Josue 2 - U TIENU MAAMA TILI 2013

Josue soani nibilie ke ban ban goandi Jeriko

¹ Isidayeli yaaba n den ye Sitimi dogu nni, Nun bijua Josue den fiini bi siiga nibilie. O den soani ba ŋasiili nni, ban duodi ki ban goandi mi diema, ki diidi Jeriko dogu bonŋanla. Bi den fii ki gedi ki ban pundi ki kua yaa puokpagili n yi Rahabi diegu nni, ki duani.

² Jeriko bado den gbadi ke Isidayeli yaaba siiga, bi niba cua u dogu nni ku ñiagu ki baa goandi ki bandi mi diema.

³ O den soani Rahabi kani ki yedi o: «Ŋan ñani yaa jaba n cua ki kua a diegu nni yeni, kelima bi cua ki bua ki goandi ki bandi mi diema kule.»

⁴ Rahabi den taa bi jaliediba yeni, ki wuoni ba. O den yedi o bado tonda: «Moamoane ke bi jaba cua n kani. Ama mii bi bani ban ñani naani.

⁵ Lan bi bii, bi bi ñani hali ke bi daa luoni u dogu bilinciamu buliñoabu. Mii bani ban gedi naani. Yi yaa jaligi, yi baa nandi ba.»

⁶ Ama o den duoni ba o doangu po, ki wuoni ba ban jia ki maani yaa baligi buolu n yi len yaa niinni.

⁷ O bado tonda n den ñani u dogu nni yaa yogunu, bi den luoni u dogu bilinciamu buliñoabu. Bi den tagini yaa sanu n caa Jurden po, ki lingi Isidayeli jaliediba yeni.

Josue tonda leni Rahabi niani biyaba i ñoaniani

⁸ Rahabi den doni o doangu tanpoli bi jaliediba yeni kani, hali ke bi daa duani,

⁹ ki yedi ba: «N bani ke Li Miali Diedo puni yi ti diema ne, ti jawaandi cuo ti boncianla kelima yi po. Mi diema niba kuli tugusoama sani ke bi jigi cie, kelima yi po.

¹⁰ Ti gbadi ke yin ñani Ejipiti nni, o Diedo den teni ke mi Ñincianmoanma ñima ñuudi, ke yin baa ki tagini. Ti go gbadi yin soani Sihoni leni Ogi yaa tuona, bani Amori yaaba, yaaba n ye Jurden boanduoli badiliediba. Ti gbadi yin kpa ba, ki bolini bi bonpiakaala kuli maama.

¹¹ Tin gbadi lani kuli, li wudi ti gbani boncianla, hali ke ti papaali bodi kelima yi po, kelima Li Miali Diedo yi Tienu n tie U Tienu, ki die tanpoli leni tinga kuli.

¹² Moala, n mia yi, yin taa o Diedo yeli ki poli ke yi baa ŋanbi n baadiegu po, nani min ŋanbi yi po maama.

¹³ Yin pa nni yaa sinankeene n baa doagidi ke yi baa cedi n baa leni n naa, n naataanjaba, n naataanpola leni bi yaa niba kuli, ke yi baa faabi ti, tin da kpe.»

¹⁴ Bi jaliediba yeni den guani ki yedi Rahabi: «Li yaa tie ba kuuma, ti baa kpe kelima yi po, li yaa tie yi kubi kaa doagidi tin cua yaala. O Diedo yaa puni ti mi diema, ti baa gbadi a po mi ninñima nani tin niani a maama.»

¹⁵ Nani o pua yeni diegu n den jagi u dogu bilinciamu yuli po yeni, o den jiini ba li bonli kani leni u baabu u dogu puoli po.

¹⁶ O den yedi: «Yin cubini mani a juana po, ke yaaba n lingi yi n da ti kadi leni yi. Lanwani, yin wuoni mani lankani hali danataa, hali yaaba n lingi yi yeni n guani ki kpeni no, yin taa yi sanu.»

¹⁷ Bi jaba yeni den yedi o: «Diidi tin baa kubi ti poli maama nne:

¹⁸ Ti yaa kua mi diema nni, ŋan loli yaa gaalimoanu n tie ne, ŋan jiini ti yaa bonli kani ne. Ŋan kuani a baa leni a naa, a naataanjaba, a naataanpola leni a baadiegu yaaba kuli, a diegu nni.

¹⁹ Bi siiga nni, niloba yaa ñani a diegu nni, o soama baa jiidi o yuli po, o tagili ki ŋua tinba. Ama ti siiga nni, nilo yaa maani o nuu yua n taa ki ye leni a a diegu nni kuli po, ki kpa o, o soama baa yaa ye ti yaa yula po yo.

²⁰ Die a yaa doagidi ki waani tin cua yaala, ti poli ki go luo ti.»

²¹ O pua den guani ki yedi ba: «Lan tieni nani yin maadi maama.» Lanwani, o den cabi ba ke bi kuni. O den loli u gaalimoanu li bonli kani.

²² Bi den gedi a juana po ki ban wuoni likani hali danataa, hali yaaba n den ŋoadi ki bua ki cuo ba n ban lebidi ki kuni. Bani yaaba n den ŋoadi ki bua ki cuo ba den lingi lingi ba u sanu nni, ama baa den laa ba.

²³ Lanwani, bi jaliediba yeni den guani ki jiidi li juali, ki duodi Jurden ki guani ki gedi Nun bijua Josue kani, ki togidi o yaala n den tieni ba kuli.

²⁴ Bi den yedi Josue: «Laa pia kuli tama, o Diedo puni ti mi diema kuli. Mi diema yaaba kuli tugusoama sani, ke bi gbani wudi kelima ti po.»