Jobi 37 - U TIENU MAAMA TILI 2013

¹ Lani n teni ke n pali pua libilibi, Nani li baa dadi ki ŋabi yeni.

² Cengi mani, cengi mani, U Tienu nialu n tangi maama Leni yaa fuugu n ña o ñoabu nni.

³ O yen teni ti tawadi kuli N gaa o fuugu laabaalo, O tañigima mo n yendi ki pundi hali u tinbianu.

⁴ Mi tañigima yaa pendi, U Tienu nialu yen duni, Ki go yaa tangi leni li bali. Lanyogunu yo, o yen ŋaa mi tañigima.

⁵ U Tienu yen tiani maama Lan lidi bi niba hali boncianla. Li tie yaa bancianma ke ti kan fidi ki bandi ma.

⁶ Wani n yen yedi a tatana: ‹Yaa baali mani ki tinga nni,› Ki go teni ke ki taaga Leni mu tacianmu kuli mi.

⁷ O yen sieni bi niba tuona, Ki teni bi niba kuli n bandi Ke bi tie o yaa tagime.

⁸ Ba ti fuayandi yen lingi u kaanpaalu, Ki ban duani bi fali nni.

⁹ O pinpinjoa ña nuganu po yo, Nujienu po mo yaa faagu n kpendinni ti wadi.

¹⁰ U Tienu fuoma teni ke mi ñima guani, Ki teni ke u ñingbanu mo juagi Ki sedi kaanyendu.

¹¹ O gbieni ti tawadi leni mi ñima, Ki yadi ti leni mi tañigima.

¹² Wani n teni ke ti tawadi jilini ki lindi, Ki tiendi nani wani n jagi yaala, Ki baa tieni u tingbanu nni, Wan puogi ti yaala kuli.

¹³ O yen soani ti yogunuba ki tinga po, Ki bua ki waani ka fala, Bi ki doagidi o ŋanbili ki po.

¹⁴ Jobi, diadi a tubili ki cengi laa bonla! Sedi ki bandi U Tienu tuonciama n da maama!

¹⁵ Naani a bani U Tienu n gobidi la maama, Ki teni ke o tawaligu yenma yendi?

¹⁶ Naani a bani yaala n teni ke ti tawadi juani? Naani a bani laa bancianma yanfuoma N ñani yua yaa kani?

¹⁷ Fini yua ke nuganu po fawaatonma Yaa figi u tingbanu po yaa yogunu, A tiadi yen fulini a gbanu.

¹⁸ Naani a den ye leni U Tienu, Ki baa fidi ki tandi tanpoli, Yua n juagi nani ban duadi yaa madiidiga yeni?

¹⁹ Waani ti tin baa yedi o yaala. Ti kan go yedi puu kuli kelima ti boanma po.

²⁰ Naani n yaa maadi, li da tie tilade ban waani o? Naani bi baa waani o yo, wan da baa li laabaalo?

²¹ Moala li cili ki biigi, Kelima ti tawadi doagini u yienu, Ama u faalu yen tugi ti ki ŋaa tanpoli n yendi.

²² Mi yenma ña nujienu po yo. U Tienu yabinu ŋamu pia jilima.

²³ Ti kan fidi ki pundi U Paaciamu Daano kani, Kelima o paalu n yabi maama po. O moamoani leni o teginma ki pia lie. O kan faligi yua n tiegi.

²⁴ Lani n teni ke li pundi bi niba n yaa fangi o. Waa diidi yaaba n nua bi yula Ke bi tie yanfuodanba.»