Jobi 7 - U TIENU MAAMA TILI 2013

¹ O nisaalo yema ki tinga nni, Pa hali boncianla. O yema pa nani o tuonsoanlo yaama yene.

² Nani o yonbo yua n ye u yienu nni N bua u soangu maama, Nani o tuonsoanlo n guu O panpaani maama yeni,

³ Mini moko yaa yema tie yene. Ŋmaali boncianla ke mii ŋmani yanbu.

⁴ N yaa duani yaa yogunu, n yen yedi: ‹N baa fii beyogunu yo?› Ku ñiagu mo yaa waagi, Se n yama n yaa yagini, Hali ki ban pundi u yienu pudima.

⁵ A sidibila leni a poaga pini n gbanu kuli. N gbanu fabidi ke a nala tieni ti biidi.

⁶ N dana jaligi ki cie o lugido gonbu, Akuli jaligi ki gbeni, suginma ki go ye.

⁷ U Tienu, ŋan tiadi Ke n miali dana tie fawaama bebe. N nuni kan go le mi yemanma.

⁸ Yaa nunbu n bi diidi nni kan go le nni. A nuni baa lingi nni ki sua ke mii go ye.

⁹ Nani ku tawaligu n yindi ki gedi maama, Yua n gedi bi tinkpiba diema nni Kan go guani yene.

¹⁰ O kan go guani o diegu nni, O diegu nni yaaba mo baa sundi o po.

¹¹ Lani n teni ke n kan yaa ŋmini. N pabiidili nni, n baa maadi. N paboanli nni, n baa waani Yaala n koani nni.

¹² Naani n tie ñincianme, Bi mi ñincianma bonfuodibiado yo, Ke a baa baa bi niba ban guudi nni?

¹³ N yaa duani yaa yogunu n duanu po, Ki tama ke n baa baa mi yanduanma leni gaapo,

¹⁴ Lanyogunu yo, ke a yen jiendi nni leni ti dangidi, Ki teni ke li bonlekaala jiendi nni.

¹⁵ A yaa bi soadi nni, li baa yaa tu n po. N yaa kpe, li tunni n po min dondi Ki tie kpaba maama ne.

¹⁶ Mii bua a kpaba yeni ba waamu. N kan go waagi ki ye. Cedi nni, Kelima n miali dana ki go pia fuoma.

¹⁷ O nisaalo fuoma tie be, Ke a puuni o laa yulolima kuli? Be n teni ke a puuni o laa kpiagidi kuli,

¹⁸ Ki baa yaa kpendi ki goandi o tiŋaagu kuli, Ki biigidi o u yogunu kuli?

¹⁹ Beyogune ke a baa cedi Min fuo leni a nunnualima? Beyogune ke a baa cedi Min baa ki nali n ñinsanñima?

²⁰ Bi nisaaliba guudo, N yaa tieni ti tuonbiadi, Li baa fidi ki biidi a po be? Be yaa po yo ke a li sedi n po nanda? Naani n tie a po tugile?

²¹ Be n teni ke a yie ke a kan tieni N tagili po sugili? Be n teni ke ŋaa tieni n tudima po sugili? Moala wani n ji caa ki baa duani mi tama nne. A baa lingi nni ki sua ke mii go ye.»