Jobi 3 - U TIENU MAAMA TILI 2013

Jobi leni o danlitaadiba booli 3—31 Jobi yenbidi

¹ Li yaa puoli Jobi den yaadi o ñoabu ki soli o maadaali,

² Ki yedi:

³ «Min mali yaa daali yeni n bodi, Ki taani leni ban taa n tugu yaa ñiagu.

⁴ Landaali n kpandi ki tua biigili, U Tienu yua n ye tanpoli, N da taani li li baanli nni, Yenmiba kuli n da cua ki yendi li!

⁵ Li biigili leni mi kuuma n buali lipo! Yaa tawadi n biigi n cua ki libini li! Yaa bonla n bia n cua ki yaa jiendi li!

⁶ Laa ñiagu, li biigili n taa ku, Ban da baani ki taani ku li binli dana nni. Ban da taani ku o ŋmaalo dana coali nni!

⁷ Laa ñiagu n da go baa ku liegu, Laa ñiagu n da baa pamandanyigimiba.

⁸ Yaaba n solini a dana, Ki baa fidi ki yini o bonfuodibiado yeni, N soli laa ñiagu.

⁹ Laa tiŋaagu ŋmabila n biigi, Kun yaa sugini mi yendima, Ke li nan kan yendi. Kun da baa ki le u tiŋaafaanu yenma,

¹⁰ Kelima ku naa yie ban da maa nni, Yaala n bi baa teni ke n kan le o naa fala.

¹¹ Be n teni ke mii den kpe hali Min den ye n naa tugu nni yaa yogunu? Be n teni ke mii den kpe min den ña O tugu nni yaa yogunu?

¹² Be n teni ke n den baa Min baa kali yaa panlieda po? Be n teni ke n baa yaa biilieda N baa ŋaani nni?

¹³ Moala ji bi baa sua ke n dua n kuli nni, Ki goa, ki fuodi

¹⁴ Leni ki tinga badiba, Leni bi paatieba yaaba n guani Ki maa yaa diena n den wudi yeni.

¹⁵ Bi mo, n bi baa yaa dua leni yaa badijaba n pia wula, Ki go gbieni bi diena leni ŋanjilifa.

¹⁶ N bi baa yaa wuo, nani yaa tugu n biidi, Bi nani li maakaamuali yeni.

¹⁷ Lankani, bi nibiadiba biadima gbeni, Yaaba n coagi mo duani ki fuodi.

¹⁸ A kpaada kuli baa mi yanduanma, Kaa go gba a kpaadiguuda tantani.

¹⁹ Lankani, taliginba leni bi paatieba kuli, Tie yenma. Lankani, o yonbo faabi leni o daano.

²⁰ Be yaa po yo ke U Tienu teni, Ke yua n ye leni fala laadi u yienu pudima? Be yaa po yo ke o puni li miali, Yaaba mo n ye leni li paboanli?

²¹ Bi guu mi kuuma ke maa kpendi. Bi lingi ma ki cie baa ŋalimani.

²² Bi yaa bi baa ki kua bi takula nni, Se ban yaa ye leni li pamankandikaali.

²³ Be yaa po yo ke U Tienu puni li miali, Yaa nilo n ki bani wan caa naani? Be yaa po yo ke U Tienu puni li miali, Wan pigini yua yaa sani kuli?

²⁴ N moe n tie n bonjekaala. N mua ki kan suo mo!

²⁵ Min bi jie yaala yeni nandi nni. Min bangi yaala yeni, lani n tiendi nni.

²⁶ Mii pia yanduanma, mii pia kalima, Mii pia fuodima. Yanyagidi bebe n ye leni nni.»