Josue 18 - U TIENU MAAMA TILI 2013

Mu tinmu boagidima yaa buoli n sieni po

¹ Isidayeli yaaba n den paadi mi diema, bikuli den taani Silo dogu nni, ki tii likani u Kadikaanu Gbandieli.

² Bi siiga buolilele n den sieni kaa baa tinmu.

³ Lanwani, Josue den yedi ba: «Yi baa guudi hali u laa yogunu ki diedi o Diedo yi baanba Tienu n puni yi yaa diema?

⁴ Yin gandi buolu kuli nni jabitaa. N baa soani ba ban gaani ki goandi mi diema, ki diidi bonŋanla ban bua yaala n tua bi buolu yaaba tinga, ki diani kan tie tie maama, ki guani ki waani nni.

⁵ Bi baa boagidi mi diema kaanilele. Juda buolu baa yaa ye bi diema nni nuganu po, Josefi yaa puoliŋuani mo n yaa ye bi diema nni nujienu po.

⁶ Yin diani i kaanleleedi yeni n tie tie maama, ki bili bili i biani, ki guani ki waani nni. Lani, n baa toa tiatia o Diedo ti Tienu nintuali, ki teni buolu kuli u biinu.

⁷ Levi buolu yaaba kan baa yi siiga biinu, kelima bi yaa biinu tie ban yaa tuuni o Diedo po, ki padi a pada. Gadi buolu, Rubeni buolu leni Manase buolu boagidima mo baa bi yaa biini Jurden boanduoli. O Diedo naacemo Musa wani o ba n den boagidi ki teni ba.»

⁸ Ban den gandi yaa jaba ke ban gedi ki ban goandi mi diema n den bogini ki baa gedi, Josue den teni ba yaa ñoamabonli n tie ne: «Gedi mani ki ban gaani mi diema yeni niinni, ki ŋanbi ki diidi ma bonŋanla, ki guani ki waani nni man tie tie maama. Lanwani, n baa toa tiatia Silo ne o Diedo nintuali, ki boagidi ki teni yuakuli o biinu.»

⁹ Bi jaba yeni den gedi ki ban gaani mi diema kuli nni. Bi den diani ki boagidi ma kaanilele, ki waani kaanu kuli n tie maama leni yaa dogi n ye ye lienni. Li yaa puoli, bi den guani ki cua Silo, Josue kani li nagili nni.

¹⁰ Josue den toani bi po tiatia Silo yeni o Diedo nintuali, ki boagidi mi diema bani Isidayeli yaaba siiga. O den teni buolu kuli u biinu.

Benjamen buolu biinu

¹¹ Ban den toani tiatia, Benjamen buolu yaaba n den kpa gaa bi yaa biinu. Ban den baa yaa diema den ye Juda buolu yaaba diema leni Josefi puoliŋuani diema siiga.

¹² Nujienu po, bi diema bianu den cili Jurden kpenu kani. U den tagini Jeriko dogu jienu po, ki pendi ki poandi a juana nni, ki teli nintuali po, ki ban dagini Beti-Aveni fanpienma.

¹³ U bianu den ñani lankani ki teli Lusi dogu, ki ban cua ki ñani Lusi dogu yuu n go yi Beteli yeni ganu po. U den poandi yaa juali n ye jiidima yaa Beti-Horoni ganu po, ki gedi Atiroti-Adari.

¹⁴ Li juali yeni nintuali po, u bianu den gondi ki teli nuganu po, ki ban tuoni Kiriyati-Baali dogu, yaa ka Kiriyati-Yearim, ki tie Juda buolu dogu. U bianu n den tagini maama nintuali po n yeni.

¹⁵ Nuganu po, u bianu den ñani Kiriyati-Yearim ki pendi ki teli nintuali po, ki ban dagini Nefitoa ñinbuna kani.

¹⁶ U den ñani lankani, ki jiidi ki ban pundi yaa juali n kaagi Hinomi joaloangu, ki ye Refayimi yaaba yaa joaloangu jienu po. U den bali Hinomi joaloangu, Jebusi yaaba juaga ganu po, ki jiidi ki ban pundi hali Eni-Rogeli ñinbunli kani.

¹⁷ U den gondi ki teli jienu po, Eni-Semesi dogu po, ki suagi ki pundi Geliloti ki tiegi Adumim gbangbanli. U den jiidi ki pundi Rubeni bijua Bohan Tanli,

¹⁸ ki poandi Jurden tialu nni, ki tagi yaa juali n ye u tialu yeni niinni jienu po.

¹⁹ U den suagi ki ñani Beti-Hogila dogu jienu po, ki ban dagini mi ñincianyaama n juodi naani nujienu po, Jurden kpenu n cua ki kua lienni naani. U bianu n den tagini maama nuganu po n yeni.

²⁰ Puoli po, Jurden kpenu n den tie u bianu. Lani n tie Benjamen buolu yaaba n den baa yaa diema biani.

²¹ Benjamen buolu yaaba n den die yaa dogi n tie ne: Jeriko, Beti-Hogila, Emeki-Ketisitisi,

²² Beti-Ariba, Tisemalayim, Beteli,

²³ Avim, Para, Ofiri,

²⁴ Kefari-Amona, Ofini leni Geba. Likuli tie piiga n dogilie leni li dobila.

²⁵ Li go den pia Gabaon, Rama, Beeroti,

²⁶ Misipe, Kefira, Mosa,

²⁷ Rekem, Iripeeli, Tarala,

²⁸ Sela, Elefi, Jebusi, lani n tie Jerusalemi, Gibeya leni Kiliyati, piiga n doginaa leni li dobila. Lani n den tie Benjamen buolu biinu.