Josue 21 - U TIENU MAAMA TILI 2013

Levi buolu n baa yaa dogi

¹ Levi buolu yaaba yudanba den cua ki laa o kopadiciamo Eleasari, Nun bijua Josue leni Isidayeli yaaba yudanba.

² Li den sua ke bi ye Silo, Kanana diema nni. Bi den yedi ba: «O Diedo den teni Musa li ñoamabonli, ke ban teni ti i dogi tin baa yaa ye naani leni laa dogi gaanma ti yandi n baa yaa kpaa naani.»

³ Lanwani, Isidayeli yaaba den baa ban gandi bi diema nni yaa dogi leni i gaanma, ki teni Levi buolu yaaba nani o Diedo n den yedi maama.

⁴ Bi den toani tiatia ke Levi bijua Kehati puoliŋuani baa u biinkpialu. Bi go den toani tiatia ke bi siiga o kopadiciamo Alono yaabila baa piiga n dogitaa ke i ye Juda buolu, Simeon buolu leni Benjamen buolu diema nni.

⁵ Kehati puoliŋuani yaaba n sieni den baa dogi piiga, ke i ye Efrayimi buolu diema nni, Dan buolu diema nni leni Manase buolu boagidima yaaba n ye Jurden nintuali po diema nni.

⁶ Bi go den toani tiatia ke Gersoni puoliŋuani mo baa piiga n dogitaa Isakari buolu diema nni, Aseri buolu diema nni, Nefitali buolu diema nni leni Manase buolu boagidima yaaba n kaa Basan diema nni.

⁷ Merari puoliŋuani den baa piiga n dogilie ke yi ye Rubeni buolu diema nni, Gadi buolu diema nni leni Sabuloni buolu diema nni.

⁸ Isidayeli yaaba den toani tiatia ki teni teni Levi buolu yaaba laa dogi leni i gaanma, nani o Diedo n den yedi Musa maama.

⁹ Diidi ban den toani tiatia ki teni ba Juda buolu diema nni leni Simeon buolu diema nni yaa dogi.

¹⁰ Levi bijua Kehati puoliŋuani, Alono yaabila, n den gaa laa dogi, kelima bani n den baa u biinkpialu.

¹¹ Bi den teni ba Kiriyati-Arba dogu, yuu n tie Anaki baa Arba dogu. Bi go yi laa dogu yo Hebiron. U den ye Juda buolu yaaba juali nni. Bi den teni ba laa dogu leni u gaanma.

¹² Ama li den sua ke bi teni Yefune bijua Kalebi u dogu yeni n den die yaa kuani leni yaa dobila wani.

¹³ Hebiron yeni den tie i wuonkaani dogi yeni niinni, doyendu. O kopadiciamo Alono yaabila n den baa yaa dogi ki pugidi laa dogu po den tie Libina,

¹⁴ Yatiri, Esitemoa,

¹⁵ Holon, Debiri,

¹⁶ Ayini, Yuta leni Beti-Semesi. Likuli den taani ki tie dogiyia leni i gaanma, ki ye Juda leni Simeon buolu diema nni.

¹⁷ Benjamen buolu diema nni mo, bi den baa Gabaon, Geba,

¹⁸ Anatoti leni Alimoni. Likuli tie doginaa leni i gaanma.

¹⁹ Bi kopadicianba, Alono yaabila yeni n den baa yaa dogi kuli den taani ki tie piiga n dogitaa leni i gaanma.

²⁰ Ban go den toani tiatia, Kehati puoliŋuani yaaba, yaaba n sieni den baa Efrayimi buolu diema nni yaa dogi n tie ne:

²¹ Sikemi, yuu n den tie wuonkaanu ki ye li juali nni, Geseeri,

²² Kibitisayim leni Beti-Horoni. Likuli den tie doginaa leni i gaanma.

²³ Dan buolu diema nni, bi go den baa doginaa leni i gaanma: Eliteke, Gibetoni,

²⁴ Ayaloni, Gati-Rimoni leni li gaanma.

²⁵ Manase buolu yaaba boagidima yaaba n den kaa nintuali po yaa diema nni mo, bi den baa dogilie leni i gaanma: Taanaki leni Ibileam.

²⁶ Lanwani, ban den baa yaa dogi kuli den taani ki tie dogi piiga leni i gaanma.

²⁷ Levi bijua Gersoni yaa puoliŋuani den baa dogilie leni i gaanma Manase buolu yaaba boagidima, yaaba n den kaa puoli po yaa diema nni. Lani n tie Basan nni, Golan dogu yuu n den tie i wuonkaani dogi yeni niinni doyendu leni Beesitera dogu.

²⁸ Isakari buolu diema nni, bi den baa doginaa leni i gaanma: Kisiyon, Dabirati,

²⁹ Yarimuti leni Eni-Ganim.

³⁰ Aseri buolu diema nni, bi go den baa doginaa leni i gaanma: Miseyali, Abidon,

³¹ Helikati leni Rehobi.

³² Nefitali buolu diema nni mo, bi den baa dogitaa leni i gaanma. Lani n tie Kadesi, yuu n den tie i wuonkaani dogi siiga doyendu, ki ye Galile nni, Hamoti-Dori leni Kartan.

³³ Bani Gersoni puoliŋuani yeni n den baa yaa dogi kuli den taani ki tie piiga n dogitaa leni i gaanma.

³⁴ Levi buolu yaaba, yaaba n den sieni ki tie Merari puoliŋuani den baa doginaa leni i gaanma, Sabuloni buolu diema nni. Lani n tie Yokineami, Karta,

³⁵ Dimina leni Nahalali.

³⁶ Rubeni buolu diema nni, bi den baa doginaa leni i gaanma. Lani n tie Betiseri, Yaatisa,

³⁷ Kedemoti leni Mefaati.

³⁸ Gadi buolu diema nni mo, bi den baa doginaa leni i gaanma. Lani n tie Ramoti dogu, ki ye Galaadi nni ki tie i wuonkaani dogi siiga doyendu, Mahanayimi, Hesibon,

³⁹ leni Yaseri.

⁴⁰ Ban den toani tiatia, Levi buolu yaaba, yaaba n den tie Merari puoliŋuani, n den baa yaa dogi kuli den tie piiga n dogilie.

⁴¹ Levi buolu yaaba n den baa Isidayeli yaaba diema nni yaa dogi kuli den taani ki tie piinaa n doginii.

⁴² Bi den teni ba dogu kuli leni u gaanma.

⁴³ O Diedo den teni Isidayeli yaaba wan den niani ke o baa pa bi yaajanba yaa diema kuli. Bi den diedi ma, ki kali mi niinni.

⁴⁴ O Diedo den puni ba mi yanduanma bi diema gaanma kuli nni, nani wan den niani bi yaajanba maama. O den teni ke bi paadi bi yibalinba kuli, bi siiga oba kuli ki den fidi ki tuogi leni ba ke li gedi kaanu.

⁴⁵ Yeni, o Diedo n den niani Isidayeli yaaba yaa ñoaniani kuli den kua. Ba yendu ki den tua fanma.