Jonasi 3 - U TIENU MAAMA TILI 2013

Jonasi tuoma leni U Tienu ninñingbadima 3—4 Jonasi wangi U Tienu maama Ninivi dogu nni

¹ O Diedo go den teni Amitayi bijua Jonasi o ñoamabonli, ki yedi:

² «Fii ki gedi Ninivi dociamu nni, ki ban kpaani ki caa min soani a yaa tondu.»

³ Jonasi den fii ki gedi Ninivi, nani o Diedo n den yedi o maama. Ninivi yeni den tie dociamu, ke u poandima pundi danataa cenli.

⁴ Jonasi den cuoni u dogu yeni niinni dayenli cenli, ki kpaani ki tua: «Dana piinaa yaa pendi, Ninivi baa bodi.»

⁵ Ninivi yaaba den gaa U Tienu maama, ki lebidi bi pala, ki bili ke bi niba kuli n loli bu ñoabu. A nikpiaga leni taliginba kuli, den lani li paboanli tiadi.

⁶ Laa laabaalo n den pundi Ninivi bado kani, o den fii o bali kalikaanu, ki landi o liadicianli, ki lani li paboanli tiadi, ki kali mi fantanpienma nni.

⁷ O den teni ke bi kpaani ki yedi: «O bado leni o nikpiaga kuli yedi, ke bi niba, i ne leni i pe n da je liba kuli, ki da ño mo.

⁸ Bi niba leni ti yandi kuli n la li paboanli tiadi, bi niba n mia U Tienu leni bi fidu kuli, ki lebidi ki ŋaa bi sanbiadi leni bi nii n tiendi yaa biadima.

⁹ Li fidi ke yeni, U Tienu baa ti lebidi o yanjagili, ki jiini o pali ti po, ki kan bolini ti.»

¹⁰ U Tienu n den laa ke bi tieni yeni, ki lebidi ki ŋaa bi sanbiadi, o den lebidi o yama ki jiini o pali, ki naa go tieni wan den jagi ke o baa tieni ba yaala.