Kolosi 1 - U TIENU MAAMA TILI 2013

Kilisiti tuonli n tie maama 1—2 I fuondi

¹ Mini Poli, yua n tie Jesu Kilisiti tondo, kelima U Tienu yanbuama po leni ti kpiilo Timote, n diani li tili ne,

² yinba ti kpiiba yaaba n tie bi nigagidiŋanba leni bi nidugikaaba Kilisiti nni, ki ye Kolosi dogu nni po. Ti Baa U Tienu n pa yi li ŋanbili leni mi yanduanma.

Poli pagi U Tienu Kolosi yaaba po

³ Ti tuondi U Tienu ti Diedo Jesu Kilisiti Baa yi po, ki go jaandi yi po yaa yogunu kuli kaa cedi,

⁴ kelima tin gbadi ke yi pia yaa dandanli Jesu Kilisiti po leni yaa buama bi nigagidiŋanba kuli po.

⁵ Yi baa la kelima U Tienu n bili yi po yaa suginma tanpoli po, i moamoani maama, yaama n tie o Laabaaliŋamo n den kpa cua yi kani, ki bangi yi yaama.

⁶ Laa laabaaliŋamo pundi yi kani ki yadi ŋanduna nni kuli, ki luoni o bonluonkaala ki yabidi ki pugidi. O go tiendi yeni yi siiga, hali yin den gbadi o yaa daali ki bandi U Tienu ŋanbili n tie yaala moamoani.

⁷ Li tie nani ti buado leni ti tuonsoanlielo Epafrasi n den bangi yi maama. O tie yi po Kilisiti naacendugika,

⁸ ki den waani ti U Tienu Fuoma n teni ke yi pia yaa buamoanma.

⁹ Li tie lani yaa po ke hali tin gbadi lani kuli yaa daali, ti jaandi yi po U Tienu kaa cedi, ki miadi o wan gbieni yi pala leni yaa yanfuoma leni yaa fanu n ñani wani U Tienu kani, ke yin bandi o yanbuama.

¹⁰ Yeni, yi tagu n yaa tie nani lan dagidi o Diedo po maama, ke yin yaa tiendi yaala n mani o po yogunu kuli. Yin yaa tuuni a tuonŋama buoli kuli, ki kpedi ki suagi liiga U Tienu bandima nni.

¹¹ Ti go miadi o ke wan pa yi u paalu li bonla kuli po, kelima o paalu yuu n pia ti kpiagidi yaa po, ke yin yaa pia li toli leni li juunli yogunu kuli.

¹² Yaa tuondi mani Baa leni li pamanli, yua n teni ke yi dagidi ki baa yi biinu wani U Tienu n bili yaa ŋalimano mi yenma diema nni, o nigagidiŋanba po.

¹³ O faabi ti ki ñani ti li biigili paalu nni, ki kuani ti o Bibuadiga diema nni.

¹⁴ O yaa niinne ke ti pia mi daafaabima leni ti tuonbiadi sugili.

Kilisiti n tie yua leni wan tuuni yaa tuonli

¹⁵ Wani Kilisiti n tie U Tienu, Tin kaa fidi ki nua yua yaa nannanli, Ki go tie o Bijakpiaga, Yua n den ye hali ke bonliba kuli daa tagi.

¹⁶ Li bonla kuli den tagi o yaa niinni, Yaala n ye tanpoli leni ki tinga nni kuli, Tin nua yaala leni tin kaa nua yaala. Lani n tie yaaba n kaa i bali-kalikaani po, Bi diediba, bi yudanba leni li bali danba kuli. Li bonla kuli tie o yaa tagima ki go tagi o yaa po.

¹⁷ O ye hali ke bonliba kuli daa ye. Wani n kubi li bonla kuli ke li tuugi ki se bonŋanla.

¹⁸ Wani n tie Kilisiti Nitaanli kuli yuli, Lini yaali n tie o gbanandi. O tie o nikpialo, U Tienu Bijakpiaga. U Tienu den kpa fiini wane bi tinkpiba siiga, Ke wan yaa tugi li yuli li bonla kuli nni.

¹⁹ Li den mani U Tienu po ke o yedagidikaama kuli, N yaa ye Kilisiti niinni.

²⁰ O yanbuama po goga, O teni ke li bonla kuli, Yaala n ye ŋanduna nni leni tanpoli po kuli, N mangi leni o kelima Kilisiti yaa po. O ñani ti yibalindi ki teni ke i mani ye, Kelima o soama li dapoanpoanli po.

²¹ Yinba yaaba n den tie bi canba leni U Tienu yibalinba kelima yi yantiabiada leni yi tuonbiada po,

²² o teni ke yi mangi leni o moala kelima o Bijua n den kpe yaa kuuma o gbanandi nni yaa po. U Tienu tieni yeni ki bua ke yin sedi o nintuali ki ŋani cain, ki da pia tagiliba kuli, kaa pia ban baa kuli yi leni yaala.

²³ Li baa yaa tie yeni ke yin yaa se bonŋanla yaa tanpuuli n pa po, kelima yi dandanli po, ki naa lebidi ki ŋaa o Laabaaliŋamo suginma, yin den baa yaadi. Bi waani ŋanduna yaaba kuli o Laabaaliŋamo yeni, mini Poli mo n tua yua yaa naacemo.

Poli tuonli Kilisiti Nitaanli po

²⁴ N mangidi n pali moala leni min laadi yi po yaa fala. N tiendi yeni ke min gbieni n gbanandi nni yaala n poadi Kilisiti yaa fala o gbanandi nni, yaadi n tie o Nitaanli.

²⁵ N tua Kilisiti Nitaanli yaa tuonsoanlo, kelima U Tienu den puogi nni ke min yaa wangi yi U Tienu maama kuli.

²⁶ Mani n tie yaa bondoaginkaala n den wuo hali yogu, yaa jamaani n pendi kuli po, ki doagidi moala o nigagidiŋanba po.

²⁷ O bua ki teni o nigagidiŋanba n yaa bani o bondoaginkaala, yaala n tie ŋalimani, ki pia ti kpiagidi, ki ye i nibuoli kuli po. Laa bondoaginkaala tie line, Kilisiti ye yi niinni, ki teni ke yi pia ti dugidi, ke yin taani ki baa U Tienu kpiagidi.

²⁸ Ti tuodi ki wangi nilo kuli wani yaa maame, ki go bangi laa maama leni mi yanfuoma, ki bua ki cuani nilo kuli U Tienu kani, ke o dagidi cain Kilisiti nni.

²⁹ Li tie lani yaa po ke n tuuni, ki moa li muali leni o yaa fidu, yuu n tuuni n niinni leni u paalu.