Jobi 40 - U TIENU MAAMA TILI 2013

¹ O Diedo den guani ki maadi leni Jobi ki yedi:

² «Naani yua n nia leni U Paaciamu Daano, Baa fidi ki bu leni o? Yua n baa fidi ki jaligi U Tienu n guani laa bonla.

³ Lanwani, Jobi den guani ki yedi o Diedo:

⁴ ‹Mii tie puu! N baa fidi ki guani a be? Se min pii n ñoabu bebe.

⁵ N maadi yenma, n kan go yedi liba kuli, N maadi milie kuli, N kan go pugini maamiba kuli.›

⁶ O Diedo den maadi leni Jobi Ku tafaagu nni, ki yedi:

⁷ Ñagini a gbanñagidigu nani o jakoando yeni N baa buali a i buali, ŋan guani nni.

⁸ Naani a bua ki biani n moamoani fanma? Naani a bua ki bu ki cuo nni Ki saa a yuli po i moamoani?

⁹ Naani a paalu pundi n yaa yuu? Naani a pia yaa nialu n duni Nani n yaa yuu yeni?

¹⁰ Lanwani, bobini a baa leni ti jigidi leni jilima, Ki bobi ti kpiagidi leni li bali.

¹¹ Jiini a pabiencianli kuli bi niba po, Ki diidi ki le bi japaadanba kuli ki fiagi ba.

¹² Noanli ki jiini bi yusiedanba Ki ŋmaa ki midi bi nibiadiba mo bi buoli nni.

¹³ Piini bikuli mi tama nni, Ki luoni ba mi kuuma kpaadidieli nni.

¹⁴ Lanwani, mini n ba baa pagi a, Kelima a fidu n faabi a maama po.

O liibo

¹⁵ Diidi o liibo min tagi yua nani fini yeni! O ŋmani ti muadi nani o nua yeni.

¹⁶ Diidi, o fidu ye o ciaga nne, O gbanmanu mo ye o tugugbana nne.

¹⁷ O yen juagi o juoli nani sediri tibu yene. O pana jiini kua ki soagi iyii bonŋanla.

¹⁸ O kpabijala tie nani a kumoandabila yeni. O kali kpaba kuli tie nani i kudoe yene.

¹⁹ Wani n tie mini U Tienu tagima Siiga kuli yaala n tugi yuli. Mini yua n tagi o yeni n puni o ki jugisiega.

²⁰ O baadi o jiema a juana nni, Li fuali nni yandi kuli n caa ki jeli naankani.

²¹ O yen gedi ki ban duani ti gulinfaadi nni Leni ku sabigu nni.

²² Ti gulinfaadi yen wuoni o, U kpenu tiidi mo n gaani ki lindi o.

²³ U kpenciamu ñingola yaa fii leni mi jama, o kan jie. Ba Jurden kpenu yaa bua ki milini o, O kan yaa jie liba kuli.

²⁴ Naani o nilo baa fidi ki teli ki cuo o? Naani bi baa fidi ki dia ki cuo o ki pudi o maja?

O ñoabo

²⁵ Naani a baa cuo o ñoabo leni ki jandiaga, Ki kpali o ti kpadi?

²⁶ Naani a baa fidi ki taa li janbugili Ki tuuni o ñoabu nni? Naani a baa fidi ki cibi o lanyaagi leni ti kpangalidi?

²⁷ Naani a tama ke o baa tuo ki juogi leni a, Ki maadi leni a mi madingima?

²⁸ Naani o baa danli leni a? Naani a baa tuo ki cuo o ti yonbidi yogunu kuli po?

²⁹ Naani a baa jeli leni o nani ki nuanga yeni? Naani a baa tuo ki cuo o ki loli o, Ki teni a bisiaba n yaa jeli leni o?

³⁰ Naani bi jankpaanba baa taani ki cuo o ki kuadi? Naani bi baa boagidi o a kpenkpenda siiga?

³¹ Naani a baa fidi ki pua ki cibi o gbangu, Ki cibi o yuli leni li jankpaanli?

³² Maani a nuu o po, Hali ŋan baa yaa ye, a kan go faa ki lieni la!