Jobi 29 - U TIENU MAAMA TILI 2013

Jobi yemanma yogunu

¹ Jobi go den doagidi o moamoani ki yedi:

² «N yaa bi baa fidi ki guani ki baa Yaa ŋmaali n pendi yaa yema, Nani yaa dana ke U Tienu den kubi nni yeni,

³ Nani o fidisanga n den yiini N yuli po yaa yogunu, Ke o yenma den teni ke n fidi Ki cuoni li biigili nni.

⁴ Nani n yema n den mani n po yaa yogunu Ke U Tienu den tie n danli, Ki kubi n diegu bonŋanla maama yeni.

⁵ U Paaciamu Kuli Daano n den ye Leni nni yaa yogunu, Ke n bijaba den gaani ki lindi nni.

⁶ N taana n den paagi mi naaŋankpama nni, Ke ku tangu mo wuliti n po mi kpama.

⁷ N yaa den ñani ki baa gedi u dogu buliñoabu po, Ki teni ke bi ŋanbi n po, N kalikaanu u nitaankaanu kani,

⁸ Bi jawaaba yaa den laa nni, Se ban fii ki ŋaa n po u kaanu, A jakpela mo n fii ki sedi suo.

⁹ Bi badijaba yen cedi bi booli, Ki taa bi nii ki pii bi ñoana.

¹⁰ Bi yudanba yen mubini bi ñoana Ki yaa ŋmini suo,

¹¹ Kelima yaa tubili n den cengi nni, Den yi nni: ‹Mi yemanma daano!› Yaa nunbu n den nua nni mo, Den tiendi n po siedi.

¹² Kelima n den faabidi Yaa ninñinnilo n miadi mi todima Leni yaa kpienbiga n ki pia todika.

¹³ Yua n den baa kpe yen gaaliti nni. N den mangidi li kpepuoli mo yaa pali.

¹⁴ N yen taa mi teginma ki la, Man yaa tie n liadili, N moamoani mo n den tie N liadicianli leni n finfinjuadi.

¹⁵ Mini n den tie o juamo nuni, Ki go tie o wabo mo yaa taana.

¹⁶ N den tie a luoda po bibaa, Ki tie o caano mo yaa todika.

¹⁷ N yen pua ki mudi yaa nilo n ki tiegi yaagu, Ki kpibidi wan kpibi yaala o ñoabu nni.

¹⁸ Lanwani, n yen tua: ‹N baa kpe n duanu nni! N dana baa yaa yabi nani mi tanbiima yeni.

¹⁹ N jiini baa talini ki gedi mi ñima po, Ku mangu mo baa dua ki maa n beni po.

²⁰ N baa guani ki baa Min den pia yaa kpiagidi, N fidu mo n go guani ki pugini!›

²¹ Bi yen cengi nni suo, Ki guu min baa tundi ba yaala.

²² N yaa den maadi ki gbeni, bi kan go liegi. N maama yen sandi bikuli po.

²³ Bi den guu nni nani ban guu Ki taaga maama yeni. Bi yen yaa bi ñoana n maama po, Nani ki tinga ñiali n yen yaa ki guu Ki taaga maama yeni.

²⁴ Baa den tama ke n baa fidi Ki mangi n nunga bi po. N nunmanga n den tie bi po i baagi.

²⁵ N yen yegi leni ba ki ban kali bi liiga. N den tie nani o bado yeni li toagoli liiga, Nani yua n baagidi yaaba n ye leni li paboanli yeni.