Kolosi 4 - U TIENU MAAMA TILI 2013

¹ Yinba canbaanba, yin yaa tiendi yi yonbi po yaala n tiegi leni yaala n pundi, ki yaa tiani ke yimoko pia Canbaa tanpoli po.

I tundi Jesu yaaba po

² Yin yaa jaandi U Tienu ki da cedi, ki da yoaligi, ki yaa tuondi o mani.

³ Yin yaa jaandi o mani ti po, ke wan pa ti u sanu tin fidi ki yaa wangi o Laabaaliŋamo, ki doagidi o bondoaginkaala yaala n tie Kilisiti maama fuuli. Li tie laa maama po ke n ye ne li kpaadidieli nni.

⁴ Yin go yaa jaandi n po, ke min maadi laa maama nani lan pundi min maadi maama.

⁵ Yin yaa ye leni yaaba n kaa daani leni mi yanfuoma, ki da tuo yin ye leni ba yaa yogunu n bia fanma.

⁶ Yi maama n yaa mani yogunu kuli, ki tie nani yaa jiema n pia mi yaama ke li dagidi yeni. Li pundi yin yaa bani ki guani nilo kuli po yaa maguankaama n dagidi.

I fuondijuodike

⁷ Tikika baa waani yi n laabaalo kuli. O tie ti kpibuado, ti todika tin dugi yua yaa po leni ti naacenlielo o Diedo tuonli nni.

⁸ N soani o yi kani lani yaa po lige, ke yin bandi lan tie ti po maama, wani mo n paagi yi pala.

⁹ Ti kpibuado Onesimi yegi leni o. Omoko tie nidugika, ki tie yi siiga yua. Bi baa waani yi nekanba laabaalo kuli.

¹⁰ N kpaadilielo Arisitarki fuondi yi. Barnabasi yiadiga Marki moko fuondi yi. N den tuodi ki teni yi li ñoamabonli o maama po. O yaa cua yi kani, yin gaa o cangu bonŋanla.

¹¹ Jesu, ban go yi yua Jusitusi, moko fuondi yi. Yaa Jufinba n ye ne kuli siiga, bani bebe n tie n tuonsoanlieba, ki tuuni U Tienu diema tuonli. Bi paagi n pali boncianla.

¹² Epafrasi yua n tie yi siiga yua, ki go tie Jesu Kilisiti naacemo moko fuondi yi. O moa yi po yogunu kuli o jaandi nni, ki miadi yi po, ke yin yaa tie yaaba n dagidi cain, ki bani U Tienu n bua yaala, ki yaa se ke li pa U Tienu sanŋoadima nni.

¹³ N tieni o po siedi ke o tuuni yi po leni li yankuali boncianla, yinba leni yaaba n ye Laodise leni yaaba n ye Iyerapolisi kuli.

¹⁴ Ti buado lotoli Luki leni Demasi moko fuondi yi.

¹⁵ Yin fuondi ti kpiiba yaaba n ye Laodise kuli, ki go fuondi Ninfa leni Kilisiti Nitaanli yaali n taagi o diegu nni.

¹⁶ Yi yaa cogi li naa tili, yin teni ban cogi li, Kilisiti Nitaanli yaali n ye Laodise po moko. Laodise yaaba mo n soani yi po ban baa yaa tili, yin cogi li.

¹⁷ Yin yedi Arikipi: «Ŋan fangi a yuli leni o Diedo n puogi a yaa tuonli, ki soani li ki dudi.»

¹⁸ Mini Poli n diani yaa fuondi n tie ne leni n nuceli, ki fuondi yi. Yaa tiani mani n kpaadi po. U Tienu yaa ŋanbili n yaa ye leni yi.