Josue 5 - U TIENU MAAMA TILI 2013

Isidayeli yaaba kua ku koanciagu Giligali kani

¹ Amori yaaba, yaaba n den ye Jurden nintuali leni Kanana yaaba, yaaba n den ye mi ñincianma kunu yaa badiba kuli den gbadi ke o Diedo teni ke Jurden kuodi, ke Isidayeli yaaba baa ki duodi. Li den wudi bi gbani boncianla, ke bi jigi cie kelima Isidayeli yaaba po.

² Lanyogunu o Diedo den yedi Josue: «Ŋan ŋanbi a tana ŋan tua jugimu, ki kuani Isidayeli yaaba, yaaba n daa kua koanciagu.»

³ Josue den taa mu tanjugimu, ki kuani Isidayeli yaaba ku koanciagu, ban yini naani ku “koanciagu joakudiga”.

^4-5 Isidayeli yaaba n den ñani Ejipiti nni, yaa jaba n den pundi ki gedi toabu kuli den kua ku koanciagu. Ama laa nifiima kuli den kpe mi fanpienma nni. Die ban den mali yaa bonjala li sancenli nni, ki den kua koanciagu. Li tie lani yaa po yo, ke Josue den kuani ba.

⁶ Isidayeli yaaba den cuoni mi fanpienma nni bina piinaa, hali ke yaa jaba n den ñani Ejipiti nni ki pundi ki gedi toabu, ki naa cengi ki tuo o Diedo maama kuli den kpe. U Tienu den poli ki yie bi po, ki waani ba ke o kan teni ban le wan den poli ki niani ke o baa pa bi yaajanba yaa diema, mi naaŋanma leni ti siadi n dua yaa diema nni yeni.

⁷ U Tienu den teni ke bi bila n gaa bi kaanu, ki kua mi diema nni. Josue den kuani bani bi bila yene ku koanciagu, kelima baa den kuani ba koanciagu li sancenli nni.

⁸ Ban den kuani Isidayeli yaaba kuli ku koanciagu ki gbeni, bi den ye li nagili nni, hali ban ban paagi.

⁹ O Diedo den yedi Josue: «Dinla, n ñani yi po Ejipiti fe.» Lani yaa po, bi den yini laa kaanu Giligali. Likani baa ki yi yene hali dinla.

Bi jaani mi Pendima jaanma Giligali kani

¹⁰ Isidayeli yaaba n den ye bi nagili nni Giligali yeni, bi den jaani mi Pendima jaanma o ŋmaalo piiga n danaali, ku yenjuagu, Jeriko tialu nni.

¹¹ Mi Pendima jaanma daali yaa fiifaama, bi den dini Kanana diema jiema. Landaali, bi den taa mi diema kpaangu ki ŋanbi yaa dupen n ki pia dabinli leni i disagidi ki dini.

¹² Isidayeli yaaba n den li dini mi diema jiema yeni, manni yua n den ña tanpoli ki baali yeni den sedi kaa go baali. Baa go den baadi manni, bi den di Kanana diema jieme laa binli.

Josue maadi leni o Diedo toagoli yudaano

¹³ Dayenli, Josue den kuu leni Jeriko dogu. O den noanli o liiga, ki sua ke o joa se o nintuali, ki noadi ki jugisiega ki muubi. Josue den nagini o ki yedi o: «A tie ti yaa po yua bi, bi ti yibalinba yaa po yua yo?»

¹⁴ O joa yeni den guani ki yedi o: «Mii tie bi siiga oba kuli. N tie Li Miali Diedo toagoli yudaano yo. N cua n yeni.» Lani, Josue den labini ki pugi o ki yedi: «N daano, a bua ki puogi mini a naacemo be?»

¹⁵ O Diedo toagoli yudaano den yedi Josue: «Ŋan pidi a cacaadi, kelima ŋan se yaa kaanu yeni gagidi U Tienu po.» Josue den tieni wan yedi yaala.