Jobi 36 - U TIENU MAAMA TILI 2013

Elihu waani U Tienu n tundi bi niba maama

¹ Elihu go den pugini ki yedi:

² «Guudi waamu n baa doagidi a po, Kelima n da go pia matoama, Ki baa saa U Tienu po i moamoani.

³ N baa ñani n bandima hali foagima yo, Ki saa yua n tagi nni po i moamoani.

⁴ I moamoani, n maama naa tie boandi ka, Kelima mini yua n ye leni a yeni, N tie papiendaane n bandima nni.

⁵ U Tienu pia u paalu, waa yie oba kuli mo. O pia u paalu kelima o yanfuoma n yabi.

⁶ O kan cedi o nibiado n yaa ye, O baa saa bi ninñinniba po i moamoani.

⁷ O kan buli bi niteginkaaba o nunga. O yen kaani ba ti gbandi po, Ki teni ban waagi ki kaa, bi yela mo n ña.

⁸ Bi yaa tie kpaada ki luo leni i kugaali, Bi yaa ye fala yaa lolima nni,

⁹ Li tie ke o den bua Ki doagidi ba bi tuona leni bi yiema, Ban den gbengidi bi yula yaa yogunu.

¹⁰ O den waani ba ban fangi bi yula, Ki cedi bi tuongolima yeni.

¹¹ Bi yaa cengi ki go tuo ki miini bi yula, Se ban kali mi kpama nni, Bi miali dana mo n juodi leni mi yemanma.

¹² Ama bi yàá cengi, li kpaanli n baa je ba. Bi baa kpe kelima baa bandi po.

¹³ Yaa niba n ki ŋua U Tienu pala be. U Tienu yaa cuo ba yaa yogunu, Baa miadi o faabima.

¹⁴ Bi baa kpe bi panma nne, Bi miana mo n gbeni Nani bi cancaginniba yeni.

¹⁵ Ama U Tienu wani yen taa O ninñinnilo yaa fala yo ki faabi o. O yen tundi o leni fala.

¹⁶ O baa ñani a li paboanli nni, Ki lebidi li ki pa ŋa mi yemanma. A baa yaa pia mi jemanma buoli kuli.

¹⁷ Ama a yaa jia ti buudi nani o nibiado yeni, Ti buudi leni li cuonu Baa taani ki cuo ŋa.

¹⁸ Li pabienli n da teni ŋan tudi. Li suuli yabinu n da teni ŋan jadi.

¹⁹ Naani a bubula baa fidi ki teni Ke a kan yaa ye li paboanli nni? A gbanmanu leni a jama wani baa fidi be?

²⁰ Da kuani a yama ku ñiagu nni, I nibuoli kuli n baa bodi yaagu yaa niinni.

²¹ Fangi a yuli ki da kua mi biadima nni, Kelima a ye fala nni li yaa po yo.

U Tienu wani ki pia olie

²² U Tienu paalu ki pia lie! Ŋme n baa fidi ki bangi li bonla nani wani yeni?

²³ Ŋme n wangi o wan baa tagini yaa sanu? Ŋme n baa fidi ki yedi o: ‹A tieni ti tuonbiadi?›

²⁴ Tiadi ki pagi o tuonli, Bi niba n pagi yaali bi yani nni.

²⁵ Nisaalo kuli ñuadi li ŋamu, Nilo kuli nua li hali foagima.

²⁶ U Tienu yabi hali maama Ke ti kan fidi ki bandi o, O bina mo ki pia coali.

²⁷ O yen fua a ñinboala, Ŋan ñuudi ki kpandi ki tua taaga ki go mi.

²⁸ Ti tawadi yen ŋaa ka kan yaa jiindi, Ki wuliti bi niba po.

²⁹ Ŋme n baa bandi ku tawaligu N wuli ki ladi maama, Bi ki taaga n duni ki go tangi tanpoli po maama?

³⁰ Diidi, o yen teni o yenma N yendi ki lindi o, Ki go ŋoagini mi ñincianma ñuanlu.

³¹ Wan tuuni yaa taaga n teni ke i nibuoli ye, Ki puuni ba mi jiema ke li kandi.

³² O yen kubi ki taaga o nuu nni, Ki wangi ka kan baa pua yaala.

³³ O yen doagidi o yema i tatantani nni. Ba ti yandi yen tuodi ki bandi ke o nagini.