Jobi 32 - U TIENU MAAMA TILI 2013

Elihu mayedikaama 32—37

¹ Lanyogunu, bi jataadiba yeni den cedi kaa go guani Jobi liba kuli, kelima o den tama ke o tiegi.

² Lani, Balakeli bijua Elihu yua n den tie Busi yua, Rama buolu yua pali den beni. O pali den beni Jobi po kelima o den tama ke o tiegi U Tienu nintuali.

³ O pali den beni leni o danlitaadiba, kelima baa go den fidi ki guani Jobi liba kuli, ki nan li ja o buudi bebe.

⁴ Nani ban den kpeli o yeni, Elihu den guude, ki nan yuandi ki maadi leni Jobi.

⁵ Ama Elihu n den laa ke laa jataadiba naa go pia maguankaamiba kuli, o pali den beni hali boncianla.

⁶ Elihu Balakeli bijua yua n tie Busi yua den maadi ki yedi: «N tie jawaalo, yimo tie jakpela. Lani n teni ke n den jie ki digibi, Kaa bua ki waani yi, min bani yaala.

⁷ N bi tama ke nikpelo kan gbali maama, Ke a binciama danba baa doagidi mi yama.

⁸ Die n laa ke yaala n teni Ke o nisaalo pia mi yanfuoma tie U Paaciamu Daano n kuani Yaa fuoma o niinni yene.

⁹ A binciama ka tie mi yama, A jakpela ka bani yaala n tie i moamoani.

¹⁰ Lani n teni ke n yedi: ‹Cengi mani nni! Nmoko baa doagidi min bani yaala.›

¹¹ N guudi hali ke yi maadi ki gbeni, Ke n cengi yi yantiana kuli, Ki laa ke yuakuli bi lingi wan baa yedi yaale.

¹² N cengi yi bonŋanla. Yi siiga oba kuli naa maadi ki guli Jobi, Oba kuli naa fidi ki guani o po o mabuali.

¹³ Yin da yedi ke yi laa mi yama o niinni de! U Tienu n baa fidi ki nia ki paadi o, Laa tie nisaalo ka.

¹⁴ Nani wan ki teli ki maadi leni nni yeni, Lanwani, nmoko kan taa yi yaa maama ka ki guani o.

¹⁵ Yi jie, ki naa go guandi puu! Yi naa go pia mayedikaamiba kuli.

¹⁶ N guudi, nani yin kaa go tua liba yeni, Ki sedi kaa go maadi ki guandi maamiba kuli yeni,

¹⁷ Nmoko, moala wani n ji baa maadi ki guani, Ki waani yi mini moko n bani yaala.

¹⁸ N ñoabu kuli gbie maame. N pali mo tigini nni ke min maadi.

¹⁹ Mi maama yeni fiini n gbanu Nani yaa daama n beni, Ki bua ki padi man ye Yaa dayuapandi nni yeni.

²⁰ N baa maadi ki baa ki fuo bonŋanla, N baa yaadi n ñoabu ki fidi ki guani bonŋanla.

²¹ N kan tieni gagidima bi niba siiga, Ki bagi min taani yi siiga oba kuli po,

²² Kelima mii tie laa nibuolu. N yaa tieni yeni n Tagido baa bolini nni tonma.