Josue 12 - U TIENU MAAMA TILI 2013

Isidayeli yaaba n den paadi yaa badiba

¹ Isidayeli yaaba den kpa cili ki paadi badibilie Jurden boanduoli, ki diedi bi diema yaama n den cili Arinoni kpenu, ki yaa caa hali Hermon juali, ki taani leni yaa tialu n ye Jurden puoli.

² O badikpialo den tie Amori yaaba bado Sihoni, yua n den ye Hesibon. O den die Arinoni tialu boagidima, ki cili Aroyeeri dogu kani leni Galaadi diema boagidima, ki yaa caa hali Yaboki kpenu n den tie u banlu, wani leni Anmoni buolu yaaba siiga.

³ O go den die yaa tialu n ye Jurden kpenu leni Kineroti ñincianma puoli po, ki yaa caa hali Arba mi ñincianma, mi ñincianyaama nujienu po, ki ban kuu leni Beti-Yesimoti dogu. Nuganu po mo, o den die yaa tinga n ye Pisiga juali balinma.

⁴ O badilielo den tie Basan bado Ogi, Refayimi buolu yaaba siiga kuli, yua n den sieni.

⁵ Wan den die yaa diema den tie Hermon juali leni Salika dogu, ki taani leni Basan diema kuli, ki ban dagini hali Gesuri yaaba leni Maakati yaaba diema u banlu. O go den die Galaadi diema boagidima, ki ban dagini hali Hesibon bado Sihoni banlu.

⁶ O Diedo naacemo Musa leni Isidayeli yaaba den paadi laa badiliediba, ke Musa den taa bi diema ki teni Rubeni buolu yaaba, Gadi buolu leni Manase buolu yuu n tie buolu boagidima yaaba.

⁷ Li yaa puoli, Josue leni Isidayeli yaaba den paadi yaa badiba n den ye Jurden nintuali. Laa badiba diema den cili Baali-Gadi dogu ki goa nujienu po, Liban joaloangu nni, ki yaa caa hali nuganu po Halaki juali, ki baali Seyiiri juali. Josue den boagidi mi diema yeni Isidayeli yaaba siiga, ki teni buolu kuli u biinu.

⁸ Li den tie li juali nni diema, ku joaloangu nni yaama, Jurden balinma yaama, a juana jiidima yaama, mi fanpienma nni yaama leni nuganu diema. Yaaba n den ye laa diema nni den tie Hititi yaaba, Amori yaaba, Kanana yaaba, Perisiti yaaba, Hiviti yaaba leni Jebusi yaaba.

⁹ Isidayeli yaaba n den paadi yaa dogi yaa badiba den tie: Jeriko, Ayi yuu n kuu leni Beteli,

¹⁰ Jerusalemi, Hebiron,

¹¹ Yarimuti, Lakisi,

¹² Egilon, Geseeri,

¹³ Debiri,

¹⁴ Horima, Aradi,

¹⁵ Libina, Adulami,

¹⁶ Makeda, Beteli,

¹⁷ Tapuwa, Heferi,

¹⁸ Afeki, Lasaron,

¹⁹ Madon, Hatisori,

²⁰ Simironi-Meromi, Akisafi,

²¹ Tanaki, Megido,

²² Kadesi, Yokineami, Karimeli juali kani,

²³ Dori, mi ñincianma jaali po, Goyim yuu n kuu leni Galile

²⁴ leni Tirsa. Bikuli den taani ki tie piitaa n badiyendo.