Jobi 5 - U TIENU MAAMA TILI 2013

¹ Moala, kuudi boncianla! Naani li pia yua n baa guani a? A baa mia o laa malekiŋamoe mi todima?

² Li mutuoli n baa kpa o yanpiidaano, Li nunponli mo n baa je o yanluodaano.

³ N laa ke o yanpiidaano pani i jiini, Ama laa waagi leni min soli o diegu ki yedi:

⁴ ‹O bijaba n da baa kuli todima, Ban jia bi buudi ki cuo ba, Oba n da faabi ba.

⁵ Wan yendi yaa bonjekaala A konkonba baa cua ki je la, Ba li yaa ye i konkoni nni. U ñuñuunu n kubi yaaba mo Baa nali o ŋalimano!›

⁶ Mi yebiadima ki ña mi tama nni ka, Fala mo ki pudi ki tinga nni ka.

⁷ Moamoani o nisaalo mali fala po yo, O baa pendi nani i mukaabi yeni.

⁸ Li yaa bi tie mine, N bi baa yaa miadi U Tienu yo. N bi baa waani U Tienu yo n payianu.

⁹ Wani yua n tiendi yaala n ŋani, Ki pia li pakili leni ki lidiga. O tieni yaa bancianma n ki pia coali.

¹⁰ Wani n teni ke ki taaga mi u tingbanu po, Ki teni ke mi ñima soangidi i kuani.

¹¹ O fiindi ki siendi ban fiagi yaaba, Ki teni yaaba n ye leni li paboanli mo Baa mi yemanma.

¹² O bolindi bi nunfandanba jaga, Ki teni ke bi nii kan fidi ki pa ba ban bua yaala.

¹³ O yen cuo bi yanfuodanba bi nunfanbu nni, Ki teni ke bi nunfandanba tundi mo Kan baa yuli.

¹⁴ Bi yen tuogi li biigili u yensiinu, Ki tulibi u yensiicocolu nani ku ñiagu yeni.

¹⁵ Ama U Tienu n baa faabi taliga Leni bi nibiadiba piemu leni bi yebiidu. O baa faabi taliga bi paalu nuu nni.

¹⁶ Yeni, a tadima po mo mi suginma ye, Ama o baa luoni bi nibiadiba ñoana.

¹⁷ Lanwani li pamanli ye Leni U Tienu n tundi yua leni fala. Lanwani, ŋan da yie U Paaciamu Daano tundifala,

¹⁸ Kelima wani n yen poagili, ki go buu. Wani yaa nii n yen poagili, ki go buu lan soangi.

¹⁹ O baa faabi a leni li paboanli taalimiluoba, Mi taaleleema mo o kan tuo Yaala n bia n nandi a abada.

²⁰ O baa faabi a leni mi kuuma Mi koma yogunu, Bu toabu yogunu mo, O baa kubi a miali.

²¹ Bi niba ñoana kan nandi a, A kaa jie puu kuli mi yebiadima Yaa cua ki baa ŋa.

²² A kan yaa bangi mi yebiadima Leni mi koma kuli po. A kan yaa jie ti moayandi moko,

²³ Kelima a tana kan yie a bonbulikaala po, Ti moayandi mo kan go biidi a kuani.

²⁴ A baa yaa ye leni mi yanduanma a diegu nni, Ki goandi a yanloli ki sua liba ki poadi.

²⁵ A baa le ke a puoliŋuani yabidi, Ke a yaabila mo yabi nani Ki tinga nni muadi yeni.

²⁶ A baa podi hali bonŋanla, Ki yuandi ki kpe, Nani ti kpaandi n yen be, Ban pedi ti maama yeni.

²⁷ Diidi, ti kpaagi likuli po Ki sua ke li tie yene. Moala a gbadi la, moandi lan todi a.»