Josue 23 - U TIENU MAAMA TILI 2013

Josue tundijuodike Isidayeli yaaba po

¹ O Diedo den gaa Isidayeli yaaba, yaa yibalinba n den lindi ba kuli kani, ki teni ke bi fuodi ke li waagi. Josue den podi boncianla.

² Lanwani, Josue den yini ki taani Isidayeli yaaba kuli, a nikpela, bi buoli yudanba, bi bujiaba leni bi koanbala, ki yedi ba: «N podi hali boncianla.

³ Yi laa o Diedo yi Tienu n soani mi diema ne niba maama kelima yi po, kelima wani o ba n den koani yi po.

⁴ Diidi mani, n toani tiatia ki boagidi ki teni yi buoli yaa nibuoli n sieni ke ti daa paadi yi yaa diema leni min den kpa bolini yaa nibuoli kuli diema, ki cili Jurden, ki yaa caa hali mi ñincianma Mediterane, nintuali po.

⁵ O Diedo yi Tienu baa deli ba yi po, ki teni bi yaa laa yi ban sani. Yi baa diedi bi diema nani wan den niani yi maama.

⁶ Moandi mani ki tuo ki yaa ŋua yaala n diani Musa bali maama tili nni kuli, ki yaa tiendi man yedi yaala. Yin da jadi ganu bi jienu ki ŋaa ma.

⁷ Yin da taani leni yaa nibuoli n sieni, ki ye yi siiga ne. Yin da taa bi tieni yela, yin da taa bi yela ki poli mo, yin da ŋoadi yi, yin da gbaani ki kpiagi yi.

⁸ Ama yin yaa taabi Li Miali Diedo yi Tienu, nani yin tieni maama ki pundi hali dinla.

⁹ O Diedo deli yi po yaa nibuoli n yabi, ki go pia u fidu boncianla, hali moala niloba kuli ki fidi ki tuogi leni yi ke li gedi kaanu.

¹⁰ Yi siiga niyendo yen deli niba tudili, kelima o Diedo yi Tienu den koani yi po, nani wan den yedi yi maama.

¹¹ Lanwani, fangi mani yi yula, ki yaa bua o Diedo yi Tienu.

¹² Yi yaa buli o ki nunga, ki taani leni yaa nibuoli n sieni ki ye yi siiga, li puotaali yaa kali yinba leni bani siiga, yi yaa pia i ŋantaadi leni ba,

¹³ yin bandi cain ke o Diedo yi Tienu kan go deli laa nibuoli yi po. Ama bi baa yaa tie yi po nani ku diagu leni u taalu yeni, bi baa waani yi fala nani i fibi n baa yaa pua yi puolisiiga, bi nani i konkoni n baa yaa ye yi nuni nni maama yeni. Li baa yaa ŋua yeni, hali ke yi siiga oba kan sieni o Diedo yi Tienu n puni yi yaa dieŋanma ne niinni. Yeni mo, yikuli baa bodi.

¹⁴ Diidi ki le mani, moala n dana tuoni. Yin bandi leni yi pala kuli leni yi yantiana kuli, ke o Diedo yi Tienu n den niani yi yaa ñoanianŋami kuli, ba yendu ki tua fanma, laa ñoaniani kuli kua cain.

¹⁵ To, nani o Diedo yi Tienu n den niani yi yaa ñoanianŋami kuli n kua maama, wan maadi yi po yaa mabiadima kuli moko baa tieni yene. O baa bolini yi cain, yi siiga oba kan sieni wan puni yi yaa dieŋanma ne niinni.

¹⁶ Yi yaa miidi Li Miali Diedo yi Tienu n bili yi po yaa kuali, yi yaa ŋoadi tientoe ki gbaani ki kpiagi yi, o Diedo pali baa fii yi po, yin bodi tontoni, hali yaala ke yi siiga oba kan sieni wan puni yi yaa dieŋanma ne niinni.»