Josue 22 - U TIENU MAAMA TILI 2013

Josue juodima leni o kuuma 22—24 Josue cabi Jurden boanduoli yaaba

¹ Lanwani, Josue den yini Rubeni buolu, Gadi buolu leni Manase buolu boagidima

² ki yedi ba: «Yi tuo ki ŋoadi o Diedo naacemo Musa n den bili yi po yaa ñoamabona kuli, ki go tieni nmo n yedi yi yaala kuli.

³ Lan waagi ki pundi hali yaa bianu ne kuli, ke yii ŋaa yi lieba yeni n doagidi, ke yi tuo ki kubi o Diedo yi Tienu ñoamabona.

⁴ Moala, o Diedo yi Tienu puni yi lieba ke bi baa ki kali bi diema nni, nani wan den niani ba maama. Lanwani, yi ji baa fidi ki lebidi ki guani yi denpo. Yin guani ki ban kali o Diedo naacemo Musa n den boagidi ki teni yi yaa diema, Jurden puoli po.

⁵ Moandi mani ki tuo ki yaa ŋua o Diedo naacemo Musa n den soagini yi yaa bali maama. Lani n tie yin yaa bua o Diedo yi Tienu, ki tuo ki yaa tiendi wan bua yaala, ki yaa kubi o ñoamabona, ki yaa taabi o, ki tuuni o po leni yi pala kuli leni yi yantiana kuli.»

⁶ Li yaa puoli, Josue den gaali ba, ki cabi ba

^7-8 ki yedi: «Yin taa mani yin baa yaa piacianma: I yankuli, ŋanjilifa, wula, ti kumoandi, ti kuboandi leni ti tiayiekaadi kuli boncianla ki kuni. Yin ban boagidi leni yi lieba laa fagidi, yin fie yaadi yi yibalinba kani.» Musa den teni Manase buolu yaaba boagidima ki tinga, Basan nni, Jurden puoli po. Josue den teni mi boagidiliema mo ki tinga, Jurden kpenu nintuali, nani wan den teni yaa buoli n sieni maama.

⁹ Rubeni buolu, Gadi buolu leni Manase buolu yaaba den lebidi ki kuni bi denpo. Bi den ŋaa Isidayeli yaaba, yaaba n sieni Silo, Kanana diema nni. Bi den guani Galaadi diema nni, ban den baa yaama nani o Diedo n den puogi Musa maama.

Jurden boanduoli padibinbinli

¹⁰ Rubeni buolu, Gadi buolu leni Manase buolu boagidima n den pundi Jurden kpenu kani, ki da ye Kanana diema nni, bi den maa yaa padibinbinli n yabi boncianla, ki kuu u kpenu.

¹¹ Isidayeli yaaba kuli den gbadi ke bi niba tua: «Diidi, Rubeni buolu yaaba, Gadi buolu leni Manase buolu yaaba boagidima maa li padibinbinli Jurden kani, ki goa Isidayeli yaaba po, Kanana diema nni.»

¹² Isidayeli yaaba n den gbadi laa laabaalo, bikuli den taani Silo kani, ki baa gedi ki ban baa ba.

¹³ Isidayeli yaaba den soani o kopadiciamo Eleasari bijua Finea Galaadi diema nni, ke wan ban maadi leni ba.

¹⁴ Bi den teni ke yudanba piiga, buolu kuli yudanyendo yegi leni o. Bikuli den tie diedanbe Isidayeli yaaba siiga.

¹⁵ Bi den gedi Rubeni buolu, Gadi buolu leni Manase buolu yaaba boagidima kani, Galaadi diema nni, ki caa ba Isidayeli yaaba, yaaba n sieni tondu ki yedi:

¹⁶ «Yin tieni yaa tudibiadima Isidayeli Tienu po ne mo bua ki yedi be? Be yaa po ke moala yi yaadi ki ŋaa o Diedo, ki maa yi padibinbinli, ki fiini o Diedo po mi yiema?

¹⁷ Peori po, ti den kpa tieni ti tuonbiadi yaadi yaa panpaani n baa ki jagi ti po, ba ke o Diedo den teni ke lanyogunu o falabiado jiidi o niba po. Lani, daa dagidi?

¹⁸ Ña yi didi go yaadi ki ŋaa o Diedo yo? Yi yaa fiini o Diedo po mi yiema dinla, saala o pabienli baa jiidi Isidayeli yaaba kuli yula po yo.

¹⁹ Yi yaa nua ke yi diema joagini, kaa dagidi o Diedo po, yin guani ki kua wan die yaa diema nni, o yekaanu n ye naani. Yin guani ki kua ki baa mu tinmu ti siiga. Ama yin da fiini yiema o Diedo po leni tinba yaa po, ki kandi ki ŋaa o Diedo ti Tienu padibinbinli, ki go maa bontoali.

