Jobi 31 - U TIENU MAAMA TILI 2013

Jobi poli ke waa pia tagili U Tienu nintuali

¹ N den kuani n nuni yaa kuali n tie Ke n kan diidi jafaano n yama n kua o niinni.

² Yeni yaa ka, tanpoli Tienu Den baa sieni nni u laa biinu yo? U Paaciamu Daano den baa soani N po be yo hali tanpoli?

³ Naani mi yebiadima ki tie Ti tuonbiadi daano po ka? Siiga nni yema mo yaaba n tiendi Yaala n ki tiegi po.

⁴ Naani U Tienu ka diidi min tagini yaa sanu, Ki coadi n taayaagima kuli?

⁵ Li yaa tie ke n cuoni mi faama nni, N taali mo yaa jaligi ki taa i janbi sanu,

⁶ U Tienu n biigi nni, Yaa bonbiigikaala n tiegi nni, Ki bandi n papienli n da maama.

⁷ Li yaa tie ke n taali jadi Ki ŋaa yaa sanu n tiegi, N pali yaa ŋoadi n nuni n bua yaala, Joagindiba yaa tabini n nii,

⁸ Min buli, nitoa n taa ki je! Ban ŋabi min ŋu yaa tiidi mo!

⁹ Li yaa tie ke n laa pua, Ke n yama kua o niinni, Ke n gedi n yieninlielo buliñoabu kani, Ki bua ki jiadi o,

¹⁰ N pua n ŋmagidi bu saabu jatoa po, Jatoaba mo n tieni o ban bua yaala!

¹¹ Yeni n baa tua cagindi bonla, N bujialo n co bi niba yaa tagili po.

¹² Laa tagili baa yaa tie yaa mu N baa bolini nni, Ki go bolini min pia yaala kuli.

¹³ N yaa den fali n jatuadili Bi n puotuadili moamoani, Ke ti maama gali,

¹⁴ U Tienu yaa ti fii n po yaa yogunu, N baa tieni be? O yaa fii ki taani lienni, n baa yedi be?

¹⁵ Naani yua n tagi nni n naa tugu nni yeni, Wani ka den tagi bani wani? Naani Tienyendu yeni ka kuani tikuli Ti naanba tugidi nni?

¹⁶ Naani n den muni a luoda ban bua yaala? Naani n den teni ke li kpepuoli mo yaa nuni moandi lipo?

¹⁷ Naani n den dini nbebe n jiema, Ke ki kpienbiga ki den baa ki dini?

¹⁸ Ama diidi, hali n bonwaama nni, O fandi n yaa kani nani o baa kani yeni, Hali n bonwaama nne ke n todi li kpepuoli.

¹⁹ Naani n den laa o lianliamo Ke waa pia tiayiekaadi, Ki laa taliga mo ke waa pia kpaligolikaabu,

²⁰ Ke mii den puni o n pekobidi caba, Ki tongi o gbanu ke o tuondi nni?

²¹ N yaa den fii ki sedi ki kpienbiga po, Kelima bi bujiaba ñii n ciaga po,

²² N boacabili n padi ki baa, N buagu mo n tugidi n nukpandunli kani, Ki baa ki kua kua.

²³ N den jie U Tienu cuonu, Ki kan den fidi ki tieni liba kuli, O bali kpiagidi kani.

²⁴ Li yaa tie ke n bili n dugidi wula nni, Ki yedi wani wula yeni: ‹N dugi a po!›

²⁵ N yaa den mangi n pali n ŋalimanciamo po Leni min soani ki baa yaa piama po,

²⁶ Min den diidi u yienu yenma, Wun ñuliti yaa yogunu, Min den diidi o ŋmaalo n cuoni Ti tawadi nni ki yieni maama,

²⁷ N yaa n den tuo ke n pali boandi nni, Ke n ŋoadi ki pugi ba nani i tieni yeni,

²⁸ Lani moko tie yaa tagili n pundi u cuonu, Kelima li tie ke n ñani tanpoli Tienu puoli po yo.

²⁹ Naani n den mangi n pali n yibali yebiadima po? Naani n den yugi ki cii Leni li pamanli kelima bonbiadila tieni o po?

³⁰ Mini yua ki den tuo ke n lanbu N tieni tuonbiadi yeni, Lani n teni ke mii den poli ki mia o kuuma.

³¹ Yaa niba n den ye n diegu nni den tua: ‹Ŋme n ki ŋmani ti nandi ki guo?›

³² O caano kan den duani ñiagu niinpo, N yen luodi n buliñoabu o sancenlo po.

³³ Naani n wuoni n biadima Nani bi nisaaliba kuli yeni, Ki wuoni n tagili n pali nni?

³⁴ Naani n den jie bi niba maama leni bi faliga, Hali yaala ke n kan yedi liba, ki kaa suo n deni?

³⁵ Ŋain, ŋme n baa lingi n po, Yua n baa cengi nni? Min pia yaa majuodikaama nne: U Paaciamu Daano n guani n po, Ki waani nni n yibali n diani Ki kuli nni leni yaala!

³⁶ N baa taa la ki tugi n yuli po, Ki cibini la nani ki badifogiliga yeni.

³⁷ Yeni, n mo baa waani U Tienu N taayaagima kuli n da maama, Ki biali o nani o badijoa yeni.

³⁸ Ba min ko yaa tinga yaa fii Ki koani leni nni, Ke ki bana mo fii ki mua,

³⁹ Li yaa tie ke n den dini Ki bonluonkaala kaa pani, Ki boandi bi tindanba pala,

⁴⁰ I konkoni n pudi ŋalikama kaanu. Ti moabiaditi n pa orje kaanu.» Jobi majuodikaama n yeni.