Josue 13 - U TIENU MAAMA TILI 2013

U ñoanianu tinga boagidima 13—21 Isidayeli yaaba n daa paadi yaa diema

¹ Josue den podi boncianla. O Diedo den yedi o: «Moala a podi bonŋanla, ke yaa diema n sieni ke a baa koani ki gaa mo nan da yabi boncianla.

² Diidi yaa diema n sieni: Filisiti yaaba diema leni Gesuri yaama,

³ ki cili Sikoli kpenu yuu n ye Ejipiti banlu, ki yaa caa hali nujienu po, Ekiron dogu bianu kani. Laa diema kuli tie Kanana yaame. Filisiti yaaba badimuudiba yaaba n die likani tie Gasa, Asidodi, Asikalon, Gati leni Ekiron badiba. Bani leni Aviti

⁴ yaaba n die nuganu po. Li tie tiladi ŋan paadi Kanana diema kuli leni Sidon yaaba dogu Meyara, ki yaa caa hali Afeki, Anmoni yaaba bianu.

⁵ Li go tie tiladi ŋan paadi Gebali diema leni puoli po Liban diema kuli, ki cili Baali-Gadi dogu yuu n ye li juali Hermon tinga, ki yaa caa hali Hamati dogu.

⁶ A go baa paadi li juali nni niba kuli, bani Sidon yaaba, ki cili Liban, ki yaa caa hali Misirefoti-Mayim. N baa deli ba Isidayeli yaaba po. Ŋan toa tiatia ki boagidi boagidi Isidayeli yaaba laa diema kuli, nani min waani a maama.

⁷ Isidayeli yaaba buoliyia leni Manase buolu yaaba boagidima da sieni kaa baa biinu. Ŋan boagidi ki teni bani laa diema.»

⁸ Rubeni buolu yaaba, Gadi buolu yaaba leni Manase buolu yaaba boagidima den gaa bi yaa tinmu Jurden boanduoli po. Musa n den boagidi ki teni ba nani o Diedo n den waani o maama.

⁹ Nuganu po, bi diema biani den tie Aroyeeri dogu yuu n ye Arinoni jaali kani leni yaa dogu n ye laa joaloangu siiga. Bi den die Medeba tialu kuli, ki yaa caa hali Divon dogu,

¹⁰ ki taani leni Amori yaaba bado Sihoni dogi kuli. Wani Sihoni den kaa Hesibon, ki die yaa diema n ban pundi hali Anmoni yaaba tinga banlu.

¹¹ Bani Rubeni buolu yaaba, Gadi buolu yaaba leni Manase yaa buolu yaaba boagidima yeni go den die Galaadi yaaba diema, Gesuri, Maaka diema leni Hermon juali, ki taani leni Basan diema kuli, ki ban dagini hali Salika dogu.

¹² O bado Ogi den tie Refayimi buolu yaaba kuli siiga yua bebe n sieni. O den kali Asitaroti leni Edreyi yii n ye Basan diema nni, ki diedi. Omoko yaa diema den taa bi biinu nni. Musa den paadi laa diema badiba kuli, ki deli ba.

¹³ Ama Isidayeli yaaba ki den deli Gesuri leni Maaka yaaba. Bi baa ki ye Isidayeli yaaba siiga hali dinla.

¹⁴ Levi buolu yaaba bebe n den tie yaaba n ki baa biinu. Bi yaa biinu den ña Isidayeli yaaba n den kpendinni yaa padijuukaana o Diedo bi Tienu po yaa niinni, nani wani U Tienu n den niani ba maama.

¹⁵ Musa den boagidi ki teni Rubeni buolu yaaba bi yaa tinmu, ki ŋoadi nani bi diedi n da maama.

¹⁶ Bi diema banlu nuganu po den tie Aroyeeri dogu, ki ye Arinoni jaali kani leni yaa dogu n ye laa joaloangu siiga. Bi den die yaa tialu n lindi Medeba.

¹⁷ Bi go den die Hesibon leni u tialu nni yaa dogi kuli, lani n tie Divon, Bamoti-Baali, Beti-Baali-Meyoni,

¹⁸ Yahasi, Kedemoti, Mefaati,

¹⁹ Kiriyatayim, Sibima leni Sereti-Sahari dogu yuu n ye yaa juali n ye u tialu nni,

²⁰ Beti-Peyori, Pisiga juali jiidima leni Beti-Yesimoti.

²¹ Laa den tie yaa dogi n ye i tiali nni bebe ka, Amori yaaba bado Sihoni yua n den kaa Hesibon moko yaa diema kuli den taa bani Rubeni yaaba biinu nni. Musa den paadi Sihoni leni wan die yaa badiba ke bi ye Madiani diema nni. Lani n tie Evi, Rekem, Suri, Huri leni Reba.

²² Beori bijua Balaam o lingido den tie Isidayeli yaaba n den kpa yaaba siiga yendo.

²³ Nintuali po, Jurden n den tie Rubeni buolu yaaba tinga bianu. Laa dociami leni laa dobila n tie ban den baa yaa biinu, ki ŋoadi nani bi diedi n da maama.

²⁴ Musa den boagidi ki teni Gadi buolu yaaba bi yaa tinmu, ki ŋoadi nani bi diedi n da maama.

²⁵ Bi diema den tie Yaseri, Galaadi dogi kuli, Anmoni buolu yaaba diema boagidima, ki ban dagini hali Aroyeeri, ki kuu Raba.

²⁶ Bi cima den ñani Hesibon, ki ban dagini Ramati-Misepe leni Betonim, ki go ñani Mahanayimi, ki ban dagini Debiri banlu kani.

²⁷ Jurden tialu nni mo, bi den die Beti-Halama, Beti-Nimida, Sukoti leni Safoni. O bado Sihoni yua n den kaa Hesibon, n den die laa dogi. U bianu den tie Jurden, ki ban dagini nujienu po mi ñincianma Kinereti.

²⁸ Laa dociami leni laa dobila n tie ban den baa yaa biinu, ki ŋoadi nani bi diedi n da maama.

²⁹ Musa den boagidi ki teni Manase buolu yaaba boagidima bi yaa tinmu, ki ŋoadi nani bi diedi n da maama.

³⁰ Bi diema banlu nuganu po den tie Mahanayimi dogu. Bi den die Basan diema leni likani bado Ogi n den die yaa diema kuli leni Yayiiri dopiiluobidi yii n ye laa gaanma kuli.

³¹ Bani Manase bijua Makiri buolu yaaba boagidima go den die Galaadi diema boagidima leni Basan bado Ogi dociankpeliedi Asitaroti leni Edreyi.

³² Lani n tie Musa n den ye Jurden duoli, Moabi tiali nni Jeriko puoli, ki boagidi yaa biini.

³³ Waa den boagidi ki teni Levi buolu yaaba wani biinu. O Diedo Isidayeli Tienu n tie bi yaa biinu, nani wan den yedi ba maama.