Jobi 35 - U TIENU MAAMA TILI 2013

Elihu wani yaa po Jobi ki pia mamoanma

¹ Elihu go den yedi:

² «Naani a tama ke a se a moamoani nne? Naani a baa fidi ki yedi: ‹N tiegi ki cie U Tienu?›

³ Kelima a yedi: ‹Naani li pia n po mi todima? N yàá tieni ti tuonbiadi li pia n po mi laa fuome?›

⁴ Mini, n baa guani fini Leni a danlinba kuli yenma.

⁵ Yaadi ki diidi tanpoli ki le, Ki faami a tawala n kpedi ki yiini a po maama.

⁶ A yaa tieni ti tuonbiadi, a biidi o po be? A yaa fiini o po mi yiema, li baa tieni o be?

⁷ A yaa tiegi, a puuni o be? O ŋmani be yo a kani?

⁸ A biadima li baa fidi ki biidi a lielo po bebe, A teginma mo li baa fidi ki todi a lielo bebe.

⁹ Bi mua kelima bi nibiadiba yabinu po, Bi miadi mi todima, Kelima niba boncianla n mabindi ba.

¹⁰ Ama oba kuli ki tua: ‹U Tienu yua n tagi nni, Ki bangi nni i yani ku ñiagu ye le?

¹¹ Wani yua n bangi ti li bonla ki cie ti fuayandi, Ki puuni ti mi yanfuoma ki cie tanpoli nuani ye le?›

¹² Lanwani, bi yen yi o, ama o kan guani ba, Kelima yaaba n tiendi mi biadima japaadi po.

¹³ U Tienu naa cengi yaala n ki pia mayuli, Wani U Paaciamu Daano ki faami li po.

¹⁴ Ba ke a yedi ke ŋaa nua o, A buudi wani nan ye o nintuali. Lanwani, ŋan guudi o.

¹⁵ Moala, nani o pabienli n daa tieni liba yeni, Ke o tie nani waa faami mi yiema po yeni,

¹⁶ Jobi yaadi o ñoabu fanma, Ki maadi yaa maama n doagidi ke waa bani puu.»