Josue 20 - U TIENU MAAMA TILI 2013

U wuonkaanu dogi

¹ O Diedo den yedi Josue:

² «Ŋan waani Isidayeli yaaba, ke ban gandi yaa dogi n baa yaa tie i wuonkaani, nani min den waani Musa maama.

³ Nilo yaa kpa o lielo ke li tie jalibu, o baa fidi ki sani ki ban wuoni laa dogi siiga doyendu nni, ki faabi leni yua n baa tuu o kpiemo po li panli.

⁴ Yua n kpa o nilo yeni yaa ban pundi u dogu yeni buliñoabu kani, ban ja ti buudi naankani, o baa sedi ki togidi likani nikpela yaala n tieni. Bani mo baa cedi wan kua u dogu nni, ban baa kaanu ki teni wan yaa ye.

⁵ Yua n baa tuu li panli yeni yaa ŋoadi o hali u dogu yeni kani, a nikpela yeni kan ñani yua n kpa o nilo yeni ki teni o, kelima waa bua ka ki kpa o, laa tie ke o bi nani o ka.

⁶ O baa yaa ye u dogu yeni niinni, hali likani nitaanli yaa jia o buudi leni hali yua n tie bi kopadicianba bado yeni yaa kpe. Li yaa puoli, o baa fidi ki guani ki kuni o denpo, wan den ñani yaa dogu nni ki sani yeni.»

⁷ Isidayeli yaaba den gandi Kadesi dogu yuu n ye Galile nni, Nefitali juali nni, Sikemi dogu yuu n ye Efrayimi juali nni, Kiriyati-Arba dogu, yaa ka Hebiron yuu n ye Juda juali nni.

⁸ Jurden boanduoli, Jeriko puoli po mo, bi den gandi Betiseri yuu n ye mi fanpienma nni, Rubeni buolu diema nni, ki go gandi Ramoti yuu n ye Galaadi nni, Gadi buolu diema nni leni Golan dogu yuu n ye Basan nni, Manase buolu diema nni.

⁹ Lani n tie ban den gandi yaa dogi ke yin tua i wuonkaani Isidayeli yaaba leni yaa nilanba n ye bi siiga po. Yeni, yua n kpa nilo kaa bua, baa sani ki kua lienni ki cia yua n baa tuu li panli, ban da kpa o ke li nitaanli daa jia o buudi.