Josue 15 - U TIENU MAAMA TILI 2013

Josue n teni Juda buolu yaa diema

¹ Ban den toani tiatia ke Juda buolu yaaba baa yaa diema den tandi nuganu po, ki goa puoli waamu, ki ban dagini Edomi bianu. Hali nuganu cain den tie Tisini fanpienma.

² Lanwani, nuganu po, bi diema bianu den cili mi ñincianyaama juodima kani, mi ñima n lugi ki tinga naankani.

³ U bianu yeni den cua ki ñani Akirabim gbangbanli kani leni Tisini fanpienma ganu po. Kadesi-Barneya ganu po mo, u den cua ki ñani Hetisiloni kani, ki yaa caa Adari dogu, ki ban gondi ki teli Karika.

⁴ U den suagi ki ñani Asimon dogu, ki ban caa hali Ejipiti kpenu, ki ban tuoni mi ñincianma Mediterane. Lani n tie Juda buolu yaaba banlu nuganu po.

⁵ Puoli po mo, bi diema bianu den tie mi ñincianyaama, ki yaa caa ki ban dagini hali Jurden n cua ki kua laa ñima nni naani. Nintuali po mo, u bianu den cili lankani,

⁶ ki taa ki gedi Beti-Hogila dogu, ki ñani Beti-Ariba dogu, ki suagi ki pundi hali Rubeni bijua Bohan Tanli.

⁷ U den poandi Akori joaloangu nni, ki gedi Debiri dogu. Nujienu po, u den gondi ki teli Giligali, Adumim gbangbanli nintuali, u kpenu ganu po. U den bali Eni-Semesi ñima, ki ban pundi hali Eni-Rogeli.

⁸ U den ñani lankani, ki poandi Hinomi joaloangu, Jebusi yaaba juaga jiidima ganu po, Jerusalemi dogu n ye naani. U den tagini ki doni yaa juali n ye Hinomi joaloangu nintuali leni Befayima buolu yaaba yaa joaloangu jienu po.

⁹ U den ñani li juali yeni yuli po, ki gondi ki teli Nefitoa ñinbuna, ki suagi ki gedi Efron juali dogi po, ki pendi ki teli Baala dogu, yaa ka Kiriyati-Yearim.

¹⁰ U banlu den ñani lankani, ki teli nintuali yaa juali Seyiiri jiidima ganu po, Kesalon dogu kani, ki jiidi ki gedi Beti-Semesi, ki ban ña Timina dogu.

¹¹ U den pendi ki teli Ekiron dogu ganu po, ki gondi ki cubini Sikaron dogu. U den ñani Baala juali po, ki teli Yabineeli, ki gedi ki ban dagini Mediterane mi ñincianma.

¹² Nintuali po, bi diema bianu den tie Mediterane. Lani n tie Juda buolu yaaba n den baa yaa diema biani.

¹³ Yefune bijua Kalebi den baa o biinu Juda buolu yaaba siiga, nani o Diedo n den yedi Josue maama. Bi den teni o Kiriyati-Ariba dogu yuu n go tie Hebiron. Ariba yeni tie Anaki baa.

¹⁴ Kalebi den deli ki ñani Anaki buolu yaaba, lani n tie o yaabitaada: Sesayi, Ahimani leni Talimayi puoliŋuani.

¹⁵ O den ñani lankani, ki gedi ki ban baa Debiri dogu yaaba. Debiri den kpa yi Kiriyati-Seferi.

¹⁶ Wani Kalebi den yedi: «Yua n fidi ki paadi Kiriyati-Seferi, n baa pa o n bisalo Akisa wan tua o pua.»

¹⁷ Kalebi waalo Kenasi bijua Otinieli den paadi u dogu yeni, ke Kalebi puni o o bisalo Akisa ke o tua o pua.

¹⁸ Wan den kuni Otinieli, o den tundi wani Otinieli ke wan mia o baa Kalebi u kuanu. Wani Akisa n den pundi o baa kani ki jiidi o ŋunbo po, o baa den buali o wan bua yaala.

¹⁹ O den guani ki yedi o: «N cua miaboe. Pa nni naani n pia a ñinbuna moko, kelima ŋan puni nni yaa tinga nujienu po yeni tie tinkuonge, ñima ki ye.» Lanwani, Kalebi den puni o yaa ñinbuna n ye naanpo n duobi leni naanpo n jiidi.

