Jobi 28 - U TIENU MAAMA TILI 2013

Mi yanfuoma ki pia bandi-gbenma

¹ Li pia ban ñandi ŋanjilifa naani Leni ban ŋanbidi wula mo naani.

² Bi ñandi ti kudi ki tinga nni, Ki duadi ki ñandi ti kumoandi mo a tana nni.

³ Yaaba n gbi ki ñandi laa kudi kuli, Yen kua ki tinga nni leni mi yenma, Ki lingi hali naani n biigi ki yaa ñandi a tana.

⁴ Bi gbi ti buodi bi niba n ki kuu naani, Bi santagiba mo n ki tagi naani. Lankane ke bi yen juani ki lengidi.

⁵ Mi jiema ña u tingbanu po, Ama ki tinga tugu nni kuli jugi Nani u mu n buoni yaala yeni.

⁶ Ki tinga tana nne ke bi laadi yaa tanmoana n yi safiri Leni mi wulayoma moko.

⁷ O kaabo ki bani li sani, Li kafenli mo daa kpa laa i sani yeni.

⁸ Yaa yandi n pia jilima daa tagini li sanu, O yangbanlo daa tagini likani ba yenma.

⁹ Ama o nisaalo yen pua ki mudi ku tangu, Ki kuodi a juana hali tiipo ki guli a.

¹⁰ O gbini ti buodi a tana nni, O nunbu baa fidi ki le lienni yaala N pia mayuli kuli.

¹¹ O biini i ñinsani ke ñima n da go bundi, Ki doagidi yaala n bi wuo mi yenma nni.

¹² Ama mi yama mo nan ye le? Mi yanfuoma mo nan ña le?

¹³ O nisaalo ki bani mi dunga, Maa ye mialifo kuli n ye yaa tinga nni.

¹⁴ U kulu yedi: «Maa ye n niinni!» Mi ñincianma moko yedi: «Maa ye leni nni!»

¹⁵ Bi kan fidi ki lebidi ma leni wulamoano, Bi ki biigi ŋanjilifa ki da ma.

¹⁶ Ba yaa wula n ñani Ofiri diema nni, Kan biigi leni ma kpiagidi. Ba yaa tanmoana n yi onigisi Leni safiri kan biigi leni ma kpiagidi.

¹⁷ Wula leni ti madiiditi kuli, Kan niagi leni ma. Bi kan fidi ki lebidi ma Leni wulamoano bobili.

¹⁸ Yaa tanmoana n yi kolayi leni Mi tanpenpelinma kan tuo ki biigi bi yula leni ma. Ki yaa pia mi yama cie i lanmoani buoli kuli.

¹⁹ Etiopi diema tanmoana ya n yi Topasi kan fidi ki niagi leni ma. Ba o wulamoano mo kan tuo ki niagi leni ma.

²⁰ Lanwani daa, mi yama mo nan ji ña le? Mi yanfuoma deni nan ye le?

²¹ Mi wuo mialifo kuli po, Ki wuo tanpoli nuani po.

²² U kulu leni mi kuuma yedi: «Ti tuba gbadi ke bi maadi mi maama.»

²³ U Tienu bebe n bani mi sanu. Wani bebe n bani mi yama n ye naani,

²⁴ Kelima wani n yen diidi hali u tinbianu, Ki nua yaala n ye mi tinfanma nni kuli.

²⁵ Wani n den biigi ku faagu kpiagu, Ki bili mi ñima n baa yaa de maama.

²⁶ Wan den bili li bali maama ki taaga po, Ki bili u sanu mi tañigima Leni i tatantani po yaa yogunu,

²⁷ Lanwani, o den laa mi yama Ki teni ke mi doagidi. O den bili mi tanpuuli, Ki diidi mi ñuanlu kuli bonŋanla.

²⁸ Li yaa puoli, o den yedi o nisaalo: «Diidi o Diedo fangili n tie mi yama, Ki foagidi leni mi biadima, Lani n tie mi yanfuoma.»