.

¹⁶ O baa ñani ku fiagu leni ti kobidi ki lu, ki kuu li padibinbinli puoli po, ban tiendi mi fantanpienma naani.

¹⁷ O baa toadi i fiabi ki ban ŋaa lan yaa diegi. Lanwani, o kopadiciamo baa maani ku bonyugidigu yeni yaa daadi n maa li padibinbinli po ki co yeni po. Li tie padijuukaali, u mu n buoni yaali, ke li nuulu mani o Diedo po.