Jonasi 1 - U TIENU MAAMA TILI 2013

Jonasi yiema leni U Tienu cuonu 1—2 Jonasi yie U Tienu tondu

¹ O Diedo den teni Amitayi bijua Jonasi o ñoamabonli ki yedi:

² «Fii ki gedi u dociamu Ninivi po, ki ban kpaani ki fu leni u niba, kelima bi biadima pundi hali n kani.»

³ Ama Jonasi den fii ki sani ki gedi Tarsisi, ki foagidi leni o Diedo. O den gedi Jafa dogu nni, ki ban kua ñinbiaciangu yaagu n caa Tarsisi. O den pani ku panpaani ki kua ki yegi leni yaaba n caa Tarsisi yeni, ki bua ki foagidi leni o Diedo.

⁴ Ama o Diedo den teni ke ku faabiadigu fii mi ñincianma nni. Ku tafaaciangu den lengidi mi ñincianma hali ke ku ñinbiaciangu yeni den bua ki mudi.

⁵ Bi ñinbiagobidiba den jie, ki yedi ke yuakuli n mia o tienu mi todima. Bi den luni yaa tiadi n ye ku ñinbiaciangu nni mi ñincianma nni, ki yuagi ku ñinbiagu. Ama li den sua ke Jonasi jiidi ku ñinbiaciangu tugu nni, ki duani, ki guani hali boncianla.

⁶ Ku ñinbiaciangu yudaano den nagini o kani, ki yedi o: «Be yaa po ke a goa? Fii ki mia amo yaa tienu. Daalinba o baa tiadi ti po, ki teni tin da bodi.»

⁷ Bi ñinbiagobidiba den yedi biyaba: «Cua mani tin bu ku baagu ki bandi yua n cuani ti po yaa fala n tie ne.» Bi den buni ku baagu, ke li cuo Jonasi.

⁸ Lani, bi den yedi o: «Fini n cuani ti po yaa fala n tie ne. A tuuni be yaa tuonbuolu yo? A ñani le? A tie mi laa diema yua yo? A tie be yaa nibuolu yo?»

⁹ O den guani ki yedi ba: «N tie Hebilu buolu. N fangi o Diedo, wani U Tienu yua n die mi ñincianma, yua n tagi tanpoli leni ki tinga kuli.»

¹⁰ Lani, ti jawaanciandi den cuo bi jaba yeni, ke bi yedi o: «Be n teni ke a tieni yeni?» Li den sua ke bi jaba yeni bandi, ke Jonasi tiini ki bua ki foagidi leni o Diedo, kelima wani o ba n den waani ba.

¹¹ Mi ñincianma n den lengidi ki pugidi, bi jaba yeni den yedi Jonasi: «Ti baa tieni a lede mi ñincianma n duani ti po?»

¹² O den yedi ba: «Se yin taa nni ki lu mi ñincianma nni, lani n tie mi ñincianma n duani yi po suo, kelima n bani ke mini yaa po n teni ke ku tafaaciangu yeni fii yi po.»

¹³ Bi jaba yeni den nugi ki bua ki pundi li boanjaali, ama baa den fidi kelima mi ñincianma den lengidi ki pugidi yogunu kuli, ki yie bi po.

¹⁴ Lani yaa po, bi den taa o Diedo yeli, ki jaandi ki mia o, ki yedi: «O Diedo, da bolini ti kelima o naa joa po. Da tuni ti, o joa yua n kaa tieni ti liba ne tagili, kelima fini o Diedo, ŋan bi tieni yaala yeni kuli, a tieni nani ŋan bua maama.»

¹⁵ Li yaa puoli, bi den taa Jonasi ki luni o mi ñincianma nni. Mi ñincianma lengidima den duani suo.

¹⁶ Bi jaba yeni den jie o Diedo boncianla, ki padi o po li padili, ki go niani o li nianli.