Josue 8 - U TIENU MAAMA TILI 2013

Isidayeli yaaba paadi Ayi dogu

¹ O Diedo den yedi Josue: «Ŋan da jie, da teni lan wudi a gbanu. Ŋan taa bi toatieba kuli, yin gedi ki ban baa Ayi dogu. Diidi, n baa teni a Ayi bado, o dogu leni o diema kuli.

² Ŋan tieni laa dogu leni u bado, nani ŋan den tieni Jeriko leni u bado maama. Bonyenla bebe, yin taa mani u bonpiakaala leni u yandi yi yula po, lan tua ti fagidi. Ŋan boali toatietianba u dogu puoli po.»

³ Josue den fii leni bi toatieba kuli, ki baa gedi ki ban baa Ayi. O den gandi jakoanda tuda piitaa (30 000), ki soani ba ku ñiagu,

⁴ ki teni ba yaa ñoamabonli n tie ne: «Yin ban boali u dogu puoli. Yin da foagidi leni u dogu boncianla, ki bogini ki yaa guu.

⁵ Mini leni yaa niba n ye leni nni kuli baa nagini u dogu. U dogu yaaba yaa ñani ki baa tuogi leni ti, ti baa lebidi ki sani nani mi kpiama yeni.

⁶ Bi baa ŋoadi ki deli ti, hali ki foagidi leni u dogu, kelima bi baa yedi: ‹Isidayeli yaaba sani nani mi kpiama yeni.›

⁷ Lanyogunu, yin fii ki ña yi boalikaanu ki baa u dogu, kelima o Diedo yi Tienu baa taa u ki tieni yi nuu nni.

⁸ Yi yaa paadi u dogu yeni yaa yogunu, yin juu u, ki tieni nani U Tienu n bili maama. Min teni yaa ñoamabonli n yeni.»

⁹ Josue den soani ba ke bi fii ki gedi ki ban boali ki guu Beteli leni Ayi siiga, Ayi dogu nintuali. Laa ñiagu, Josue den dua yaa toatieba n sieni siiga.

¹⁰ Josue den fii ku tiŋaapanpangu, ki goandi o toatiecaga. Wani leni Isidayeli nikpela kuli den kua bi liiga, ke bi gedi ki baa n baa Ayi.

¹¹ Yaa toatieba n den ye leni o kuli den gedi ki nagini u dogu. Ban den kuli Ayi yaa yogunu, bi den kpaa bi toanagili Ayi dogu jienu po. Ku joaloangu den poa bani leni u dogu siiga.

¹² Josue den taa jaba tudamuu (5 000), ki soani ba ke bi ban wuoni ki kuu Ayi puoli, Ayi leni Beteli siiga.

¹³ Bi toatieba den kpaa bi toanagicianli u dogu jienu po, ke bi naa toatieba mo ban wuo u dogu nintuali. Laa ñiagu, Josue den duani ku joaloangu nni.

¹⁴ Ku tiŋaapanpangu, Ayi bado n den laa lani, wani leni u dogu yaaba kuli den jaligi ki ñani ki gedi, ki baa n tuogi leni Isidayeli yaaba bu toabu ban den kpa tuogi leni ba naani, Jurden tialu nni. Waa den bani ke bi toatieba boali u dogu puoli ki guu.

¹⁵ Josue leni Isidayeli yaaba kuli den tieni nani Ayi yaaba paadi ba yeni, ki sani ki teli mi fanpienma po.

¹⁶ Bi den taani yaa jaba n sieni u dogu kuli nni, ke bi ñani ki ŋoadi ki deli ba. Josue leni Isidayeli yaaba den tiini ke bi ŋua, hali ki ban foagidi leni u dogu.

¹⁷ Ba jayendo naa den sieni Ayi leni Beteli dogi nni. Bikuli den ñani ki ŋoadi ki deli Isidayeli yaaba, ki ŋaa u dogu ke u bilinciamu buliñoabu yaa.

¹⁸ O Diedo den yedi Josue: «Tandi a kpaanli ki tegini Ayi, kelima moala n baa teni a u.» Josue den tandi o kpaanli ki tegini Ayi.

