Jobi 42 - U TIENU MAAMA TILI 2013

¹ Jobi den guani o Diedo ki yedi:

² «N bani ke a fidi li bonla kuli, Ke liba mo ki ye ki pa ki pendi a paalu.

³ A yedi: ‹Ŋme n bua ki gangi ki biidi n jaga, Leni mi yanluodanmaama?› Moamoani de! N den maadi min kaa bani yaala, Ke li den pia n po mi gangima.

⁴ A yedi: ‹Cengi nni, n baa maadi! N baa buali a i buali, ŋan guani n po!›

⁵ N tubili den gbadi ke bi maadi a maama, Ama moala wani, n nunbu laa ŋa.

⁶ Lani n teni n tuo ke i tagili tie n yii. N gbaa mi fantanpienma leni mi tama nni ki miadi sugili.»

U Tienu guani ki mangi Jobi yema

⁷ O Diedo n den maadi leni Jobi laa maama ki gbeni, o den yedi Temani yua Elifasi: «N pali beni hali boncianla fini leni a danliliediba po, kelima yii maadi yaala n tiegi n po, nani n naacemo Jobi yeni.

⁸ Moala, baa mani naatonalele leni petonalele ki gedi n naacemo Jobi kani, ki padi yi yula po li padijuukaali. N naacemo Jobi baa jaandi yi po, kelima n jigini o. N kan faligi yi, nani yi yanluoma n bi pundi maama, kelima yii maadi n po, ke li tiegi nani n naacemo Jobi yeni.»

⁹ Temani yua Elifasi, Suwa yua Bilidadi leni Naama yua Tisofari den gedi. Bi den tieni nani o Diedo n den yedi ba maama. O Diedo den gaa Jobi jaandi.

¹⁰ Jobi n den jaandi o danlinba po ki gbeni, o Diedo den guani ki kaani o, o yemankpiama nni. O Diedo den puni o wan den kpa pia yaala kuli taalimilie.

¹¹ Jobi kpiiba, li jaba leni li puoba kuli, ki taani leni o nibankaaba kuli den cua ki taani ki dini leni o o diegu nni. Bi den baligidi ki go baagi o leni o Diedo n den teni ke yaa yebiadima kuli n den ŋmaa o po. Lanwani, bi siiga, yuakuli den puni o kujapienyenli leni wula ñoagibili.

¹² O Diedo den seligi Jobi miali juodima dana ki cie yaa dana n den kpia. O yanbidi ji den tie piiga n tudanaa (14 000), o yuoyuodi tudaluoba (6 000), o naakpakpaadi tudalie (2 000), o ŋunñoe tudili (1 000).

¹³ O den mali bonjalalele leni bonpolataa.

¹⁴ O den yini ki bonpokpiaga Yemima, ki bonpoliega Kesia, ki bonpotaaga Keleni-Apuki.

¹⁵ Mi diema nni kuli, laa den pia yaa puoba n ŋani ki pundi Jobi bisiaba. Bi baa den puni ba li faali bi naataanjaba kani.

¹⁶ Laa bonla kuli yaa puoli, Jobi miali yema go den pugini hali kobiga n bina piinaa. O den laa o bijaba leni o bijaba yaa bijaba, ki ban pundi hali nifiiminaa.

¹⁷ Jobi den podi hali bonŋanla ki gbadi o miali manu, ki nan yuandi ki kpe.