Josue 4 - U TIENU MAAMA TILI 2013

Bi ñani piiga n tanalie Jurden nni mi tiadima po

¹ Isidayeli yaaba kuli n den duodi Jurden ki gbeni, o Diedo den yedi Josue:

² «Yin gandi Isidayeli yaaba buoli siiga piiga n jabilie, buolu kuli siiga jayendo,

³ ki waani ba ke ban guani ki kua ki ban taa piiga n tanalie Jurden siiga, bi kopadicianba n se naani yeni. Ban taa ŋa, ki ña ki ban bili yin baa duani naani.»

⁴ Josue den yini wan den gandi Isidayeli yaaba siiga yaa piiga n jaliediba yeni,

⁵ ki yedi ba: «Yin kua mani Jurden siiga, o Diedo yi Tienu ŋantaadikpaku nintuali kani, nilo kuli n taa tanyenli, lan taani ki tua piiga n tanalie, Isidayeli yaaba buoli coali n da maama.

⁶ Laa tana baa yaa tiadi yi yaala n tieni Jurden nne. Dayenli yi bila yaa ti buali yi laa tana n bua ki yedi yi po yaala,

⁷ yin waani ba ke U Tienu ŋantaadikpaku n den pundi Jurden yaa yogunu, Jurden ñima den jia ku nintuali. Kun den bua ki duodi, mi ñima den jia. Laa tana baa yaa tie Isidayeli yaaba po bontiadikaala, hali yaa yogunu kuli.»

⁸ Bi piiga n niliediba yeni den tieni Josue n den yedi ba yaala. Bi den taa piiga n tanalie Jurden siiga, ke a coali da leni Isidayeli yaaba buoli n da maama, nani o Diedo n den waani Josue maama. Bi den taa ŋa, ki gedini ki bili ban den baa duani naani.

⁹ Josue mo den sieni piiga n tanalie Jurden siiga, yaa kopadicianba n den bugi ku ŋantaadikpaku n den se naani. A baa ki ye likani hali dinla.

¹⁰ Yaa kopadicianba n den bugi ku ŋantaadikpaku den se Jurden siiga, hali bi niba n ban tieni ki gbeni o Diedo n den waani Josue wan yedi ba yaala. Li den tieni nani Musa n den waani Josue maama. Ku niligu den jaligi ki duodi.

¹¹ Bi niba kuli n den duodi ki gbeni, bi kopadicianba den duodi leni ku ŋantaadikpaku, ki gaa ku niligu liiga.

¹² Rubeni buolu, Gadi buolu leni Manase buolu yuu n tie boagidima den taa bi toatiadi, ki gaa Isidayeli yaaba, yaaba n sieni liiga, ki duodi nani Musa n den yedi ba maama.

¹³ Yaa jaba n den taa bi toatiadi ki bogini bu toabu po den bua ki pundi niba tuda piinaa (40 000). Bi den duodi Jurden o Diedo nintuali, ki pundi Jeriko tialu nni.

¹⁴ Landaali, o Diedo den kpiagi Josue Isidayeli yaaba nintuali, ke bi den fangi o hali o miali banlu, nani ban den fangi Musa maama.

¹⁵ O Diedo den yedi Josue:

¹⁶ «Ŋan waani yaa kopadicianba n bugi ku ŋantaadikpaku, ban ña Jurden nni.»

¹⁷ Josue den waani ba ke ban ña.

¹⁸ Yaa kopadicianba n bugi ku ŋantaadikpaku n den ñani Jurden nni yaa yogunu ke bi taana ŋmaa li boanjaali, Jurden ñima go den guani mi kaanu, ki gbie ki yadi yadi i kaani kuli, nani man den kpa yadi maama.

¹⁹ Ku niligu den duodi Jurden li binli ŋmakpialo dapiiga daali, ki kpaa bi nagili Giligali dogu kani, Jeriko puoli.

²⁰ Josue den sieni ban den ñani Jurden nni yaa piiga n tanlieda, Giligali dogu kani.

²¹ O den yedi Isidayeli yaaba: «Saala po, yi bila yaa ti buali yi yaa tana n tie ne n bua ki yedi yaala,

²² yin togidi ba li fuuli, ki waani ba Isidayeli yaaba n den duodi Jurden taakuoma maama.

²³ O Diedo yi Tienu den teni ke Jurden kuodi, ke yikuli den baa ki duodi nani wan den tieni mi Ñincianmoanma maama, ke ti den baa ki duodi.

²⁴ O den tieni yeni, ke ŋanduna nibuoli kuli n bandi ke wani o Diedo paalu yabi, ke yimo n yaa fangi o yaa yogunu kuli.»