¹⁹ Wan den tandi o nuu yaa yogunu, yaa jaba n den boali yeni den jaligi ki ñani ki kua u dogu nni, ki baa u, ki juu u.

²⁰ Ayi yaaba n den gbegi ki diidi bi puoli po, bi den laa ke i muñii ña u dogu nni ki do hali tanpoli. Baa den pia ban baa fidi ki sani ki gedi naani ki ciadi, kelima ban den ŋua ki deli Isidayeli yaaba, yaaba, den lebidi ki tuogi leni ba.

²¹ Josue leni Isidayeli yaaba kuli n den laa ke yaaba n boali yeni baa u dogu, ke u muñii fii ki do, bi den lebidi ki tuogi leni Ayi yaaba.

²² Isidayeli yaaba, yaaba n den juu u dogu yeni mo den ñani u dogu nni, ki tuogi leni ba ke bani Isidayeli yaaba den taani ki lindi ki cebini Ayi yaaba i kaani kuli, ki kpa ba. Baa den ŋaa ba niyendo ke o fo, oba ki den sani ki cia.

²³ Bi den cuo Ayi bado bebe, ki gedini o Josue kani.

²⁴ Isidayeli yaaba den kpa bi yibalinba, ban den ŋoadi ki deli ba ki kua yaa fanpienma nni. Li yaa puoli, Isidayeli yaaba den lebidi ki guani Ayi nni, ki kpa yaaba n sieni lienni kuli.

²⁵ Landaali, bi den kpa Ayi yaaba kuli, bi jaba leni bi puoba. Bikuli den tie piiga n niba tudalie (12 000).

²⁶ Josue den tiani o kpaanli ki tiegi Ayi, hali Isidayeli yaaba n ban bolini laa dogu yaaba kuli ki gbeni.

²⁷ Isidayeli yaaba den taa bi yula po u dogu bonpiakaala leni u yandi, ke li tua ti fagidi nani o Diedo n den waani Josue maama.

²⁸ Josue den juu Ayi, ki teni ke u tua diegbena ya baa ki ye hali dinla.

²⁹ O den teni ke bi soadi Ayi bado ki joani o bu tibu po, ki ŋaa o likani hali ku yenjuagu. U yienu n den bua ki baa yaa yogunu, Josue den teni ke bi joandi o ki luni o u dogu bilinciamu buliñoabu kani, ki dogini o po tankogicianli. Li ye likani hali dinla.

Li bali maama cogu Ebali juali kani

³⁰ Josue den maa li padibinbinli o Diedo, Isidayeli Tienu po, Ebali juali yuli po.

³¹ O den maa li nani o Diedo naacemo Musa n den bili Isidayeli yaaba po maama, nani lan diani wani Musa bali maama tili nni maama. Bi den maa laa padibinbinli leni yaa tana n ki kpiedi, baa den sii ŋa leni kudi. Bi den padi li po a padijuukaana leni mi taanyenma pada U Tienu po.

³² Likani, Josue den diani a tana po, ki togidi Isidayeli yaaba nintuali, Musa n den diani yaa bali maama.

³³ Isidayeli yaaba, a nikpela, bi yudanba, bi bujiaba leni yaaba n den tie nilanba ki ye bi siiga kuli, den se o Diedo ŋantaadikpaku ganu leni ku jienu, Levi buolu yaaba bi kopadicianba yaaba n bugi ku kpaku yeni nintuali. Bi niba boagidima den se ki goa Garisimi juali po, boagidima mo Ebali juali po, nani Musa n den bili ke ban tieni maama, ki gaali Isidayeli yaaba.

³⁴ Li yaa puoli, Josue den cogi U Tienu bali maama kuli, li seli leni ti solindi kuli, nani lan den diani li bali maama tili nni maama.

³⁵ Josue den cogi bi po Musa n den bili yaa ñoamabonbilikaana kuli. Waa den ŋaa ba mayenma kaa cogi ma Isidayeli yaaba nitaanli, bi jaba, bi puoba, a bila leni yaa nilanba n den ye bi siiga kuli po.