Jobi 39 - U TIENU MAAMA TILI 2013

¹ Naani a bani i joaŋuabi n maa bi bila yaa yogunu? Naani a kpaagi mu boalimu n maa bi bila maama?

² Naani a bani ban punbi bi bila yaa ŋmaali, Leni ban yen maa ba yaa yogunu?

³ Bi yen ñuani yo ki maa bi bila, Ki faabi leni ban bi ye leni yaa fala.

⁴ Bi bila yen fandi ki baa u fidu mi fanpienma nni, Ki sani ki foagidi leni bi naanba, Ki kan go guani bi kani abada.

⁵ Ŋme n teni ke o fuaŋunbo die o yuli, Ki lodi o baabi ki ŋaa o?

⁶ N teni ke o ye i tiali nni, Mi yaama n ye yaa tinmu nni.

⁷ Bi niba n tiendi yaa fuugu u dogu nni naa tua o liba. Waa gba o ŋundaano tantani mo.

⁸ O goadi a juana po ki baa baa o jiema, Ki lingi yaala n soangi kuli.

⁹ Naani o moanua baa tuo ki yaa tuuni a po? Naani o baa tuo ki cua ki duani a yanloli nni?

¹⁰ Naani a baa kpali o leni u baabu wan tuo ki ko? Naani o baa tuo ki kua a kuanu nni Ki fuli ki mudi a po a tangbana?

¹¹ Naani a baa tuo ki dugi o po, Kelima o gbanmanciamu po, Ki puogi o ŋan pia yaa tuonli?

¹² Naani wani n baa todi a ŋan taani a kpaandi, Ki bili likuli a jalu nni?

¹³ Ku tataagu yaa fidi ku fiabi leni li pamanli, Li yen naani leni goliya kobidi yene.

¹⁴ Ama ku tataagu yaa ŋaa ku jena ki tinga nni, Ki teni ke mi tantonma tongi a,

¹⁵ O yen sundi ke bi baa fidi ki ŋmaa ki midi a, Ke fuayangiba mo baa fidi ki ŋmaa ki mudi a.

¹⁶ O bia o bila po boncianla Nani wani ka poadi ba yeni. Waa jie ke o fala baa bia fanma,

¹⁷ Kelima mini U Tienu n muni o mi yama, Kaa boagidi ki puni o mi yanfuoma.

¹⁸ O yaa bogini mi nuama po, Waa jie taamo leni yua jagi o kuli.

¹⁹ Naani fini n puuni o taamo u paalu, Ki go tieni yaa ganli n ye o tulu po?

²⁰ Naani fini n teni ke o yugi nani li dondobili yeni? Wan yigini ki duni maama yen pia ti jawaandi.

²¹ O ciini ku joaloangu nni Kelima o gbanu n fii maama po, Ki yen sani ki tuogi o yibali.

²² Waa pia jawaandi, waa jie puu. Bu toabu mo kan teni wan sudi ki guani puoli.

²³ Li luoli, li kpaanli leni ki jugisiega Kuli taani ki mua o po.

²⁴ O yaa gbadi li naatuntunli piebima, Se wan taa mi nuama ki kan fidi ki sedi suo.

²⁵ Li naatuntunli yaa piebi bu toabu po, Se wan yigini. O yen gaa bu toabu laabaalo Leni bi toatieba yudanba kuudi hali foagima.

²⁶ Naani a yaa yanfuoma n teni ke li fenli yugi, Ki tandi o fiabi ki teli nuganu po?

²⁷ Naani fini n teni ke jiebani yugi, Ki ban tedi o tiali naani n kpedi?

²⁸ O yen dua ki ye a joatana nni, Ki ban jagi yaa tangu n kpedi ki caadi yuli po.

²⁹ Lankane ke o diidi wan baa cuo yaala, O nuni mo nua la hali foagima.

³⁰ O bila ñu mi soama. Yaala n kpe n ye naani, omoko ye lankane.»