²⁰ Sela puoliŋuanu Akan n den tudi tudibiadima U Tienu n den kuani ba yaa kuali, ki yedi ke ban da taa wan yedi ban bolini yaala yeni niinni, o Diedo pabienli ki den cuo Isidayeli yaaba kuli ka te? Wani Akan bebe ka den bodi o tudima yeni po.»

²¹ Rubeni buolu yaaba, Gadi buolu leni Manase buolu boagidima den guani ki yedi Isidayeli buolu yaaba, yaaba n sieni yudanba yeni:

²² «Ŋain! U Tienu, U Tienu, Li Miali Diedo U Tienu, U Tienu, wani Li Miali Diedo wani, bani yaala yaa po ke ti tieni yeni. Isidayeli yaaba kuli moko baa bandi la. Li yaa tie ke ti fiini yieme, bi ke ti tieni tudibiadime o Diedo po, wan da cedi tin yaa ye.

²³ Li yaa tie ke ti maa ti padibinbinceli, ki bua ki buli o Diedo ki nunga, ki yaa padi li po a padijuukaana, bi ki yaa kpendinni bu paabu U Tienu po, bi ki yaa padi i jaandi yaa pada, o Diedo wani o ba n cuo ti u cuonbiadu.

²⁴ Laa tie yeni ka ba! Ama ti tieni yeni, kelima ti jie saala po, yi yaabila n da ti yedi ti yaabila: ‹Be yaa ŋantaado n ye yinba leni o Diedo, Isidayeli Tienu siiga?

²⁵ O Diedo wani o ba poani Jurden, ke u tie u bianu tinba leni yinba Rubeni buolu yaaba, Gadi buolu yaaba siiga, yii pia ŋantaadoba kuli leni o Diedo.› To, yeni mo, yi yaabila baa teni ke ti yaabila kan go yaa kpiagidi o Diedo.

²⁶ Lani yaa po yo, ke ti jagi ki maa li naa padibinbinli. Ama laa tie ke ti baa yaa padi li po a padijuukaana, bi paditoana ka.

²⁷ Tin bua yaala bebe n tie ke li naa padibinbinli n tua siedi tinba leni yinba, ti yaabila leni yi yaabila kuli, tin yaa pia u sanu ki kpiagi o Diedo leni ti padijuukaana, sugili pada leni i jaandi yaa pada. Yeni, yi yaabila kan fidi ki yedi ti yaabila ke baa pia ŋantaadoba leni o Diedo.

²⁸ Ti yedi ti yama nni ke bi yaa ti faa ki maadi tinba, bi ti yaabila laa maama, ti baa fidi ki guani ki yedi ba: ‹Diidi mani ti yaajanba n den maa yaa padibinbinli n tie ne, ki nandi li leni o Diedo padibinbinli. Die baa den maa li ki baa yaa padi li po padijuukaana, bi paditoana ka, ama ke lin yaa tie siedi tinba leni yinba siiga.›

²⁹ Lanwani, tii tia ke ti baa fiini yiema o Diedo po, bi ki buli o ki nunga, ki maa padibinbinli ki yaa padi li po a padijuukaana, bi ki yaa kpendinni likani bu paabu, bi ki yaa padi paditoana ka. Tii bua ki padi poto, kaa tie o Diedo padibinbinli yaali n ye o yekaanu nintuali.»

³⁰ O kopadiciamo Finea leni Isidayeli yaaba yudanba leni bi diedanba n den gbadi Rubeni buolu yaaba, Gadi buolu leni Manase buolu yaaba n yedi yaala, bi pala den mangi.

³¹ O kopadiciamo Eleasari bijua Finea den yedi ba: «Moala, ti bandi ke o Diedo ye leni ti, kelima yii tudi o po nani tin bi tama ke yi tudi yaa tudibiadima. Lanwani, yi kan kuani Isidayeli yaaba o Diedo cuonbiadu nni.»

³² Li yaa puoli, o kopadiciamo Eleasari bijua Finea leni Isidayeli yaaba yudanba den cabi Rubeni buolu yaaba leni Gadi buolu yaaba, ki lebidi. Bi den ñani Galaadi diema nni, ki guani Kanana diema nni, ki togidi Isidayeli yaaba, yaaba n sieni, ban ban laa bine ke bi yedi yaala.

³³ Bimoko yaa pala den mangi. Bi den tuondi U Tienu. Baa go den maadi ke bi baa gedi ki ban baa Rubeni buolu yaaba leni Gadi buolu yaaba, ki bolini bi diema.

³⁴ Rubeni buolu yaaba leni Gadi buolu yaaba den yedi: «Li naa padibinbinli tie ti po siedi, ke Li Miali Diedo tie U Tienu.» Lanwani, bi den yini li “Siedi.”