Jobi 33 - U TIENU MAAMA TILI 2013

Elihu yedi: U Tienu maadi leni o nilo fala nni

¹ Lanwani moala, Jobi, cengi n maama! Diadi a tuba ki cengi n maama kuli bonŋanla!

² Diidi n baa waani min pia yaa maama.

³ N maama baa doagidi n pali n tiegi maama. N li baa maadi i moamoani bebe yo.

⁴ U Tienu Fuoma n tagi nni, U Paaciamu Daano fuoma n teni ke n ye.

⁵ A yaa baa fidi, ŋan guani nni, Ki bogini bonŋanla ki cua n kani.

⁶ U Tienu nintuali, n tie nani fini yene. Bi tagi nmoko leni ku yoagu yo.

⁷ Yeni, a kan go yaa digibi n nintuali leni jawaandi, Bi ki yaa tama ke n bua ki ñii ki midi a.

⁸ A maadi ke n tubili gbadi ke a tua:

⁹ ‹Mii pia jaligi, mii pia tuonbiadi, N ŋani cain, mii pia tagiliba.

¹⁰ Ama U Tienu wani jaligi nni, Ki nua nni nani o yibali yene.

¹¹ O kpaa n taana ti kpaadi, Ki kpaagi min tiendi yaala kuli.›

¹² Lankani wani, n baa waani a ke ŋaa pia moamoani, Kelima U Tienu yabi ki cie o nilo.

¹³ Be yaa po ke a bua ki yaa nia leni o? A kan fidi ki bandi o tuona kuli.

¹⁴ Ama yogunuba U Tienu yen maadi nanda, Ki guani ki maadi mine. Ba yeni bi niba naa faami lipo.

¹⁵ O yen maadi ti dangidi nni Leni li bonlekaala nni, Bi niba n dua bi duani po Ke mi guacianma cuo ba yaa yogunu.

¹⁶ Lanwani, o yen doagidi bi niba po li bonla, Ki waani ba ke ban faami bonŋanla,

¹⁷ Ki fidi ki ñani bi yula a tuongunda nni, Ki kubi bi yula leni ti japaadi.

¹⁸ Yene ke o faabidi bi miana leni li takuli, Ki ñandi ba mi kuuma cuonu nni.

¹⁹ Yogunuba moko U Tienu yen teni O nilo n yiagi ki duani, O gbanandi kuli n yaa ye leni fala.

²⁰ Mi jiema ki go yen mani o po, Ba li yaa tie o jebuadima.

²¹ O dondi hali yaala ke bi kan go bandi o, Ke o kpaba bebe n ji bili niini.

²² Waa go foagi leni li takuli, O miali mo ji ye mi kuuma nuu nne.

²³ Ama o yaa baa yaa maleki N baa tua o candanbaalo, Ki waani o yaala n tiegi, O yaa baa yendo bebe bonba tudili siiga,

²⁴ O baa mia o po ki yedi: ‹Faabi o wan da kua li takuli nni, N baa o po mi daafaabima!›

²⁵ Lanwani, o gbanandi baa guani ki pandi, Wan guani ki tua nani o panma dana nni yeni.

²⁶ O baa mia U Tienu, omo baa gbadi o miabu. O baa sedi o nintuali leni i yigimi, Kelima U Tienu n baa guani o nilo Nani wan tie maama.

²⁷ O yiini bi niba nintuali ki tua: ‹N tieni ti tuonbiadi, mii tieni yaala n tiegi. Ama waa tieni nni nani lan bi pundi Ban tieni nni maama.

²⁸ U Tienu faabi nni ke min da kua li takuli nni, Ke n baa yaa ye ki nua mi yenma.›

²⁹ Lani n tie U Tienu n tiendi yaala o nisaalo po. Laa tie milie ka, laa tie mitaa mo ka.

³⁰ Yene ke o yen faabi bi niba leni li takuli, Ki teni li miali yenma n yendi ba.

³¹ Jobi, suo ki cengi n maama! Suo, ke mini n ba maadi!

³² A yaa pia maamiba ki bua Ki guani, ŋan maadi nni, Kelima n bua ki saa a po i moamoane.

³³ Lani yaa ka, cengi nni! Suo, ke n baa bangi a mi yama n tie yaala.»