Jobi 4 - U TIENU MAAMA TILI 2013

Elifasi n guani Jobi yaala

¹ Lanwani, Elifasi Temani yua den yedi:

² «Naani n yaa maadi ba mayenma A pali kan be? Ama ŋme wani n nan baa fidi ki yaa ŋmini?

³ Diidi a den tie niba boncianla bangika. A den paagidi yaaba yaa buadi n tadigi.

⁴ A maama yen guandi yaaba n jadi, A yen naadi yaa duna n poali.

⁵ Ama moala ŋan ye fala nni Fini a ba yeni, a pali be. Moala fala n ji nandi fini yeni, A yagini a yama.

⁶ Nani ŋan fangi U Tienu, Kaa tudi o po a yema nni yeni, A tagiŋamu ka tie ŋan daani yaala?

⁷ Amo n tia ki kpaagi ki le, A da li kpa laa ke yaa nilo N ki pia tagili kpe? Bi a kpa laa bi niteginkaaba mo yaa bodima le yo?

⁸ Ama yaaba n ko yaala n ki tiegi, Leni yaaba n pagini mi biadima kuli, Yen gaa li panpaani.

⁹ U Tienu fuoma n baa kpa ba. O pabienli faalu n baa je ba.

¹⁰ U Tienu bolini i yangbanli dunli, Ki kua a yangbanbila ñina.

¹¹ A yanboala ku kelima mi jiema luoma po, A yangbanbila mo sani ki yadi.

¹² N gbadi mayenma ŋasiili nni, Ke mi soabidi n tubili nni.

¹³ Li bonlekaala yen kpendi Bi niba kani ti dangidi nni, Yaa yogunu ke bi guani ki nali bi landi.

¹⁴ Ti jawaandi den cuo nni, Ke n gbanu kuli digibe toantoani.

¹⁵ Fawaamiba piebi n nunga nni, N gbanu kobidi kuli n fii ki sedi.

¹⁶ O nilo den se n kani ke mii bandi o, O jinjingu den ye n nintuali. O den se suo ke n den yuandi, Ki gbadi u nialu ke u yedi:

¹⁷ ‹Naani yua n baa kpe, Baa fidi ki yaa tiegi ki cie U Tienu? Naani o nilo baa fidi ki yaa ŋani Ki cie o tagido?

¹⁸ U Tienu ki dugi o naacenba po, Ba o malekinba kani o laadi i tagili.

¹⁹ Naani landaano kan le i tagili Bi nisaaliba yaaba n tie ti tandi kani, Bani yaaba yaa gbani kuli n tie tama, Ke bi tadi ki cie a sidibila, Ban baa fidi ki midi yaaba faala po?

²⁰ Yentunyenli bebe bi ŋmaa ki mudi ba, Ke oba ki tiadi bi po. Bi yaa kpe li gbeni cain.

²¹ Bi dabanbaabi cie, Ke bi kpe kaa bandi U Tienu sanu.›