Joeli 2 - U TIENU MAAMA TILI 2013

O Diedo pabienli daali pundi

¹ Piebi mani li naatuntunli Siyon juali po, Teni mani ban gbadi li moe n joagagidikaali po. Mi diema yaaba kuli n digibi, Kelima o Diedo daali kpendi, Li daali yeni nagini.

² Laa daali tie biigicianli daali, A tawala leni ku gbangbadigu daali. Li daali yeni kpendi nani mi yendanma N yendi a juana maama yeni. Diidi yaa nibuolu n tie ne n yabi Ki go pia u paalu maama. U buolu daa kpa tieni, U kan go tieni mo ba yaa nifiima n baa ŋoadi siiga.

³ U nibuolu yeni liiga tie nani yaa mu n buondi, U puoli mo nani yaa mupienu n juugi yeni. Hali ke u daa tagini, Mi diema den tie nani Edeni koaŋamu yene. U yaa tagini ki ban pendi, U yen ŋaa u puoli po, Fanpienma yaama yaa noanlima n gundi. Liba ki cia u kani.

⁴ U nibuolu yeni tie nani i taami, Ki tiini nani bi tanjagiba yeni.

⁵ U fuugu tie nani yaa toateliti n tiini a juana yula po, Ki tie nani u mu n yen sia ku muagu Ki yaa pudi maama yeni, Ki tie nani yaa toagoli n pia u paalu, Ki bogindi bu toabu po.

⁶ Bi yaa nagidi i nibuoli yen digibi, Mu nunmu kuli yen gbidi.

⁷ Bi tiini nani a jakoanda yeni, Bi do i bilini nani bi toatieba yeni, Yuakuli kubi o sanu, oba kuli kan jadi ki ŋaa u.

⁸ Baa pangi biyaba, Yuakuli kubi o sanu. Bi yen jaligi ki pendi yaala n pangi ba, Puu kuli kan fidi ki sieni ba bi cenli nni.

⁹ Bi yadi u dogu nni, Ki tiini i bilini po, Ki do ti diedi, Ki koa a diebona kani nani a suuda yeni.

¹⁰ Bi yaa nagidi ki tinga yen digibi, Tanpoli mo n begibi, U yienu leni o ŋmaalo n biigi, A ŋmabila yenma mo n bodi.

¹¹ O Diedo ye o toagoli liiga ki kpaani, O toacaga mo yabi hali boncianla. Yua n baa tieni wan yedi yaala, Pia u paalu. O Diedo daali tie dacianli, Ki go pia i jeje hali boncianla. Ŋme n baa tuo ki sedi landaali?

U Tienu bua mi yanlebidima

¹² Moala o Diedo go yedi: ‹Lebidi mani ki cua n kani leni yi pala kuli. Loli mani bu ñoabu, buudi mani li paboanli moe.

¹³ Da padi mani yi tiayiekaadi bebe ka, Se yin lebidi yi yama.› Lebidi mani ki cua o Diedo yi Tienu kani, Kelima o juogidi yi ki gba yi po mi ninñima. O pali ki be tontoni ki go pia li ŋanbili mo. O yen lebidi ki ŋaa wan bi jagi yaa bonbiadila.

¹⁴ Ŋme n bani o yaa kan guani ki lebidi o yantiali, Ki seligi yi bonŋanla. Yeni, yi baa fidi ki yaa kpendinni O Diedo yi Tienu po bu paabu leni a ñincaba.

Mi ñoalolima leni i jaandi yogunu

¹⁵ Piebi mani li naatuntunli Siyon nni, Bili mani u yogunu mi ñoalolima po, Ki tieni li taancianli.

¹⁶ Taani mani bi niba, Ki tieni taangagidikaali, Taani mani a nikpela, Taani mani a bila, Ba yaa bila n da ŋaani. O puocaano calo n ña o dieduadili nni, O puocaano mo n ña o gbandieli nni.

¹⁷ O Diedo naacenba bi kopadicianba, N sedi li janli leni li padibinbinli siiga ki buudi, Ki yedi: ‹O Diedo, faabi a niba. Ŋan da cedi a niba n le i fe. Ŋan da tuo i nibuoli n yaa laa ti ki tua: Bi Tienu nan ye le?›

U Tienu n niani o niba yaala

¹⁸ O Diedo bua o diema, O gbadi o niba po mi ninñima.

¹⁹ O guani ba ki yedi: ‹N go baa soani yi po ŋalikama, duvenpaano leni mi kpama. Yi baa baa likuli hali lan dagidi. N kan go cedi yin le i fe i nilanbuoli siiga.

²⁰ N baa deli ki foagidi nujienu po yibali leni yi. N baa deli ki bolini o Mu tinkuonmu nni leni a tinwaga nni. O toatieba yaaba n ye liiga, n baa deli Ki jiini ba puoli ñincianma nni. Yaaba n ye puoli mo, N baa deli ki jiini ba nintuali ñincianma nni. Bi tinkpila nuulu baa gbieni mi fawaama. Bani yaaba n tieni yi Mi biadima boncianla juodima n yeni.

²¹ Fini ki tinga ŋan da jie liba, Mangi a pali hali boncianla, Kelima o Diedo n tieni a po yaala kuli po.

²² Yinba ti moayandi yin da jie, Kelima a yankpaafuana baa bundi, I tiidi baa luoni i bonluonkaala. Bu kankanbu leni duven tibu baa luoni boncianla.

²³ Yinba Siyon yaaba mo, yin mangi yi pala Kelima o Diedo yi Tienu po. O baa pa yi ki taaga ki yogunu yaa pundi, O baa pa yi ki takpiaga leni ki tajuodikaaga Nani wan den tiendi maama u yogu nni yeni.

²⁴ I jali baa gbie leni ŋalikama, Ti tadiciandi baa gbie leni o duvenpaano leni mi kpama.

²⁵ N baa lebidi yi po yaa bina Ke n den soani mu tobiñaanmu yaamu n daa pudi fiabi, A dondoba, a tobiñaana, I naaci leni a sidibila, Ke bi ŋmani ti kpaandi yeni.

²⁶ Yi baa je ki guo, Ki pagi mini o Diedo yi Tienu, Yua n tieni yi po li bonlidinkaala. N niba mo kan go le fe abada.

²⁷ Yeni, yi baa bandi ke n ye yinba Isidayeli yaaba siiga. Yi baa bandi ke mini n tie Li Miali Diedo yi Tienu, Ke toa ki ye. N niba mo kan go le fe abada.›