Jobi 34 - U TIENU MAAMA TILI 2013

Elihu jaligi Jobi

¹ Elihu go den yedi:

² «Yinba bi yanfuodanba, Cengi mani n maama! Yinba yaaba n pia mi bandima, Cengi mani min baa yedi yaala.

³ Li tubili cengi ki gagidi mi maama, Nani bu lanbu n lengi ki gagidi Mi jiema maama yeni.

⁴ Lanwani tinba, tin lingi ki gagidi Yaala n tiegi ti yula po, Ki bandi mani ti siiga yaala n ŋani,

⁵ Kelima Jobi yedi: ‹N tie niteginka, Ama ke U Tienu nan muni nni i moamoani!

⁶ Ba leni n moamoani kuli, O nua nni nani o tuofaadaano yeni, Ki faligidi nni ke n naa tieni tuonbiadi.›

⁷ Jobi mo tie be nibuolu nne? O faadi li ñuali, Nani ban ñu mi ñima maama yene.

⁸ O yegi leni yaa niba n ki tiegi, Ki cuoni leni bi nibiadiba,

⁹ Kelima o yedi: ‹Laa pia o nilo po todimiba Wan kuani o yama U Tienu nni.›

¹⁰ Cengi mani nni yinba yaaba n pia mi yama! U Tienu kan fidi ki tieni biadima! U Paaciamu Daano kan fidi Ki tieni yaala n ki tiegi!

¹¹ O guandi o nisaalo nani o tuona n tie maama. O pa yuakuli o panpaani nani o tagu n tie maama.

¹² Abada, U Tienu wani kan tieni mi biadima, U Paaciamu Daano kan golini i moamoani.

¹³ Ŋme puogi o wan yaa gobidi ki tinga? Ŋme n taa li ŋandunli ki piani o?

¹⁴ Li yaa tie ke o bi tia o yuceli bebe yaa po, Ki bi guani ki gaa li miali fuoma,

¹⁵ Yaala n pia miali ki fo kuli, Baa taani ki bodi yenma, O nisaalo mo n guani mi tama nni.

¹⁶ A yaa pia mi yanfuoma, cengi mine, Ki diadi a tubili ki cengi n maama:

¹⁷ Naani yua nani mi teginma Baa fidi ki gobidi mi diema? A baa tuo ki jaligi U Paaciamu Daano yua n tiegi?

¹⁸ Wani bebe n baa fidi ki yedi o bado: ‹Ŋaa pia fuoma!› Ki yedi bi bulicinba mo: ‹Yi tie nibiadiba!›

¹⁹ Waa diidi bi badijaba nunbu, Waa tiendi gagidima o piado leni o luodo siiga, Kelima wani n tagi bikuli.

²⁰ Mi kuuma li baa ludi ki baa bikuli po yenme, Ku yoagisiigu nibuoluba yen le fala ki bodi, U paalu daano mo n bodi ke laa ŋua nisaaloba.

²¹ U Tienu diidi ki kpaagi o nisaalo tuada, Ki nua o taayaagima kuli.

²² Laa pia yaa biigili Bi yaa kuuma jinjingu n baa fidi Ki tua kaanpaalu bi nibiadiba po o nintuali.

²³ Laa tie tiladi wan kpaagi o nilo ki waagi, Ki nan yuandi ki jia o buudi.

²⁴ O guli bi paatieba, Ki daa kpa lingi lan baa tieni maama. O yen taa nitoaba mo ki kaani bi kaanu,

²⁵ Kelima o bani bi tuona paadima. O yen tudi ki lu ba ku ñiagu, ki midi ba.

²⁶ O yen waani ba fala asala nni Nani bi nibiadiba yeni,

²⁷ Bi den buli o ki nunga, Kaa bua ki bandi o sani.

²⁸ Bi mabindi o luodo leni bi ninñinniba, Ki teni ke bi bubula pundi o kani.

²⁹ U Tienu yaa puni nibuoluba Bi diemiba mi yanduanma, Ŋme nan baa fidi ki jaligi o li po? O yaa buli o nunga, ŋme n baa fidi ki diidi o?

³⁰ Lani n tie yua n ki bani U Tienu N da kali ti gbandi po, Ki tua diagu bi niba po.

³¹ Ama o nilo yaa yedi U Tienu: ‹N tuo n tuonbiadi, N kan go tieni yaala n bia.

³² Min kaa bani yaala yaa po mo, Waani nni la. Li yaa tie ke n tieni yaala n ki dagidi, N kan go faa ki lieni la.›

³³ Naani U Tienu baa cuo landaano? Jobi, n bani ke a baga ki ye, Kelima a jagi yene! Ama mini wani naa jagi yeni ka. Die waani ti ŋan bani yaala.

³⁴ Yaa niba n pia li kpaagili leni mi yama, Ki cengi nni kuli baa yedi nni:

³⁵ ‹Jobi maadi ki naa pia banmiba, O maama mo ki pia mayuli.

³⁶ Lanwani, Jobi n yaa baa ki ye leni o fala, Kelima o maadi nani yaa niba n ki tiegi yene!

³⁷ O go pugini o tuonbiadi po yaa tagili n bia. O fiini mi yiema tikuli siiga, Ki maadi leni U Tienu wan bua maama.› »