Josue 6 - U TIENU MAAMA TILI 2013

Isidayeli yaaba paadi Jeriko dogu

¹ Bi den luoni Jeriko bilinciamu buliñoana, ki ñagini ñagini kelima Isidayeli yaaba po. Niloba ki den ña, niloba ki den koa.

² O Diedo den yedi Josue: «Diidi ki le, n tieni a Jeriko, u bado leni u jakoanda kuli a nuu nni.

³ Fini leni bi toatieba kuli n gaani ki lindi mani u dogu. Yin gaani ki lindi u daali kuli yenma. Yin yaa tiendi yeni, hali danaluoba.

⁴ Kopadicianbilele baa kua yaaba n bugi ku ŋantaadikpaku liiga, ki yaa kubi naatuntunalele ki piebi ki cuoni. Li daleleeli, yin lindi mani u dogu taalimilele, ke bi kopadicianba yeni piebi a naatuntuna yeni.

⁵ Yi yaa gbadi ke bi waagi ki piebi ki kpaani yaa yogunu, bi niba kuli n tiani boncianla. Lanyogunu liga, u dogu bilinciamu baa baa ki mudi mudi. Lanwani, bi niba kuli n do ki kua u dogu nni, ke yuakuli tiegi o nintuali.»

⁶ Nun bijua Josue den yini bi kopadicianba, ki yedi ba: «Yin taa mani ku ŋantaadikpaku ki bugi. Kopadicianbilele mo n yaa kubi naatuntunalele, ki gaa ku liiga ki yaa cuoni.»

⁷ O den yedi bi niba kuli. «Yin yaa cuoni mani ki lindi u dogu. Yaa jaba n muubi ti toatiadi n kua ku ŋantaadikpaku liiga, ki yaa cuoni.»

⁸ Josue n den maadi leni bi niba ki gbeni, yaa kopadicianleleediba n kubi a naatuntunleleeda yeni den gaa ku ŋantaadikpaku liiga, ki cuoni ki piebi.

⁹ Yaa jakoanda n muubi ti toatiadi den cuoni yaa kopadicianba n piebi a naatuntuna liiga. Bi naa toatieba den ŋua ku puoli po. Bi cenli kuli nni, yaaba n den piebi a naatuntuna yeni ki den jidi.

¹⁰ Josue den tuodi ki waani bi niba kuli, ke ban yaa ŋmini suo, ki da teni ban gbadi bi ñoabu nni. Ban da maadi liba kuli, hali wan baa ti waani ba yaa daali ban tiani.

¹¹ Josue den teni ke bi taa o Diedo ŋantaadikpaku, ki bugi ki gaani ki lindi u dogu. Bi den lindi u yenma, ki guani ki kua li nagili nni ki duani.

¹² Josue den yagidi ki fii. Bi kopadicianba den taa o Diedo ŋantaadikpaku ki bugi.

¹³ Yaa kopadicianleleediba n kubi a naatuntunleleeda yeni didi den gaa ku ŋantaadikpaku liiga, ki cuoni ki piebi. Yaa jakoanda n muubi ti toatiadi den gaa bi liiga, ki cuoni. Bine mo den ŋua o Diedo ŋantaadikpaku puoli. Bi cenli kuli nni, bi den piebi a naatuntuna.

¹⁴ Li dalieli bi den gaani ki lindi u dogu yenma, ki guani ki kua bi nagili nni. Bi den tiendi yeni daali kuli, hali danaluoba.

¹⁵ Li daleleeli, bi den yagidi ki fii ki gaani ki lindi u dogu, nani ban yen tiendi maama. Bi den lindi u taalimilele. Landaali bebe yo, ke bi den lindi u dogu taalimilele.

¹⁶ Mi taaleleedima, bi kopadicianba n den piebi a naatuntuna, Josue den yedi bi niba: «Tiani mani, kelima o Diedo puni yi ke yin paadi u dogu.

¹⁷ Yin bolini u, wuni leni yaala n ye u niinni kuli, kelima u tie o Diedo n die yaala. Ama yin cedi li puokpagili Rahabi leni yaaba n ye leni o o diegu nni kuli, kelima o den wuoni tin den soani yaa tonda.

¹⁸ Die fangi mani yi yula, oba n da sii yaala n baa bodi yeni siiga liba, kelima yi yaa taa lienni bonliba, yi baa kuani Isidayeli yaaba nagili, fala leni mi bodima nni.

¹⁹ Ŋanjilifa, wula leni yaa tiadi n tie kumoandi leni yaadi n tie kuboandi kuli baa tua o Diedo yaala, ki kua o ŋalimankaanu nni.»

²⁰ Bi kopadicianba den piebi a naatuntuna. Bi niba n den gbadi ke bi piebi yaa yogunu, bi den tiani boncianla ke u dogu bilinciamu den mudi, ki baa ukuli. Bi niba kuli den doni ki kua u dogu nni, ke yuakuli tiegi o nintuali. Bi den baa u dogu, ki fie u,

²¹ ki bolini yaala n ye lienni kuli, bi jaba leni bi puoba, a bila leni a nikpela, i ne, i pe leni i ŋunbi kuli. Bi den kpa bikuli leni mu jugisiemu.

Josue teni ke bi cedi Rahabi leni o diegu yaaba

²² Josue den yedi yaa jaliediba n den goandi mi diema yeni, ke ban kua li puokpagili Rahabi diegu nni ki ñani o, wani leni o deni yaaba kuli, nani ban den poli ki yedi o ke bi baa tieni maama.

²³ Bi den kua ki ñani Rahabi leni o baa leni o naa, o naataanjaba, o naataanpola leni o niba yaaba n sieni kuli. Bi den ñani ba, ki gedini ba Isidayeli yaaba nagili kunu.

²⁴ Lani, bi den juu u dogu yeni leni yaala n ye lienni kuli. Bi den taa ŋanjilifa, wula, yaa tiadi n tie kumoandi leni kuboandi bebe, ki kuani U Tienu kaangadiko ŋalimankaanu nni.

²⁵ Josue den cedi Rahabi leni o baadiegu yaaba leni o kpiiba kuli ke bi fo. Wani Rahabi buolu baa ki ye Isidayeli yaaba siiga hali dinla, kelima o den wuoni Josue n den soani yaa tonda ke bi goandi Jeriko.

²⁶ Landaali, Josue den soli yaa solindi n tie ne: «Yaa joa n fii ki baa maa Jeriko dogu ne kuli, U Tienu n naali o. O yaa puu u tanpuuli yaa yogunu, o bijakpelo n kpe, o yaa luoni u bilinciamu buliñoana yaa yogunu, o bijuogu mo n kpe.»

²⁷ O Diedo den ye leni Josue. O yeli den kpedi ki ñani mi diema nni kuli.