Jobi 6 - U TIENU MAAMA TILI 2013

Jobi maguankaama

¹ Lanwani, Jobi den guani ki yedi:

² «Li yaa bi baa tuo ban biigi n fala, Ki kpieni n yebiadima yaala n biigidi Li bonla kpiagu nni,

³ Li bi baa yaa kpiagi ki cie Mi ñincianma tanbiima. Lani n teni ke n kan go fidi ki maadi.

⁴ U Paaciamu Daano piemi muu ki lugidi nni, Ki teni ke li loabidi kua nni. U Tienu teni ke ti jawaanciandi cuo nni.

⁵ Naani o fuaŋunbo baa cua Ti moasoangidi kani, Ki da yaa se ki mua? Naani o nua go baa yaa mua Wan ŋmani yaa muadi po?

⁶ Naani yaala n sa kaa pia yaama Baa tuo jiema? Naani mi jenkpipienma pia yaala n mani?

⁷ Min den sengi yaala yeni, Lani n ji tua n jiema.

⁸ Ŋme n baa teni U Tienu n gbadi n miabu, Ki tieni n po min sugini yaala?

⁹ U Tienu n ñii ki midi nni, Wan tandi o nuu ki dudi nni yenma!

¹⁰ Yeni n baa baa i baagi, Ki yugi ki cii leni li pamanli, N falabiado yua n ki pia bianu yeni po. N bani bonyenla wani: Mii miidi Tienu maama ba mayenma.

¹¹ Nmo yaa fidu n tie ule Ke n go baa yaa baa ki daani? Be yaa po yo ke n baa yaa baa ki ye, Ki naa pia min daani yaala?

¹² Naani n pia u fidu nani li tanli yene? Naani n gbanandi juagi Nani ti kumoandi yene?

¹³ Mii go pia yua n baa todi nni, Mii go pia loaguba kuli mo.

¹⁴ Li pundi yua n ye leni fala, N fidi ki baa o danli kani mi ŋanma, Ba o yàá go fangi U Paaciamu Kuli Daano?

¹⁵ N kpiiba kpani n gbanu, Nani yaa kpenu n yen ñuudi yeni.

¹⁶ U kpenu yeni ñima gbidi Ki kuugi ki kpandi ñintanli, Ku gbangbadigu cua ki mundi Li ñintanli yeni.

¹⁷ Ku tontongu yogunu, i kpeni yeni ñuudi, U yienu teni ke i kpeni kuodi li buoli nni.

¹⁸ Bi sancenba jadi likani ki bua ki ño, Ki cuoni mi fanpienma nni ki ban yaadi.

¹⁹ Tema diema sancenba leni Saba diema yaaba kuli lingi mi ñima Ki tama ke bi baa le ma.

²⁰ Ama ban pundi, bi pala biidi Kelima bi sua ke i kpeni kuli kuodi.

²¹ Moala ne, yi tie yene Mini yi danli po. Yi laa n yebiadima ke ti jawaandi cuo yi.

²² Naani n yedi yin baa bonla ki pa nni? Naani n yedi yin ñani yi piama nni Bonliba ki pa nni?

²³ Naani n yedi yin faabi nni n yibalinba, Leni bi tugumoandanba nuu nni?

²⁴ Teni mani min bandi n tagili, Yeni n baa suo! Waani nni mani min tudi naankani?

²⁵ I moamoani koani ŋme yo? Yimo yaa jaligi n tie be n kani?

²⁶ Yi jaligidi nni n mapoadi po yo? Yua n ye leni li paboanli, Maama ki go pia yuli.

²⁷ Yi kan gbali ki toa kpienbiga tiatia. Yi kan gbali ki kuadi yi danli mo.

²⁸ Moala, diidi mani nni bonŋanla, Naani n baa pua yi mi faama?

²⁹ Guani ki cua mani! Da tiendi mani yaala n ki tiegi! Guani mani ki cua ne! N li baa ki se n teginma nne.

³⁰ Naani yaala n ki tiegi ye n lanbu po? Naani n ñoabu ki bani ki gagidi mi yebiadima?