Josue 7 - U TIENU MAAMA TILI 2013

Akan tagili leni o kuuma

¹ Isidayeli yaaba den tudi tudicianma. Bi den miidi U Tienu n den kuani ba yaa kuali ki yedi, ke ban da taa wan yedi ban bolini yaala yeni niinni bonla. Juda buolu yua Akan den taa ban den baa bolini yaala siiga bonliba. Akan den tie Sela puoliŋuanu. Sela den mali Sabidi, ke Sabidi mo mali wani Akan baa Karmi. Akan n den taa yaala n kua yeni, o Diedo pali den fii Isidayeli yaaba po.

² Josue den soani bi niba ke bi ñani Jeriko ki gedi Ayi dogu nni, yuu n ye Beteli puoli, ki nagi leni Beti-Afeni. O den yedi ba: «Yin gedi mani ki ban goandi laa diema.» Bi den gedi ki ban goandi Ayi.

³ Bi den guani ki cua Josue kani, ki yedi o: «Laa tie tiladi ŋan teni bi toatieba kuli n gedi ki ban baa Ayi. Toatieba tudalie (2 000) bi tudataa (3 000) baa dagidi. Ŋan da coagi bi toatieba kuli, kelima Ayi yaaba naa fuu.»

⁴ Lanwani, nani toatieba tudataa yeni den fii ki gedi. Ama Ayi yaaba den deli ba, ke bi sani.

⁵ Bi den kpa Isidayeli yaaba siiga nani piitaa n nibiluoba, ki deli yaaba n sieni ki ñani u dogu bilinciamu buliñoabu kani, ki yaa caa hali Sebalima dogu. Ayi yaaba den pua ki yadi ba li juali jiidima. Li den wudi Isidayeli yaaba gbani, ki cie bi jigi.

⁶ Li paboanli po, Josue leni Isidayeli yaaba nikpela den padi bi tiadi, ki wuli bi yula po mi tama. Bi den laabi o Diedo ŋantaadikpaku nintuali, ki yaa caa hali ku yenjuagu.

⁷ Josue den yedi: «Ŋain, o Diedo U Tienu, be yaa po ke a duoni ti Jurden, ki taa ti ki teni ti yibalinba Amori yaaba, ke bi baa bolini ti? Ti yaa den bani, ti cedi ki ye napo yaa boanduoli.

⁸ O Diedo, Isidayeli yaaba n gbali bi yibalinba ki lebidi ki sani yeni, n baa yedi be?

⁹ Kanana yaaba leni mi diema na yaaba kuli baa gbadi likuli, ki lindi ki cebini ti, ki bolini ti yela ŋanduna nni. A baa tieni be ki doagidi a yeli kpiagidi?»

¹⁰ O Diedo den yedi Josue: «Ŋan fii. Be yaa po ke a laabi nanda?

¹¹ Isidayeli yaaba tieni ti tuonbiadi. Bi miidi min den bili bi po yaa ñoamabonli. Bi taa li bonla min den yedi ban bolini yaala yeni siiga, ki suni la, ki wuoni bi tiadi nni.

¹² Lani yaa po n teni ke Isidayeli yaaba kan fidi ki tuogi leni bi yibalinba lan gedi kaanu. Bi baa yaa lebidi ki tiini, kelima ban taa yaala n den baa bodi yeni teni ke bi kua mi bodima nni. Yi yàá ñani min den yedi ban bolini yaala yeni, ki bolini la, n kan go yaa ye leni yi.

¹³ Ŋan fii ki bogini bi niba, ki waani ba ke ban gagidi ki ŋanbi bi yula saala po, kelima mini o Diedo bi Tienu yedi ba mine: Min den yedi yin bolini yaala yeni, li bontianla ye yi siiga. Yi kan fidi ki tuogi leni yi yibalinba lan gedi kaanu, se yi ñani la yi siiga.

¹⁴ Lanwani, li yaa fii ki faa, yin nagini n nintuali buolu buolu. N yaa yini yaa buolu, wun nagini diegu diegu. N yaa yini yaa diegu, ku niba n nagini dansanu dansanu. N yaa yini yaa dansanu, u niba n nagini niyendo yendo.

¹⁵ N yaa ban cuo yua n taa yaala n den baa bodi yeni, ban juu o, wani leni wan die yaala kuli, kelima o miidi n bali maama, ki cagini yinba Isidayeli yaaba siiga.»

¹⁶ Josue den fii ku tiŋaapanpangu, ki teni ke Isidayeli yaaba nagidi U Tienu nintuali buolu buolu. Li den cuo Juda yaa buolu.

¹⁷ O den teni ke Juda buolu yaaba nagini diegu diegu, ke li cuo Sela yaa diegu. O den teni ke Sela diegu yaaba nagini dansanu dansanu, ke li den cuo Sabidi yaa dansanu.

¹⁸ O den teni ke Sabidi dansanu yaaba nagini yendo yendo, ke li den cuo Akan, yua n tie Karmi bijua, Sabidi yaabili. Sabidi mo den tie Juda buolu yua Sela bijua.

¹⁹ Josue den yedi Akan: «N bijua, ŋan kpiagi o Diedo Isidayeli Tienu ki pagi o, ki waani nni ŋan tieni yaala, ki da wuoni nni liba.»

²⁰ Akan den guani ki yedi Josue: «Li tie moamoani ke n tudi o Diedo Isidayeli Tienu po. Min tieni yaala nne:

²¹ N den laa ti fagidi siiga kpaligolikaŋanbu, ke bu ñani Mesopotami diema po leni ŋanjilifa kujapiena kobilie leni wula bonmunmunli, ke li kpiagu pundi kilo boagidima. N den laa lani kuli, ke n yama kua lienni, ke n taa. Likuli wuo tinga nni n gbandieli siiga, ke ŋanjilifa ye li tiipo.»

²² Josue den soani bi niba ke bi sani ki gedi li gbandieli po. Ti tiadi yeni kuli den wuo Akan gbandieli nni, ke ŋanjilifa ye tiipo.

²³ Bi den ñani likuli li gbandieli nni, ki gedini Josue leni Isidayeli yaaba kuli kani, ki bili la o Diedo nintuali.

²⁴ Josue leni Isidayeli yaaba kuli den taani ki taa Sela bijua Akan leni ŋanjilifa, bu kpaligolikaabu, wula bonmunmunli yeni leni Akan bijaba, o bisiaba, o ne, o ŋunbi, o pe, o gbandieli leni wan pia yaala kuli, ki gedini Akori joaloangu po.

²⁵ Josue den yedi Akan: «Be yaa po ke a faligi ti? O Diedo baa faligi a dinla.» Lani, Isidayeli yaaba kuli den lugidi o a tana ki kpa o. Bi den kpa o niba kuli yeni, ki juu o bonpiakaala kuli.

²⁶ Bi den dogini o po a tana boncianla. Li tankogili yeni baa ki ye hali dinla. Li tie lani yaa po, ke bi yi laa joaloangu Akori hali dinla. Li yaa puoli U Tienu pali den jiidi.