²⁰ Lani n tie Juda buolu yaaba n den baa yaa diema, ki ŋoadi nani bi diedi n da maama.

²¹ Yaa dogi n den ye Juda buolu diema nni nuganu po, ki goa bani leni Edomi u bianu po den tie yaa dogi n tie ne: Kabiseli, Ederi, Yaguri,

²² Kina, Dimona, Adada,

²³ Kadesi, Hatisori, Itini,

²⁴ Sifi, Telem, Beyaloti,

²⁵ Hatisori-Hadata, Kirioti-Hesiron yuu n go yi Hatisori,

²⁶ Amam, Sem, Molada,

²⁷ Hari-Gada, Hesemon, Beti-Peleti,

²⁸ Hasari-Suali, Beri-Seba leni li dobila,

²⁹ Baala, Iyimi, Esem,

³⁰ Elitoladi, Kesili, Horima,

³¹ Tisikilagi, Madimana, Sansanna,

³² Levayoti, Silihim, Ayini leni Rimon. Likuli taani ki tie piilie n dogiyia leni li dobila.

³³ Yaa dogi n den ye ku joaloangu nni den tie: Esitaoli, Tisoreya, Asina,

³⁴ Sanoa, Eni-Ganim, Tapuwa, Enam,

³⁵ Yarimuti, Adulami, Soko, Aseka,

³⁶ Saarayim, Aditayim, Gedera leni Gederotayim. Likuli tie piiga n doginaa leni li dobila.

³⁷ Li go den pia Senan, Hadasa, Migidali-Gadi,

³⁸ Dileyan, Misipe, Yokiteeli,

³⁹ Lakisi, Botisikati, Egilon,

⁴⁰ Kaboni, Lahemasi, Kitilisi,

⁴¹ Gederoti, Beti-Dagon, Naama leni Makeda. Likuli tie piiga n dogiluoba leni li dobila.

⁴² Li go den pia yaa dogi n tie ne: Libina, Eteri, Asani,

⁴³ Ifita, Asina, Netisibi,

⁴⁴ Keyila, Akisibi leni Maresa. Yini mo dogiyia leni li dobila.

⁴⁵ U tialu yeni niinni go den pia Ekiron leni wun den die yaa dogi leni u dobila,

⁴⁶ leni yaa dociami leni yaa dobila n den lindi Asidodi, ki ye Ekiron leni Mediterane siiga kuli,

⁴⁷ leni Asidodi leni Gasa leni yin den die yaa dociami leni li dobila, ki yaa caa hali Ejipiti kpeni leni Mediterane jaali.

⁴⁸ Yaa dogi n den ye li juali nni den tie Samiri, Yatiri, Soko,

⁴⁹ Danna, Kiriyati-Sanna yuu n go yi Debiri,

⁵⁰ Anabi, Esitemoa, Anim,

⁵¹ Gosen, Holon leni Gilo. Likuli taani ki tie piiga n doyendu leni li dobila.

⁵² Li go den pia Arabi, Duma, Eseyan,

⁵³ Yanum, Beti-Tapuwa, Afeka,

⁵⁴ Humeta, Kiriyati-Ariba, yuu n go yi Hebiron leni Tisiori. Likuli den tie dogiyia leni li dobila.

⁵⁵ Li go den pia Mayona, Karimeli, Sifi, Yuta,

⁵⁶ Yisireyeli, Yokikeam, Sanoa,

⁵⁷ Kayini, Gibeya leni Timina. Likuli tie dogi piiga leni li dobila.

⁵⁸ Li go den pia Haluli, Beti-Suri, Gedori,

⁵⁹ Maarati, Beti-Anoti leni Elitekon. Likuli tie dogiluoba leni li dobila.

⁶⁰ Li go pia Kiriyati-Baali, yuu n go yi Kiriyati-Yearim leni Raba, dogilie leni li dobila.

⁶¹ Yaa dogi n den ye mi fanpienma nni den tie Beti-Ariba, Midin, Sekaka,

⁶² Nibisani, Idi-Hamela leni Eni-Gedi. Likuli tie dogiluoba leni li dobila.

⁶³ Juda buolu yaaba ki den fidi ki deli Jebusi yaaba, yaaba n den ye Jerusalemi. Lanwani, Jebusi yaaba leni Juda buolu yaaba baa ki taa ye Jerusalemi dogu nni hali dinla.