Jobi 38 - U TIENU MAAMA TILI 2013

U Tienu mayedikaama Jobi po 38—42 O Diedo cicilimaama

¹ O Diedo den maadi ki guani Jobi ku tafaagu siiga ki yedi o:

² «Ŋme n gangi ki biidi n jaga Leni mi yanluodanmaama?

³ Ñagini ku gbanñagidigu Nani o jakoando yeni, Ke n baa buali a i buali ŋan guani n po.

⁴ A den ye le min den tagi ki tinga yaa yogunu? Waani nni laa bonla kelima a nan tie yanfuodaane.

⁵ Naani a bani yua n biigi ki bili ki bianu? Bi naani a bani yua n den biigi ka leni u baabu?

⁶ Ki tinga tanpuuna maa be yaa po yo? Ŋme n den bili ki tinga tanpuukaali,

⁷ Ku tiŋaagu ŋmabila n den taani Ki yiini leni li pamanli, Ke U Tienu malekinba kuli mo Kpaani li pamanli kpaani yaa yogunu?

⁸ Ŋme n den luoni mi ñincianma leni a buliñoana, Man den toa ki ña mi kaanu yaa yogunu?

⁹ Mini n den teni ke ku tawaligu tua mi liadili, Ke li biigili mo tua mi bongolikaala.

¹⁰ N den sieni mi jama leni n bali maama, Ki luoni ma leni bu buliñoabu,

¹¹ Ki den yedi: ‹A baa cua hali nekanba, Ŋan da pendi lankani, Nekanba yo ke a ñingola fuugu baa gbeni.›

¹² Hali ŋan ye, a kpa teni Ke u yienu pudi leni u paalu? Naani a kpa waani u tiŋaafaanu, Wun baa cua yaa yogunu,

¹³ Ki teni u yenma n cuo ki tinga ñoakuni, Ki yoagi bi nibiadiba ban suodi?

¹⁴ Lanwani, ki tinga yen guani ki yendi Nani ban yen tieni mi maalima Ku yoagu po maama yeni.

¹⁵ Ama bi nibiadiba naa go pia bi yenma, Yaa buagu n yugidi mo baa kua.

¹⁶ Naani a kpa gedi hali Mi ñincianma ñinbuna kani? Naani a kpa kua ki goadi u kulu nni?

¹⁷ Naani bi doagidi a po mi kuuma diema buliñoana? Naani a laa mi kuuma jinjingu buliñoana?

¹⁸ Naani a faami ki tinga yabinu po? Waani nni a yaa bani laa bonla kuli po.

¹⁹ Naani a bani yaa sanu n caa mi yenma deni? Li biigili mo ye le yo?

²⁰ A fidi ki lingi ki cuo bi bianu? A bandi yaa sani n caa bi yekaani po?

²¹ Ŋan pia yaa binciama kuli nne, A baa bani laa bonla de!

²² Naani a kpa pundi mi ñima N guani ki duogi naani? Naani a laa a tatana n duogi naani?

²³ Min dogini ya fala daali po, Mi janjanma leni bu toabu daali po?

²⁴ Naani a bani mi yenma N ña naani ki pundi ti kani? Naani a bani puoli faalu n ña naani Ki pundi ki tinga nni kuli?

²⁵ Ŋme n luodi ki tacianga po u sanu, Ki bili mi tañigima leni i tatantani mo yaa sanu?

²⁶ Ŋme teni ke ki taaga mi niba N ki ye yaa tinga nni, Yaa fanpienma yaa niinni, Ke nisaalimiali kuli ki ye,

²⁷ Ki teni ke li tinwagili ñuni mi ñima ki guo Ki teni ke ti muadi pani ki go bundi?

²⁸ Naani ki taaga pia baa? Ŋme n teni ke ku mangu yen luoni?

²⁹ O laa pomado n mali mi ñinguankaama? Ŋme n mali a tatana?

³⁰ Mi ñima yen ti juagi nani li tanli yeni, U ñingbanu tanpoli mo n tua nani ku tangu yeni.

³¹ Naani a baa fidi ki taani ki loli ŋmasoali, Bi ki lodi bi naadadiba baabi?

³² Naani fini n tendi ke a ŋmabila ña, Ŋmabiga kuli leni ki yogunu? Naani fini n gobidi o ŋmabiluomo o cenli nni?

³³ Naani a bani tanpoli bonla n cuoni maama? Naani a faami ki tinga moko n bogini ki cuoni maama?

³⁴ Naani a baa fidi ki kpedi a nialu Wun pundi tanpoli po, Hali maama ke mi ñima baa jiidi ki milini a?

³⁵ Naani fini n yen soani i tañigi yin gedi? Naani yi yen yedi a: ‹Tinba nno?›

³⁶ Ŋme n tieni mi yanfuoma o nuano nni? Ŋme n tieni mi yanfuoma ku kootongu nni?

³⁷ Ŋme n pia yaa yanfuoma N baa fidi ki coadi ti tawadi, Ki bidi tanpoli dayuadi,

³⁸ Ki teni mi wagima n cuo ki sedi, A tangbana mo n cuo ki taani yenma?

³⁹ Naani fini n deli ki co o yangbanñua po o jiema? Naani fini n gbendi a yangbanbila koma,

⁴⁰ Bi yaa laabi bi kaanpaalu, Bi, bi yaa laabi ki bua ki cuo yaa yogunu?

⁴¹ Ŋme n lingi li kankali po li jiema, Li bila yaa mua ki diidi U Tienu Ki yalini kaa pia jiema yaa yogunu?