Josue 3 - U TIENU MAAMA TILI 2013

Isidayeli yaaba duodi Jurden kpenu

¹ Josue den yagidi ki fii ki ñani Sitimi dogu nni, wani leni Isidayeli yaaba kuli. Bi den pundi Jurden, ki jiidi likani ki baa yuandi ki duodi.

² Danataa n pendi, bi yudanba den gaani li nagili kuli nni

³ ki yedi bi niba kuli: «Yi yaa laa ke bi kopadicianba, bani Levi buolu yaaba, taa o Diedo yi Tienu ŋantaadikpaku ki bugi, yin fii mani ki ña yin ye naani, ki ŋoadi ku.

⁴ Ku baa waani yi yin baa tagini yaa sanu, kelima yi daa kpa tagini laa sanu. Ama yinba leni kuni siiga baa yaa pia yaa banli n pundi kilo dajenbiyenga. Yin da nagini ku.»

⁵ Josue den yedi ku niligu: «Yin gagidi ki ŋanbi mani yi yula, kelima saala o Diedo baa tieni mi bancianma yi siiga.»

⁶ Josue den yedi bi kopadicianba: «Yin taa mani U Tienu ŋantaadikpaku ki bugi, ki gaa ku niligu liiga, ki yaa cuoni.» Bi den taa ku ki bugi, ki gaa ku niligu liiga ki cuoni.

⁷ O Diedo den yedi Josue: «Dinla n baa cili ki kpiagi a, Isidayeli yaaba kuli n le ki bandi ke n ye leni a, nani min den ye leni Musa maama.

⁸ Ŋan waani yaa kopadicianba n bugi ku ŋantaadikpaku, ke bi yaa li pundi ki kua mi ñima nni yaa yogunu, ban sedi u ñinkunu.»

⁹ Josue den yedi Isidayeli yaaba: «Nagini mani ne, ki cengi o Diedo yi Tienu ñoamabona.

¹⁰ Yaala n baa teni yin bandi ke U Tienu yua n fo ye yi siiga, ke o baa deli yi po Kanana yaaba, Hititi, Hiviti, Perisiti, Giligasi, Amori leni Jebusi yaaba tie line:

¹¹ Bi baa bugi wani ki tinga kuli Diedo ŋantaadikpaku, kun kua yi liiga Jurden ñima nni.

¹² Moala, yin gandi mani piiga n nibilie yinba Isidayeli buolu yaaba siiga, lani n tie buolu kuli niyendo.

¹³ Yaa kopadicianba n bugi Li Miali Diedo, ki tinga kuli Diedo ŋantaadikpaku yeni taana yaa sii Jurden ñima yaa yogunu, mi ñima baa jia. Yaa ñima n ña ganu po ki kpendi yeni, baa sedi nani li goanli yeni.»

¹⁴ Ku niligu den ñani bi gbandiena nni, ki baa duodi Jurden. Yaa kopadicianba n bugi ku ŋantaadikpaku, den gaa bi liiga ki cuoni.

¹⁵ Li den tie u jetaagu yogunu, Jurden ñima n yen gbie ki yadi yadi ki do a boanjaana po yaa yogunu. Yaa kopadicianba n den bugi ku ŋantaadikpaku n den pundi Jurden ke bi taana sii mi ñima,

¹⁶ yaa ñima n ña ganu po ki kpendi den sedi nani li goanli yeni, hali foagima ki nagi leni Adama dogu, ki kuu leni Sartan dogu. Yaa ñima n tiini ki caa jienu po, Araba yaa ñincianma yaama n caa mi ñincianyaama po, den jia cain. Lani, ku niligu den duodi ki tiegi Jeriko.

¹⁷ Yaa kopadicianba n den bugi ku ŋantaadikpaku den se u kpenkuomu siiga ke Isidayeli yaaba kuli do Jurden taakuoma. Bi den se lienni hali bi niba kuli n ban do ki gbeni.