Jobi 23 - U TIENU MAAMA TILI 2013

Jobi guani Elifasi: N naa pia tuonbiadi

¹ Jobi go den guani ki yedi:

² «Dinla moko min baa maadi yaama, Baa yaa tie nani mi yiema yene U Tienu po, Ba ke n moa kaa bua ki ñiindi.

³ Ŋain, n yaa bi bani min baa le o naane, N bi baa pundi hali o bali kalikaanu kani.

⁴ N bi baa doagidi o n tugupiengu, Ki waani o ke mii pia tagili.

⁵ Lani, n bi baa bandi wan bi baa Lebidi nni yaala. N bi baa fidi ki gaa wan baa yedi nni yaala.

⁶ Naani li tie tilade wan bu leni nni? Laa tie tiladi kelima li bi dagidi wani wani n yaa faami n po.

⁷ O bi baa bandi ke wani leni yua n bu tiegi. Yeni n bujialo bi baa saa n po i moamoani, Ki faabi nni yaa yogunu kuli po.

⁸ Ama n yaa gedi puoli po waa ye lipo, Nintuali po mo, mii nua o.

⁹ Naani o pia li tuonli nujienu po? Mii fidi ki laa o lipo. Naani o ban wuo nuganu po yo? Mii nua o lipo.

¹⁰ Ama o nan bani n sanu n tie yuu. O yaa ti biigi nni yaa yogunu, N baa ña ki ŋani nani wula yeni.

¹¹ N ŋoadi o taabuona leni o sani, Mii jadi ki tagini santo.

¹² Mii lebidi o bali maama. N kubi n pali nni o ñoamabona kuli.

¹³ Ama omo yaa jagi ke o baa tieni bonla, Ŋme n baa fidi ki teni wan lebidi jagili? Wan bua yaala, o tiendi lane.

¹⁴ Lanwani, o baa tieni wan jagi n po yaala, O go pia n po jagitoana ki pugidi.

¹⁵ Lani n teni ke n jie ki luodi o nintuali. N yaa kpaagi lipo, se min yaa jie o.

¹⁶ U Tienu bolini n papaali kuli cain, U Paaciamu Daano teni ke n jie ki luodi,

¹⁷ Kelima waa bolini nni li biigili nni, Ama o teni ke li ciñuuli n lindi nni.