Kolosi 2 - U TIENU MAAMA TILI 2013

¹ N bua yin bandi min moa yaa muacianli, yinba leni yaaba n ye Laodise dogu nni yaa po leni yaaba n daa laa n nunga kuli po.

² N tiendi yeni ke ban baa li papaali, ki taani yenma mi buama nni, ki yaa pia yaa yanfuoma n dagidi. Lani, yin bandi yin dugi yaala yaa po cain. Li go tie ke yin bandi U Tienu bondoaginkaala, lani n tie Kilisiti.

³ Mi yanfuoma leni U Tienu bandima ŋalimano kuli wuo wani Kilisiti yaa niinne.

⁴ N waani yi laa maama kuli, ke oba kuli n da boandi yi, ki tulini yi leni mi mamanma.

⁵ Ba ke mii ye leni yi n gbanandi nni, n ye leni yi n yantiali nni, ki pia li pamanli leni min nua ke yi dagidi leni yiyaba, ke yi dandanli mo se ke li pa Kilisiti nni maama.

Kilisiti n puni yi yaa miali

⁶ Yin den tuo Jesu Kilisiti o Diedo yeni, yin yaa tuugi mani leni o yi yema kuli nni,

⁷ ki yaa pia yi jiini o niinni, ki suagi liiga o sanŋoadima nni. Yin go yaa se ke li pa yi dandanli nni, nani ban den bangi yi maama. Yi pala n yaa gbie leni i tuondi o po, hali ke li kandi.

⁸ Fangi mani yi yula, ki da tuo oba kuli n cuo yi yama leni o nisaalo yanfuoma, yaama n ŋua bi nisaaliba bangima yaama n tie fanma fanma, ki tie boandi, ki ŋua bi nisaaliba danbogida leni ŋanduna paaciami, ki naa ŋua Kilisiti.

⁹ U Tienu n tie maama kuli ye Kilisiti gbanandi nni, ki dagidi cain.

¹⁰ Yimo pia li bonla kuli ke li dagidi o yaa niinni, wani yua n tugi li yuli, ki die yaaba n tie mi diema danba leni u paalu danba kuli.

¹¹ O yaa niinne, ke yi kua yaa koanciagu n naa tie o nisaalo nuu n tieni yaala, ama Kilisiti n tieni yaala. Lani n tie ke yi landi ti nisaali-gbanandi tagibiadu.

¹² Nani ban den taani ki piini yi leni Kilisiti kelima mi batisima po yeni, yi go fii bi tinkpiba siiga o yaa niinni, ki taani leni o, kelima li dandanli U Tienu yua n den fiini o bi tinkpiba siiga paalu po.

¹³ Yinba yaaba n den kpe, kelima yi tuonbiadi leni yin kaa den kua koanciagu yi gbanandi nni maama po, U Tienu guani ki puni yi li miali kelima o po: O puni ti sugili ti tuonbiadi kuli po.

¹⁴ O den bolini yaa tili yaa diani n buni ki cuo ti, Ki doagidi tin den yie o mabilikaama maama, Ki kpaa ki tabini laa tili Li dapoanpoanli po, ki bolini li.

¹⁵ O den dindi yaaba n tie mi diema danba Leni i paaciami danba kuli bali, Ki doagidi mi tagima kuli po, Ke o paani ba, Kelima li dapoanpoanli po.

¹⁶ Lani yaa po, yin da tuo oba kuli n jia yi buudi, kelima yin di ki go ñu yaala po, bi lan tie yaa jaanma dana po, bi i ŋmapaani jaanma dana, yaa ka mi fuodima dana po.

¹⁷ Laa bonla kuli tie yaala n baa ti cua yaa jinjingu, li bonmoanla liba tie Kilisiti.

¹⁸ Yin da tuo niloba kuli n fie yi nuama panpaani, nani wan bua maama, ba yaaba n kpali ke bi pia li yumiinli ki jaandi malekinba. Bi puni bi yula li bonlekaala po, ki gbengidi bi yula fanma fanma bi gbanandi yantiana po.

¹⁹ Baa tuugi leni yua n tie li yuli, ti gbanandi kuli n tuugi yenma, ki go baadi yaala n dagidi yua yaa kani. Li tie kelima i jiini leni a tuga po, ke ti gbanandi kpedi nani U Tienu n puni maama.

Ki kpe ki go fii leni Kilisiti

²⁰ Yi yaa kpe leni Kilisiti, yi paadi leni ŋanduna maasuagu. Be yaa po ke yi go tuo ke ŋanduna kuana die yi, nani yi da tie ŋanduna yaaba yeni?

²¹ Laa kuana nne: Ŋan da taa, ŋan da leni, ŋan da sii.

²² Laa kuana kuli maadi yaa bonla n pia mi tienma, ki baa bodi yaa maame. Akuli ŋua bi nisaaliba n bili ki bangi yaala bebe.

²³ A kuana yeni tie nani a pia mi yanfuoma, kelima a cedi bi niba n gandi ban baa yaa jaandi maama, ki go bili bi niba n yaa miindi bi yula ki wangi bi gbanandi fala. Ama laa kuana naa pia mayuli, ki baa todi bi niba ban yaa paani bi gbanandi bonbuakaala.