Josue 24 - U TIENU MAAMA TILI 2013

Isidayeli yaaba togida tiadima

¹ Josue den taani Isidayeli yaaba buoli kuli Sikemi dogu nni. O den yini a nikpela, bi yudanba, bi bujiaba leni bi koanbala. Bi den cua U Tienu nintuali.

² Josue den yedi bi niba kuli: «O Diedo, Isidayeli Tienu yedi: ‹Hali yogu, yi yaajanba, lani n tie Abalahama leni Nahori baa Tera diegu yaaba, den kaa u kpenciamu Efrati duoli, ki ŋua tientoe.

³ Mini U Tienu den ñani yi yaaja Abalahama Efrati duoli, ki teni ke o gaani Kana diema nni kuli. N den puni o i puoliŋuani boncianla. N den puni o Isaaka,

⁴ ki puni Isaaka mo Jakob leni Esayu. N den puni Esayu yaa diema n pia a juana, ki yi Seyiiri, ke o diedi ma ki kali lienni. Ama Jakob leni o bijaba wani den gedi Ejipiti po.

⁵ N den ti soani Musa leni Alono, ki luni Ejipiti yaaba fala buoli boncianla, ki yuandi ki ñani yi buolu likani.

⁶ Yi yaajanba n den ñani Ejipiti nni, ki ban pundi mi ñincianma kani, Ejipiti yaaba den fii leni bi tandanba leni bi toateliti, ki ŋoadi hali ki ban pundi mi Ñincianmoanma kani.

⁷ Lanwani, yi yaajanba den mua ki mia mini o Diedo, ke n den teni ke li biigili tieni yi buolu leni Ejipiti yaaba siiga. N den teni ke mi ñincianma guani ki milini ba. Yi laa min den soani Ejipiti yaaba maama. Li yaa puoli, yi buolu den waagi ki ye mi fanpienma nni.

⁸ Lani n pendi, n den gobidi ki gedini yi Amori diema nni, yaaba n den kaa Jurden duoli. Bi den tuogi leni yi bu toabu, ama n den teni ke yi paadi ba. Yi den diedi bi diema kelima n den bolini ba yi po.

⁹ Moabi diema bado Balaki Tisipori bijua moko den fii ki tuogi leni yi bu toabu. O den soani ke bi ban yini Beori bijua Balaam ke wan cua ki soli yi.

¹⁰ Ama mii den bua ki cengi Balaam. Lanwani, o den gaali yi. Yeni, n den faabi yi Balaki nuu nni.

¹¹ Yi den duodi Jurden, ki ban pundi Jeriko, Jeriko yaaba den tuogi leni yi bu toabu. Amori, Perisiti, Kanana, Hititi, Giligasi, Hiviti leni Jebusi yaaba moko den tuogi leni yi bu toabu. N den teni ke yi paadi bikuli.

¹² N den teni ke a naalonlonbiada kua yi liiga, ki deli Amori yaaba badiliediba. Yin den paadi ba yeni, laa den ŋua yi jugisiemu leni yi dabana ka.

¹³ Lani n den puni yi yin ki laa fala yaa diema po. N den puni yi yin ki maa yaa dogi, ki teni ke yi ye i niinni. N go den puni yi yin ki ŋuu yaa duven tiidi leni yaa olivie tiidi, ke yi bonluonkaala tie yi po jiema.› »

Isidayeli gandi U Tienu ŋoadima

¹⁴ Lanwani, Josue go den yedi ba: «Moala yin fangi o Diedo, ki yaa ŋua o leni payenli leni yaa yantiali n ki pia janbi. Yin ñani yi siiga yi yaajanba n den ŋua yaa tieni Efrati kpenciamu duoli po leni Ejipiti po, ki yaa ŋua Li Miali Diedo.

¹⁵ Dinla, yi yaa bua ki yaa ŋua Li Miali Diedo, yin gandi yin bua ki yaa ŋua yua, li yaa tie yi yaajanba n den ŋua yaa tieni Efrati duoli po yo, bi li yaa ko tie Amori yaaba, yin ye yaaba yaa diema nni, n ŋua yaa buli yo. Mini leni n diegu yaaba wani, ti baa yaa ŋua Li Miali Diedo yo.»

