Jobi 8 - U TIENU MAAMA TILI 2013

Bilidadi n guani Jobi yaala

¹ Bilidadi yua n den ñani Suwa den yedi Jobi:

² «Amo n da maadi nanda yogunu kuli! Amo n da teni a ñoabu nni maama, N tua fawaama yogunu kuli!

³ Naani U Tienu baa golini mi teginma? Naani wani U Paaciamu Daano Baa tieni yaala n ki tiegi?

⁴ Li fidi ke a bila tudi o po yo, Ke o teni ke bi biadima ñagi ba.

⁵ A yaa lingi U Tienu, A yaa mia U Paaciamu Daano todima,

⁶ A yàá pia tagiliba, ki tiegi, Laa pia kuli tama, o baa guudi a. O baa guani ki sieni a a teginma nni.

⁷ A yekpiama kan yaa tie puu kuli Leni yaama n baa yuandi ki cua a po.

⁸ Buali yaa nifiima n kpa liidi ti, Ki kpaagi bi baanba n den laa Ki go bandi yaala po.

⁹ Ti tie wonli nni yaaba, tii bani liba, Kelima ti yema ki tinga po, Pendi nani u soangu yene.

¹⁰ Ama ti dankpiaba wani, Baa fidi ki bangi a, Ki go tundi a leni ban den laa, Ki go bandi yaala. Bi baa yedi a:

¹¹ ‹Naani ku sabigu baa pudi Ke laa tie ñima nni? Naani i kpenkagi baa pudi Naani n ki soangi?

¹² Hali ke ku sabigu yeni da soangi Ke baa ceni gu, mi ñima yaa ñuudi, Ku yen jaligi ki kuodi ki ŋaa Yaa muadi n soangi kuli.›

¹³ Li baa tua yene yaaba n sundi U Tienu kuli po, Yaaba n ki daani U Tienu mo yaa dugidi baa bodi.

¹⁴ O nibiado jigi baa cie, Kelima o dugidi tie diandiagaali yo.

¹⁵ O dugi o diegu po yo, kuni mo baa mudi. O sani ki fini ku diegu yeni, ama ku wudi.

¹⁶ O tie nani yaa tibu n gbie Leni mi sinma u yienu nni, Ki landi bu beni salidinga nni kuli.

¹⁷ O jiini kua ki sagi a tankuda nni, Ki ban talini hali ku tangu tinga.

¹⁸ Ama bi yaa ŋabi o wan den ye naani, Oba kuli kan go bandi ke o den ye likani.

¹⁹ O yema manu juodima n yeni. Laa tinga nni, nitoaba baa fii.

²⁰ U Tienu kan ŋaa niteginka abada. O kan todi yaaba n tiendi mi biadima mo hali abada.

²¹ Li kan waagi, o baa gbieni A ñoabu leni li pamanli laadi, Ki teni a ñoacuuna mo n pagi o.

²² Yaaba n nani a baa le i fe. Bi nibiadiba diedi baa bodi.»