Josue 10 - U TIENU MAAMA TILI 2013

Isidayeli yaaba paadi Amori yaaba

¹ Jerusalemi bado Adoni-Sedeki den gbadi ke Josue baa Ayi dogu, ki bolini u, ki tieni wuni leni u bado kuli nani wan den tieni Jeriko dogu leni u bado maama. O go den gbadi ke Gabaon yaaba kuani o ŋantaado leni Isidayeli yaaba, ki ye bi siiga.

² Lane o den jie boncianla, kelima Gabaon den tie dociamu, ki pia ti kpiagidi nani bi badiba n kaa yaa dogi nni yeni, ki yabi ki cie ba Ayi dogu, u jaba kuli mo den tie jakoanda.

³ Lani yaa po, Jerusalemi bado Adoni-Sedeki yeni den soani ke bi yedi Hebiron bado Hoham, Yarimuti bado Pileyami, Lakisi bado Jafiya leni Egilon bado Debiri:

⁴ «Cua mani ki todi nni tin tuogi leni Gabaon yaaba bu toabu, kelima bi kuani o ŋantaado leni Josue leni Isidayeli yaaba.»

⁵ Amori yaaba badiba bani bonbimuu, Jerusalemi yua, Hebiron yua, Yarimuti yua, Lakisi yua leni Egilon yua n den taani ki fii leni bi toagola. Ban den ban nagini Gabaon, bi den kpaa bi toanagili, ki gedi ki baa u.

⁶ Gabaon yaaba den soani Giligali po Josue kani, ki yedi o: «Ŋan da yie ke a kan todi tinba a naacenba. Ŋan jaligi ki cua ki gaa ti. Ŋan todi ti kelima Amori yaaba badiba yaaba n ye a juana kuli nni, taani ki baa tuogi leni ti bu toabu.»

⁷ Lanwani, Josue den fii Giligali, wani leni o jakoanda leni o toatieba kuli.

⁸ O Diedo den yedi Josue: «Ŋan da jie ba, kelima n tieni ba a nuu nni, bi siiga nni ba niyendo kan fidi ki sedi ki pani a.»

⁹ Josue den fii Giligali ki cuoni ñiamungu, ki pundi Amori yaaba kani, ki ludi ba.

¹⁰ O Diedo den teni ke Amori yaaba jie ki lebidi ki sani, ke Isidayeli yaaba ŋoadi ki deli ba. Isidayeli yaaba den paadi ba cain, ki kuu Gabaon kani. Bi den ŋoadi ki deli ba ke bi tagi yaa sanu n cuubi Beti-Horoni, ki kpaani ba, ki ban pundi hali Aseka leni Makeda dogi nni.

¹¹ Ban den tiini Isidayeli yaaba ki ji Beti-Horoni, o Diedo den teni ke a tatanciama ña tanpoli ki baali bi po, hali ki ban pundi Aseka dogu, ke bi bodi. A tatana n den kpa yaaba den yabi ki cie Isidayeli yaaba n den kpa yaaba leni mu jugisiemu.

¹² O Diedo n den taa Amori yaaba ki tieni Isidayeli yaaba nuu nni yaa daali, Josue den mia o Isidayeli yaaba kuli nintuali ki yedi: «Fini u yienu, ŋan sedi Gabaon yuli po, Fini o ŋmaalo, a mo n sedi Ayaloni joaloangu yuli po.»

¹³ U yienu den sedi, O ŋmaalo moko den jidi o cenli, Hali Isidayeli yaaba n tuu bi yibalinba bi panli. Lani kuli diani o Niteginka tili nni ki yedi: U yienu den sedi yuli. U den se hali damunli, kaa baa.

¹⁴ Landaali liiga leni li puoli kuli daa go baa yaa daali n naani leni li, ke o Diedo cengi o nisaalo miabu yeni: o Diedo wani o ba den todi Isidayeli yaaba bi toabu nni.

¹⁵ Li yaa puoli, Josue leni Isidayeli yaaba kuli den lebidi ki guani Giligali, bi nagili po.

Amori badimuudiba kuuma

¹⁶ Amori yaaba badimuudiba yeni den sani ki ban wuoni Makeda tanlongu nni.

¹⁷ Bi niba den bandi ke bi wuo lienni, ki gedi ki ban waani Josue.

¹⁸ Josue den yedi o niba: «Bindi mani a tanciama ki luoni ku tanlongu yeni buliñoabu, ki sieni bi niba ban yaa guu.

¹⁹ Yin da sedi ki waagi likani, yin sani ki ŋoadi yi yibalinba, ki kpedi ki jia ba, ki da tuo ban kua bi dogi nni, kelima o Diedo yi Tienu taa ba ki tieni yi nuu nni.»

²⁰ Josue leni Isidayeli yaaba den paadi Amori yaaba cain. Nitianba bebe n den sani ki cia ki ban kua i bilinciami n lindi ki cebini yaa dogi nni.