¹⁶ Isidayeli yaaba den guani ki yedi: «U Tienu n luoni ti po tin ŋaa Li Miali Diedo yaa ŋoadima, ki ŋoadi bontoala,

¹⁷ kelima o Diedo ti Tienu n den ñani ti ti yonbidi nni Ejipiti diema nni, tinba leni ti yaajanba. Wani n den kubi ti ti sancenli kuli nni leni tin den poandi yaa nibuoli kuli siiga.

¹⁸ Li Miali Diedo den deli ti po i nibuoli kuli leni Amori yaaba, yaaba n den kpa ye mi naa diema nni. Lani yaa po, timoko baa yaa ŋua wani Li Miali Diedo yo, kelima wani n tie ti Tienu.»

¹⁹ Ama Josue den yedi Isidayeli yaaba: «Yi kan fidi ki yaa ŋua Li Miali Diedo, kelima o tie U Tienu, ki gagidi ki ŋani cain, ki go pia li nunponli mo. O kan tieni yi po sugili yi yiema leni yi tuonbiadi kuli po.

²⁰ Yi yaa lebidi ki ŋaa Li Miali Diedo ki ŋoadi bi nilanba tieni, o baa fii ki sedi yi po, ki tieni yi yaala n bia, ki bolini yi, ba ke o den kpa tieni yi po yaala n ŋani.»

²¹ Bi niba kuli den yedi Josue: «Li kan tua yeni, kelima ti baa yaa ŋua Li Miali Diedo lige.»

²² Lane Josue den yedi ba: «Yi tie yi yula po siedi, ke yinba yi ba n gandi ke yi baa yaa ŋua Li Miali Diedo.» Bi den guani ki yedi o: «Yeni de! Ti tie siedinba!»

²³ O go den yedi ba: «Lanwani, yin ñani bi nilanba buli yii n ye yi siiga, ki ŋanbi ki tabini Li Miali Diedo, Isidayeli Tienu leni yi pala kuli.»

²⁴ Bi niba kuli den yedi Josue: «Ti baa yaa ŋua Li Miali Diedo ti Tienu, ti baa tuo ki yaa tiendi wan yedi yaala.»

²⁵ Landaali Josue den kuani o ŋantaado U Tienu leni Isidayeli yaaba siiga, ki go ŋaa bi po a ñoamabona leni mi mabilikaama Sikemi.

²⁶ Josue den diani laa maama kuli U Tienu bali maama tili nni. O den taa ku tanciangu ki sieni bu ticianbu tinga, yaa kaanu n gagidi o Diedo po kani.

²⁷ Lani, Josue den yedi ku niligu kuli: «Diidi ki le mani, ku tanciangu ne baa yaa tie ti po siedi, kelima ku gbadi o Diedo n maadi ti yaa maama kuli. Lani yaa po, ku baa yaa tie yaa siedi n se ki yie yi po, ke yin da buli yi Tienu ki nunga, ki ŋoadi bontoala.»

²⁸ Li yaa puoli, Josue den cabi ku niligu ke yuakuli lebidi ki kuni wan den baa yaa diema nni.

Josue kuuma

²⁹ Li yaa puoli, Nun bijua Josue, o Diedo naacemo den kpe ki pia kobiga n bina piiga.

³⁰ Bi den piini o wan den baa yaa diema yaa niinni, Timinati-Selaki dogu nni, Efrayimi juana nni, Gaasi juali jienu po.

³¹ Josue miali dana nni kuli, Isidayeli yaaba den ŋua o Diedo. Isidayeli yaaba go den baa ki ŋua o Diedo, Josue n den kpe ki ŋaa yaa nikpela, ke bi laa o Diedo ŋanbili Isidayeli yaa po moko, yaa miali dana nni kuli.

³² Isidayeli yaaba den piini Sikemi dogu nni ban den ñani Josefi kpaba ya Ejipiti nni. Bi den piini a lankani, Jakob n den daa yaa tinga Sikemi baa Hamori yaabila kani, ki pani yaa ligi n yi kesita bonba piiga. Laa tinga den tua Josefi buolu yaaba yaa tinga.

³³ Alono bijua Eleasari moko den kpe ke bi piini o Gibeya nni, ban den puni o bijua Finea yaa dogu, ke u ye Efrayimi juana nni.