Jobi 24 - U TIENU MAAMA TILI 2013

Jobi guani Elifasi ki yedi: U Tienu cedi bi nibiadiba

¹ Be n teni ke U Paaciamu Daano Naa bili yogunu ti buudi po? Be n teni ke o nidugikaaba Naa bani wan baa jia ti buudi yaa dana?

² Bi niba diadi bi kuani, Ki ŋmiadi a biankpaana, Ki su ti yandi ki caani ti li kpaali.

³ Bi fie ki kpienbiga ŋunbo ki ban caa, Ki gaa li kpepuoli nua yo ki nan baa ledi o.

⁴ Bi deli a luoda ki ñani ba u sanu nni, Ki teni ke mi diema tadima mo kuli wuoni.

⁵ Diidi ki le! Bi naani leni yaa fuaŋunbi n ye Mi fanpienma nni yeni. Bi ñani ki kua bi tuonli nni, Hali ku tiŋaapanpangu, Ki baa lingi mi jiema! U tialu nni bebe yo ke bi baa baa Mi jiema bi bila po.

⁶ Bi ce ti yanmuadi ku muagu nni, Ki liegi o nibiado kuanu nni Duven tiidi bonluonkaala.

⁷ Ama bi yen duani ku ñiagu mubima, Kaa pia kpalipinkaadi ti wadi po.

⁸ A juana nni ki taaga mini ki moagidi ba, Ban kaa pia kaanpaalu yene, Ke bi sani ki tabini a joatana.

⁹ Bi yen lobidi ki kpienbiga o naa nuu nni leni u paalu, Ki fenli o tadimo bonla kelima o panli po.

¹⁰ Bi teni ke bi cuoni mubima kaa yie, Ki teni ke a konkonba tugi a dibaba.

¹¹ Nitoaba diedi nni bi ŋoali mi kpama, Ki tuodi mi daama ki nan kan baa ki ño ma.

¹² U dogu nni yaaba n ku yenbidi, Yaaba n poagili mo buudi. Ama U Tienu naa faami, Laa tuongunda kuli po!

¹³ Bi nibiadiba tie yaaba n nani mi yenma. Baa tagi mi yenma sani nni, Baa ye mi sani nni mo.

¹⁴ O nikpalo yen fii lan da biigi yaa yogunu yo, Ki kpa o ninñinnilo leni o luodo. Ku ñiagu o yen tie nani o suudo yeni.

¹⁵ Li jaconconli yen guu lan bii, Wan yedi: ‹Oba kuli kan le nni.› O yen baa li cabili ki fini o nunga.

¹⁶ Bi yen pua ki mudi a diena li biigili nni, U yensiinu mo, se ban tundi ki lo. Baa bani mi yenma n tie yaala.

¹⁷ Bi yaa po wani, Ku tiŋaagu tie mi kuuma jinjingoe. Yeni de! Bi maani mi kuuma gundima leni mi biadima.

¹⁸ Ama yinba wani yedi: ‹Mi ñima baa koadi o nibiado wani, Ki ban yaa caa. O tinga baa tua solindi kaanu bebe yo. O kan go gedi o duventiidi kuanu po.

¹⁹ Nani u tayialu leni ku wuligu N teni ke a tatana yuodi maama, Bi tinkpiba diema moko baa je, Ti tuonbiadi daano yene.

²⁰ O naamado baa sundi o po, A sidibila n baa je o ki gbadi bi manu. Bi kan go tiadi o po. Ti tuonbiadi daano baa kua nani bu tibu yeni!›

²¹ O yen kpabidi ki ŋoaliga, yua n ki maa, Ki tiendi li kpepuoli mi biadima.

²² Ama U Tienu paalu teni Ke bi tugumoandanba miana koabigidi. O fii bi po ki foagidi ba leni li miali.

²³ Ama U Tienu yen teni Mi yanduanma n yaa tie bi jigi, Ki pugidi bi paalu, Ki go faami bi sani kuli po.

²⁴ Bi fii yogunu waamu bebe po yo, Li yaa pugini waamu bi baa bodi cain. Bi baali nani ban pedi ki guli yaaba yeni, Ki mali nani ban yendi yaa siangu yeni.

²⁵ Li yàá tie yeni, ŋme n baa niani nni? Ŋme n baa teni n maama n bia fanma?»