Jobi 26 - U TIENU MAAMA TILI 2013

Jobi maguankaama

¹ Jobi den guani ki yedi:

² «A ŋanbi! N laa ŋan baa fidi Ki todi yua n ki pia fidu maama! N laa ŋan baa fidi ki todi yua n tadigi maama!

³ A bani ki tundi yua n luo mi yanfuoma wani de! A bani mi maama mo de!

⁴ A li maadi leni ŋme yo? Ŋme n wangi a ŋan maadi yaala ne kuli?

U Tienu paalu ki pia bianu

⁵ U Tienu paalu yabi ki cie mi ñincianma, Yaaba n ye lienni leni bi tinkpiba kuli digibi.

⁶ Bi tinkpiba diema nni, Liba kuli ki duagi o po. U kulu nni mo, puu kuli ki wuo o po.

⁷ O teni ke nujienu ye u damu nni, Ki teni ke ki tinga mo juani ku lengu nni.

⁸ O kubi mi ñima ti tawadi nni, Mi kpiagu naa teni ke ti tawadi padi.

⁹ O dadi ki tandi ti tawade, Ki pini o bali kalikaanu.

¹⁰ O diani boncencenli u ñingbanu po, Ki paadi li biigili leni mi yenma.

¹¹ U Tienu yaa funi, Tanpoli benjieli jigi yen cie, yin digibi.

¹² O teni ke mi ñincianma digibi Kelima o paalu po, Ki bolini mi ñincianma nni bonfuodibiado.

¹³ O fuoma bebe pidi tanpoli kpali kpali. O muu ki kpa yaa wa n tiini leni o nuu paalu.

¹⁴ Line da yaa tie o tuona waamu bebe, Ke tin gbadi yaala tie i soabidi bebe, Ŋme n baa fidi ki bandi O tuonciama n da maama?»