Josue 17 - U TIENU MAAMA TILI 2013

Manase buolu yaaba boagidima biinu

¹ Bi den toani tiatia ki teni Manase buolu yaaba moko bi yaa biinu, kelima Manase den tie Josefi bijakpelo. Li den sua ke bi teni Manase bijakpelo Makiri, yua n tie Galaadi baa o yaa biinu. O den gaa Galaadi diema leni Basan Jurden boanduoli, kelima o den tie jakoando.

² Bi den toani tiatia ki teni Manase buolu yaaba, yaaba n sieni mo bi yaa biini. Li den tie Josefi bijua Manase bijaba Abieseri, Heleki, Asiriyeli, Sikemi, Heferi leni Semida.

³ Selofadi ki den pia bonjaga. Wani Selofadi yeni den tie Heferi bijua, ke Heferi mo tie Galaadi bijua, Galaadi mo n yaa tie Manase bijua Makiri yaa biga. Waa den pia bonjaga, ama o den pia a bonpola. Bi den yi Mara, Noa, Hogila, Milika leni Tirsa.

⁴ Bi den gedi ki laa o kopadiciamo Eleasari, Nun bijua Josue leni Isidayeli yaaba yudanba ki yedi ba: «O Diedo den waani Musa ke wan boagidi ki teni timo ti yaa biinu ti buolu yaaba siiga.» Bi den teni ba bi yaa biinu bi baa naataanjaba siiga.

⁵ Lanwani, Manase buolu yaaba den baa biinpiiga, kaa taa leni Galaadi leni Basan diema yaama n ye Jurden boanduoli.

⁶ Baa den teni Manase buolu yaaba bi jaba bebe ka mu tinmu, bi den teni bi puoba moko, ke Galaadi diema mo tie Manase buolu yaaba, yaaba n sieni yaa biinu.

⁷ Manase buolu diema banlu den ñani Aseri dogu, ki yaa caa hali Mikimetati dogu, ki ye Sikemi dogu puoli. U den ñani Mikimetati yeni ki teli nuganu, ki ban dagini Eni-Tapuwa dogu yaaba kani.

⁸ Tapuwa dogu den ye Manase buolu diema bianu kani. Bani Manase buolu yaaba n den die u gaanma tinga. Ama Efrayimi n den die u dogu wuni u baa wani.

⁹ U bianu den gedi ki ban tuoni Kana kpenu, nuganu yaa jaali kani. Die yaa dogi n den ye u kpenu ganu po den tie Efrayimi buolu yaaba yaa dogi, ba ke i den ye Manase buolu diema nni. U bianu den ñani lankani, ki gedi u kpenu jienu po, ki pendi ki ban dagini Mediterane mi ñincianma.

¹⁰ Yeni, Efrayimi buolu den die nuganu po, Manase buolu mo n yaa die nujienu po. Mediterane mi ñincianma n den tie bi bianu nintuali po. Aseri buolu den ye Manase buolu jienu, ki kpigi ki goa nintuali po, Isakari buolu mo n yaa ye bi jienu, ki kpigi ki goa puoli po.

¹¹ Isakari leni Aseri buolu diema nni, Manase buolu den baa yaa dogi n tie ne: Beti-Seyani, Ibileam, Dori, Eni-Dori, Taanaki, Megido leni i niba leni li dobila, lani n tie Dodi gaanma tinbuona.

¹² Ama Manase yaaba yeni ki den fidi ki deli laa dogi niba, lanwani bani Kanana buolu yeni den suagi ki ye likani.

¹³ Ba Isidayeli n den ti baa u paalu ki pugini, baa den deli ba, bi den teni ke bi tuuni a tuona leni u paalu.

¹⁴ Josefi puoliŋuani den cua ki yedi Josue: «Be yaa po ke a boagidi ki teni ti biinyendu bebe, tinba yaaba ke o Diedo seligi ti, ki teni ke ti yabi boncianla?»

¹⁵ Josue den yedi ba: «Yi yaa yabi ki sua ke Efrayimi juali kan dagidi yi, yin gedi ki ban pedi Perisiti yaaba leni Refayimi yaaba fuali ki pugini.»

¹⁶ Josefi puoliŋuani den guani ki yedi: «Li tie moamoani ke li juali kan dagidi ti. Ama Kanana buolu yaaba, yaaba n ye i tiali nni, yaaba n ye Beti-Seyani, u dobila nni leni yaaba n ye Yisireyeli joaloangu kuli nni pia ti toateliti ke ti tie kudi.»

¹⁷ Josue den yedi Josefi puoliŋuani, lani n tie Efrayimi leni Manase buoli yeni: «Yi yabi ki go pia u fidu mo boncianla. Lanwani, yi kan baa biinyendu bebe.

¹⁸ Yaa juali n tie fuajali yeni baa tua yi yaa yaala. Yin pedi li ki diedi likani cain. Yi baa fidi ki deli ki ñani Kanana buolu likani, ba ke bi pia yaa toateliti n tie kudi ki go pia u fidu mo.»