²¹ Li yaa puoli, Isidayeli yaaba kuli den guani Makeda bi nagili nni Josue kani leni laafia. Mi diema nni, oba kuli ki go den tuo ki maadi bi po yaala n bia.

²² Lane Josue den yedi: «Luodi mani ku tanlongu yeni buliñoabu, ki ñani bi badimuudiba yeni, ki cuani ba n kani ne.»

²³ Bi den tieni wan yedi yaala, ki ñani Jerusalemi bado, Hebiron yua, Yarimuti yua, Lakisi yua leni Egilon yua, ki cuani ba o kani.

²⁴ Ban den cuani bikuli, Josue den yini Isidayeli yaaba kuli, ki yedi bi toatieba yudanba yaaba n den ye leni o bu toabu nni: «Cua mani ki ŋmaa bi badiba ne tuli nni.» Bi yudanba yeni den nagini ki ŋmaa.

²⁵ Josue den yedi ba: «Da jie mani, yin da teni lan wudi yi gbani. Yin paagi yi baa ki paagi yi pala. O Diedo baa soani yi yibalinba yaaba n baa tuogi leni yi kuli yene.»

²⁶ Li yaa puoli, Josue den kpa bi badimuudiba yeni, ki teni ke bi joani ba tiidimuu po. Bi den juani hali ku yenjuagu.

²⁷ U yienu n den baa, Josue den teni ke bi jiini ba. Bi den luni ba ban den wuoni yaa tanlongu nni yeni, ki taa a tanciama ki luoni bu buliñoabu. A tana yeni baa ki ye likani hali dinla.

Josue paadi nuganu po yaa dogi

²⁸ Landaali liga, Josue den paadi Makeda dogu, ki kpa u bado leni u niba kuli. Waa den ŋaa ba niyendo leni miali. O den soani likani bado nani wan den soani Jeriko yaa yua maama.

²⁹ Josue leni Isidayeli yaaba den ñani Makeda, ki gedi ki ban baa Libina dogu.

³⁰ O Diedo den taa laa dogu moko leni u bado, ki tieni Isidayeli yaaba nuu nni. Bi den kpa u niba kuli, kaa ŋaa ba niyendo leni miali. Bi den soani u bado nani ban den soani Jeriko yaa yua maama.

³¹ Josue leni Isidayeli yaaba den ñani Libina, ki gedi Lakisi. Bi den kpaa bi toanagili ki nagini u dogu, ki baa u.

³² O Diedo den taa Lakisi ki tieni Isidayeli yaaba nuu nni, ke bi paadi u li dalieli daali, ki kpa u niba kaa ŋaa ba niyendo leni miali, nani ban den tieni Libina maama.

³³ Geseeri bado Horam den gedi ke o baa n todi Lakisi dogu. Josue den paadi o, wani leni o toatieba, ki kpa bikuli kaa ŋaa ba niyendo leni miali.

³⁴ Josue leni Isidayeli yaaba den ñani Lakisi, ki gedi Egilon. Bi den kpaa bi toanagili ki nagini u dogu, ki baa u.

³⁵ Bi den paadi u landaali liga, ki kpa u niba kuli nani ban den soani Lakisi dogu maama.

³⁶ Josue leni Isidayeli yaaba den ñani Egilon, ki gedi ki ban baa Hebiron.

³⁷ Bi den paadi u, ki kpa u bado leni u niba kuli. Bi den fie ki paadi u dobila moko, ki kpa laa dogi niba kuli. Josue den soani u nani wan den soani Egilon maama yeni, ki bolini u cain, ki kpa u niba kuli mo kaa ŋaa ba niyendo leni miali.

³⁸ Li yaa puoli, Josue leni Isidayeli yaaba den lebidi ki gedi ki ban baa Debiri.

³⁹ Bi den paadi wuni leni u bado leni u dobila kuli. Bi den kpa bi niba kuli, kaa ŋaa ba niyendo leni miali. Josue den soani Debiri leni u bado nani wan den soani Hebiron maama, Libina leni u yaa bado mo maama.

⁴⁰ Josue den paadi mi diema kuli: O den paadi yaa diema n ye a juana nni yaa badiba, nuganu yaama yaa badiba, u tialu nni yaama yaa badiba leni yaama n ye a juana balinma yaa badiba kuli. Waa den ŋaa oba kuli leni miali. O den bolini yaala n pia miali ki fo kuli, nani o Diedo Isidayeli Tienu n den bili maama.

⁴¹ Josue den paadi bi badiba yeni kuli, ki ña Kadesi-Barneya, ki yaa caa hali Gasa. O den paadi Gosen diema kuli, ki yaa caa hali Gabaon.

⁴² O den paadi laa diema leni mi badiba kuli fiiyenma, kelima o Diedo Isidayeli Tienu den todi ba bi toabu nni.

⁴³ Li yaa puoli, Josue leni Isidayeli yaaba den lebidi ki guani Giligali, bi nagili nni.