Jonasi 4 - U TIENU MAAMA TILI 2013

Jonasi pali biidi U Tienu ninñingbadima po

¹ Laa bonla den biidi Jonasi pali hali boncianla. O pali den beni,

² ke o mia o Diedo, ki yedi: «O Diedo, hali min den ye n diema nni, min den li jie yaala ka ne. N den bani ke a tie yaa Tienu n juogidi, ki gba mi ninñima, ke a pali ki be tontoni, ki go tiendi mi ŋanma. A yen lebidi a yama ki cedi ŋan bi jagi ke a baa tieni o nilo yaala. Lani yaa po yo, ke n den tiini ki caa Tarsisi.

³ Moala o Diedo, taa n miali, kelima n kuuma cie n po n yema.»

⁴ O Diedo den yedi o: «Ŋan bieni a pali yeni, a sua ke li ŋani bi?»

⁵ Jonasi den ñani u dogu nni, ki ban kali u puoli po. O den tii li janli likani, ki kali li soangu nni, ki guu ki baa le yaala n baa tieni u dogu nni.

⁶ Li Miali Diedo U Tienu den teni ke ku tungu pudi ki kpedi ki yiini Jonasi yuli po, ki tieni o po u soangu ki bua ki kuugi o pali. Li den mangi Jonasi pali boncianla.

⁷ Ama landaali yaa fiifaama, U Tienu den teni ke o sidibilo cua ki ñidi ku tungu yeni ke ku kuodi.

⁸ U yienu n den pudi ki doagidi, U Tienu go den teni ke mi fawaatonma ñani puoli ki figi. U yienu den puli Jonasi yuli hali ke o bua ki pabi. O den mia mi kuuma, ki yedi: «N kuuma n cie n po n yema.»

⁹ U Tienu den yedi Jonasi: «Ŋan bieni a pali ku tungu po yeni, a sua ke li ŋani bi?» Jonasi den guani ki yedi: «N pia moamoani ki bieni n pali, hali ki mia mi kuuma.»

¹⁰ O Diedo den yedi o: «Ŋaa soani tuonliba kuli ku tungu yeni po. Fini ka teni ke ku pudi. Ku pudi ki kpedi ñiayengu, ki go bodi ñiayengu. Ama ba yeni, mi ninñima cuo ŋa ku po.

¹¹ Naani mi ninñima kan cuo mini wani Ninivi dogu po, wuni yaa dociamu n pia ya niba n cie kobiga n tuda piilie (120 000) yaaba n ki bani bi ganu leni bi jienu paadima, ki go pia ti yandi boncianla po?»