Jobi 41 - U TIENU MAAMA TILI 2013

O waaciamo

¹ Diidi, bi yaa se ki guu o ke o ti doagidi, Se bi gbani n wudi. Bi yaa li laa ba wan tie maama, Se ti jawaandi n guli ba.

² Oba ki gaadi ka ki baa tuo ki cidi o. Lanwani, ŋme n baa tuo ki mua jama ki sedi n nintuali?

³ Mii pia oba kuli panli. Yaala n ye ki tinga nni kuli, mini n die la.

⁴ N baa maadi ki waani o taana n tie maama, O fidu leni o gbanu n bugi maama.

⁵ Ŋme n kpa wogidi o gbangu? Ŋme n baa kua o lanyaagi nni?

⁶ Ŋme n kpa yaadi o ñoabu? O ñina n caligi maama pia ti jawaandi.

⁷ O poaga pia u paalu nani a gbankoanditi yeni, Ki soagi leni aya bonŋanla.

⁸ Ŋan tabi leni aya maama, Teni ke baa fawaama kan fidi ki magidi a siiga.

⁹ Ŋan kua ki soagi leni aya maama, Teni ke bi kan fidi ki paadi a leni aya.

¹⁰ O yaa ciindi se u mu n yaa ña, O nuni moani nani li tiŋaayenmoanli yeni.

¹¹ I mukaani leni i mukaabi ña o ñoabu nni,

¹² I muñii ña o miaboni nni, Nani yaa bobili n pu loabiloabi yeni.

¹³ Yaa wulima n ña o miani nni, Cuondi a kuana, Ke u mupienu mo ña o ñoabu nni.

¹⁴ O tulu pia yaa paalu, Hali yaala ke yua n laa o kuli baa jie.

¹⁵ O gbangu n toli ki juagi maama Teni ke bi kan fidi ki begi o.

¹⁶ O pali juagi nani li tanli yeni, Ki li juagi nani li naali yeni.

¹⁷ O yaa fii ki sedi, Ba yaaba n pia u paalu yen jie. Bi yen sani kelima ti jawaandi po.

¹⁸ Ki jugisiega, li kpaanli leni i piemi kuli, Kan fidi ki tieni o puu.

¹⁹ Ti kudi tie o po nani ti muadi yeni. Ti kumoandi mo tie o po nani ti dawudindi yeni.

²⁰ Piemu kan fidi ki teni wan sani, Ku tanbuncaangu tana mo tie o po Nani ti muadi yene.

²¹ Li gbadunduli tie o po nani ti muadi yene. Bi yaa lugidi o kpaanli, laa tua o liba.

²² O benli po poaga sondi Nani a kukpaana yeni. O yaa tagini ti moamoadi nni, Li yen tie nani ku dafulikaagu yeni.

²³ O yaa kua mi ñima nni, O yen teni man jeli nani yaa bobili n pu yene. O teni ke mi ñincianma tua Nani ban juugi tulale naani yeni.

²⁴ O fuuli tie nani mi yenma yeni, Ki ŋaani ti punpupiendi u ñingbanu po.

²⁵ Ki tinga nni oba kuli ki tie o daano, Bi tagi o maama ke o kaa pia jawaandi.

²⁶ Waa jie yaala n pia paalu kuli, Wani n tie ti fuayanbiaditi kuli bado.»