Jonasi 2 - U TIENU MAAMA TILI 2013

Jonasi jaandi o jamo tugu nni

¹ O Diedo den teni ke o janciamo cua ki nali Jonasi. O den tieni o jamo yeni tugu nni danataa leni ñiaditaa.

² Jonasi den jaandi o Diedo o Tienu o jamo tugu nni,

³ ki yedi: «N paboanli nni, n jaandi ki mia fini o Diedo, Ke a gaa n miabu. Hali bi tinkpiba diema nni, N den kpaani ki mia ŋa, Ke a gbadi n nialu.

⁴ A den luni nni mi ñincianma nni, Hali mi ñima tugu nni. Mi ñima den gaani ki lindi ki cebini nni. A ñingola leni a ñinguona kuli, Den milini nni.

⁵ N den tua: ‹A deli nni ke n foagidi leni a, Ama n baa suagi ki yaa diidi a jaandiegagidikaale.›

⁶ Mi ñima den pundi hali n niali, Ke u kulu ñima den lindi ki cebini nni, Ke ti ñinmuadi mo fini n yuli.

⁷ N den jiidi ki pundi Hali a juana tanpuuna kani, Bi tinkpiba kaanu buliñoana den luoni nni, Ke n kan fidi ki ña abada. Ama o Diedo n Tienu, A teni ke n ñani U kulu yeni niinni leni li miali.

⁸ N fidu n den gbeni, Ke mi kuuma dia nni yaa yogunu, N den tiadi fini o Diedo po, N miabu den pundi a kani, Hali a jaandiegagidikaali nni.

⁹ Yaaba n ŋua i buli, Yii n tie fanma fanma, Faabima ki ye bi po.

¹⁰ Ama mini n ba yaa yiini Ki jaandi a, ki padi a po a pada, Ki go kuandi min den niani a Yaa ñoaniani. Fini o Diedo, mi faabima kuli ña a kani.»

¹¹ O Diedo den teni ke o jamo yeni, Sii Jonasi li wali po.